達思怪遊世界 ThatsWhy's Travel: 北海道篇

去札幌必定會去狸小路. 其實狸小路是什麼? 狸小路係一條"通" (即係商店街), 就好似原宿既竹下通同埋熊本既上下通咁. 一般每個地區既通都係當地市民既購物點, 就連大商場都係圍繞住 "通" 去起, 所以去得札幌唔行下狸小路, 仲有乜嘢好行? 去狸小路好簡單, 搭地下鐵就可以喇, 不過旅遊書會教你由大通站出, 我話你知其實最近既站係...., 呢個站去狸小路仲唔駛日曬雨淋添.

睇睇上面個地圖, 綠色線係地下鐵南北線; 藍色線係地下鐵東豐線, 由於兩條線係平行既關係, 所以兩條線都會經過札幌站同大通站. 不過明顯係南北線近狸小路好多啦. 而最近狸小路個站叫薄野站(日文係すすきの). 而其實, 薄野站同大通站之間係有條地下街(叫Pole Town)貫通住兩站, 而中間就有個出口正正係狸小路4段出口. 我地睇吓下面既相.

去呢上圖呢個位, 左手邊係驚安之殿堂, 右手邊係扶手電梯上番地面既狸小路第4段, 上到去即係下面張相.

而呢個位即係下面張相.

上面呢張相, 就係狸小路第4段, 即係最多人行既一段, 因為呢度有旅客中心同埋兩間驚安之殿堂.

順手講個題外話, 薄野係日本三大夜場之一, 第一位唔駛諗大家都知係歌舞伎町啦, 而第二位係位於福崗既中洲, 而第三位就係札幌既薄野喇. 所以薄野比較上無咁雜, 你當佢係一個飲啤酒食下野既老蘭可以了. 所以一去到薄野, 周圍都係啤酒廣告, 好似下面張相咁.

狸小路

上文講咗, 一般人都係由驚安之殿堂呢度開始行入去, 咁我就由呢度開始講啦. 狸小路一共有7段, 上文地圖既紫色虛線就係狸小路, 由左至右計係第7段至第1段, 而去到第1段再過條馬路就係陣間會介紹既二条市場. 所以由驚安呢度行入去就係由第3段去第7段喇. 講番驚安先, 左手邊就係最近馬路嗰間亦係最大嗰間, 右手邊嗰間比較細, 人亦比較少, 所以買零食啱晒. 買玩具同電器就要去左手邊嗰間喇.

而喺左手邊, 大嗰間驚安之殿堂既4樓, 仲有旅客服務中心, 呢度有好多Local Tour既介紹, 部份仲可以即日出發添. 另外, 呢度亦都有一日任踩單車IC咭賣. 而當日, 駐場既職員竟然係香港人!!

以上呢樣野真係無旅遊書介紹過. 札幌呢度係有共享單車租的, 叫Porocle. 全札幌一共有40多個借/還車點, 所以都算方便. 不過由於租車係要用專用既IC咭 (要有日本身份證同日本信用咭先登記到), 所以如果想租車既話, 只可以去旅客中心租一日任踩. 而一日任踩既價錢係￥1,500(約$120港幣). 又順帶講吓, 大家一般對日本人既認知係佢地好守法好自律. 不過北海道又唔同講法喎, 你會見到通街都人亂泊單車, 馬路邊又有, 行人路又有, 總之阻唔到人就泊, 所以你租完部單車, 想去行街或者食飯, 見到人泊你就泊, 唔阻人就可以. 咁當然還車時就去番指定嗰40幾個還車點還啦. 好, 題外話講完, 繼續行街.