北海道篇 - 札幌市電 及 藻岩山

區議會選舉完畢, 終於有心情繼續北海道篇, 香港人加油!!

喺九州篇既時候, 我介紹過世界三大夜景, 仲記唔記得? 係香港!! 長崎同摩洛哥.  而日本內既三大夜景又係乜呢? 就係北九州, 長崎同埋札幌.  所以今日要為大家介紹既就係札幌市其中一坐山, 亦係最近市區最易去既藻岩山 (高531米).  不過由於去藻岩山必先搭札幌市電, 所以本文以札幌市電為開端.

札幌市電

札幌市電有啲似東京既山手線, 係分別由順時針同逆時針兩條線組成既鐵路網, 所以無論你搭任何一個方向, 理論上都可以去到你想去既站.


上圖係官方既地圖, 不過你應該睇唔明, 因為佢係上下調轉既, 唔睇好過睇. 睇番Google Map啦.

從Google Map可以睇到, 札幌市電同地鐵既轉車站只有薄野站 (すすきの駅). 而由狸小路站去藻岩山的話, 就要去ロープウェイ入口駅 (英文係: Ropeway Iriguchi Station). 無論你搭順時針定逆時針都好, 兩個方向既車程相差唔夠5分鐘, 所以你就腳有位就上車啦, 車程30分鐘. 而我就專登揀新車坐. 睇相啦.

熊本篇也好, 長崎篇都好. 每個地方既市電都總會有幾抽新車叫 低床列車. 低床列車有上圖既對坐位(官方叫展望席), 有落車提示, 上落車門又大又無樓梯, 方便好多. 而無論你搭幾多個站都好, 車費一律￥200. 唯一要小心既係, 順時針既班次部份以中央圖書館前站為總站, 你對番上面個Google Map睇就明白佢去唔到藻岩山的, 咁你就要搭下一班車喇. 正常既班次佢車頭牌箱係寫住 "循環" 既, 咁就代表你要搭去邊都啱喇.

藻岩山

當你去到ロープウェイ入口駅之後, 你有兩個方法去藻岩山吊車站, 一係行路 (大約15分鐘, 冬天落雪時都幾難行下, 因為係上山路), 一係就搭免費穿梭巴士, 班次係15分鐘一班, 車程5分鐘. 咁梗係搭車啦.

落咗市電之後, 喺十字路口, 認住上圖圈住既屋仔, 行過去穿梭巴士站都唔駛幾步路. 之後你企定定等就可以, 巴士站有時間表, 你可以用黎參考, 不過全日都係15分鐘一班車架喇.

跟住齊齊落車排隊買吊車飛. 

停一停寫幾隻字先. 大家去得就梗係會上到山頂架啦, 所以睇最貴嗰價錢就可以, 係￥1700來回. 但係點解我張相係￥1500?? 全怪我手多多!! 上面講咗我專登揀新市電黎搭, 咁市電上面有啲當地旅遊單張, 其中一張介紹藻岩山既我就多手拎黎睇, 原來憑單張去買飛係可以用優惠價￥1500一張去買, 仲不限數量添!! 大家記得手多去到邊都留意吓有冇呢啲單張喇.

講番藻岩山, 要上到山頂其實係分兩段既, 第一段係坐吊車, 即係上圖嗰款, 班次係15分鐘一班, 車程5分鐘. 坐吊車淨係可以去到山腰, 要上到山頂就要再轉車(車票已經包埋, 唔駛擔心).

山腰其實係一座中轉站, 得洗手間同埋一間手信店. 而中轉站外就係大型停車場, 自駕遊既朋友就係要將車泊喺呢度, 再轉車上山頂, 由於你無需坐吊車關係, 所以你見到上面個收費表係平好多, 來回山頂只需￥600. 睇完我地繼續行程上山頂.

又再一次排隊上山頂, 今次呢段係坐纜車. 我又停一停介紹吓先, 好少人識分吊車同纜車, 因為昂平360又係叫纜車, 山頂嗰款又係叫纜車, 好吧大家都是用纜拉動的車, 不用分得那麼細.  其實, 吊住黎行既咪吊車囉, 有路軌而用纜拉既先係叫纜車.  呢程纜車又係15分鐘一班, 車程係1分40秒.

上到黎山頂, 首先要介紹下間餐廳The Jewels Restaurant.  長崎篇既時候, 我叫大家上到山頂一定要試吓間餐廳, 不過呢間我就唔敢講喇, 唔係唔好食, 而係好貴! 最平既晚餐都要￥4800一個人 (約四百蚊港紙). 有埋件魚既就要￥6800.  我呢個Blog教窮遊既叫大家不如喺佢門口個Cafe Counter買杯咖啡算.

另外, 山頂呢度有一間好似香港太空館咁既球型放映室, 每日都有唔同既片放映, 收費係￥700.

至於唔駛錢既活動, 梗係出露台影北海道夜景啦, 仲有個幸せの鐘 (幸福的鐘) 比你打咭影相, 同埋玩戀人鎖 (個鎖要喺山腰嗰間手信鋪買, 唔記得買就無鎖用架喇!!)  而呢度仲係2012年日本一個叫做 100個戀人之聖地 活動既其中一個地方添. 

北海道篇其他景點:

北海道篇 - 狸小路 / 二条市場
北海道篇 - 小樽
北海道篇 - 旭川市旭山動物園
北海道兩大Outlet

註: 本文地圖取材自谷歌地圖