2019年3月5日 星期二

名古屋篇 - 常滑 (招財貓的故鄉)

究竟上圖呢隻招財貓有幾大? 究竟招財貓係舉左手定右手? 究竟點解明明唔係名古屋發源招財貓, 但係名古屋常滑市叫自己做招財貓故鄉?  睇完今集內容之後你就會知道答案.  一齊黎常滑搵招財貓啦.



招財貓故鄉的典故

常滑係日本六大古窯之一 (包括: 瀨戶、越前、常滑、信樂、丹波、備前) 窯用黎用燒陶瓷既, 相傳喺150年前已經開始用陶瓷製作招財貓.  大家都知招財貓有幾出名架啦, 為左內銷同外銷, 所以日本需要大量製作陶瓷招財貓, 而當中八成既招財貓都係由常滑呢度製造既, 所以常滑市就稱自己為招財貓故鄉喇.  就連常滑既吉祥物, 都係招財貓咁既樣架!




黎到常滑, 周圍都會見到上面既地圖, 因為要尋找招財貓的話, 最好就跟當地觀光協會設定既兩條散步道去行喇.  散步道分為A路線B路線, 當中A路線係最多人行既, 全長約1.6公里需時約一小時, 而B路線全長約4公里需時2.5小時.  除此之外, 大家最想搵嗰隻大大大招財貓喺邊呢?  就係喺地圖招財貓頭既位置, 佢位於A路線既起點旁邊.  好喇, 今集我會帶大家行A路線.




起點就係上圖既呢座常滑燒, 佢其實係陶瓷器會館既會址, 入面有廁所亦有招財貓商品售賣.  而最方便既, 係有個大停車場比自駕遊既朋友泊車 (交通容後再講).  行出門口, 就會見到出發起點既牌, 同埋有數字既指示牌, 只要你順號碼沿住指示牌, 由1行到去25就可以返番黎呢度喇.  不過出發前, 我地去搵大大大招財貓先.


常滑招財貓大道




由起點行過黎招財貓大道只需2分鐘, 呢幅牆上面一共有39隻不同形狀帶有不同意義既招財貓, 下面影咗幾隻比較得意既大家睇下. (可按圖放大)



咁隻大大大招財貓呢? 就係喺幅牆既上面喇!!

你只要搵條路上天橋就可以同佢影到相, 呢隻大招財貓高3.8米闊6.3米, 每日守護住常滑市既居民, 招多啲遊客黎常滑.


常滑古都風情散步街A路線

好喇, 我地行番去起點開始計起第2個指示牌, 向上山方向進發, 開始我地今集既尋找招財貓的故事.



喺呢條散步道, 你會經過好多售賣常滑燒既店鋪, 常滑燒係呢度出產既陶瓷既名. 有啲鋪仲會有見學班比你親手去試下陶瓷, 有興趣既朋友可以去常滑市觀光協會官網了解下同預約.










行到黎第7同第8站之間, 就會經過上圖呢間瀧田家, 呢度除左有廁所之外, 仲可以參觀下佢造船歷史, 當中部份展館係需要付費入場的.





過左第8站之後就會上一上黎呢條叫土管坂既地方, 呢度仲有個休憩處比大家坐下同去廁所.  至於呢條土管坂有乜特別呢? 首先, 佢既牆身係用左陶瓷筒去製成一幅護土牆, 防止山泥傾瀉.  但係護得幅牆, 個地下滑潺潺點算好, 當地人就好聰明又好環保咁, 將平時整陶瓷時候用剩既底, 界出黎造成上圖一個個圈黎鋪地下黎防扇, 古人既聰明又環保.











行到黎第13站, 呢度有個仲建在既登窯, 大家有興趣就仔細研究下佢喇. 




繼續沿住編號行, 沿途都有好多賣常滑燒既店鋪, 記住常滑燒唔係大阪燒, 常滑燒唔食得架, 仲識浮添!! 店鋪專登示範比你睇.








以上既鋪留番比大家慢慢行, 以下既景點就要介紹喇.


呢度係第24站 (即係尾站) 既景點, 叫一木橋.  你以為佢係一條橋無乜特別? 特別在呢度原本係一座山, 當年啲人先整好橋上面既路, 然後再鑿穿座山, 而形成呢條橋, 你話特別唔特別?

好喇, 最後送上常滑市區內特別既地點同鋪頭比大家睇下, 有時間又有興趣的話, 常滑係一個尋幽探秘既好地方.














招財貓冷知識!!!

1) 究竟招財貓係舉左手定舉右手?
答: 舉左手係招人緣, 舉右手係招財.  但係日本人覺得招到人就會有財, 所以大部份既招財貓都係舉左手的.
2) 不同顏色既招財貓分別代表啲乜?
答: 白色, 招福(幸運, 快樂); 紅色, 驅病; 黑色, 除厄運; 金色, 招財運; 粉紅色, 招愛情; 黃色, 招婚; 藍色, 招安全; 綠色, 招考試合格.



交通指南:



自駕遊既朋友, GPS請輸入電話號碼: 0569352033, 呢個係起點 "陶瓷器會館" 既電話, 呢度有個小停車場, 閒日免費任泊, 星期六日及假期日泊¥500.  如果爆滿的話, 沿住車路直落去 "大駐車場", 呢度星期一至日都收日泊¥500.

搭鐵路既朋友, 可以搭常滑線(等同名古屋中部國際機場線), 黎常滑駅, 落車沿上面地圖經招財貓大道行10分鐘就會到起點. 
名鐵名古屋站過黎, 特急車程約35分鐘;  而由名古屋中部國際機場過黎只需5分鐘!!! 記住, 係常滑站, 不是りんくう常滑站(臨空常滑站). 由機場過黎搭兩個站就係喇!!

名古屋電鐵 https://www.meitetsu.co.jp/cht/
常滑市觀光協會 http://www.tokoname-kankou.net/index.php


其他名古屋介紹, 請瀏覽>http://thatswhystravel.blogspot.com/search/label/%E5%90%8D%E5%8F%A4%E5%B1%8B

沒有留言:

張貼留言