名古屋篇 - 田縣神社 Tagata-Jinja (J神 / 巨根祭)

上一集, 帶大家去名古屋既小牧市參拜一間 "乳神" 為主題既廟 間間觀音.  今集去邊? 睇吓上面張相入面嗰支係乜? 無錯, 係 J神!! (泰國叫巨靈神). 上次乳神都唔淨係女士們先拜啦, 所以今集既 J神都唔一定係男士們去拜架喎, 其實佢有一樣野係主治18歲以上男女既, 究竟係乜? 繼續睇落去啦.

田縣神社

J神, 其實叫田縣神社, 同上次一樣, 呢度有大型停車場比你泊車.  入到去, 又會見到厄運年表.

同間間觀音係一樣既, 所以可以一次過黎拜晒兩間廟, 兩間廟都係喺小牧市內, 揸車既話兩間廟相差只係 5 分鐘車程.

上圖呢間就係正宮, 入面擺放左支巨根添. 不過當日入面有儀式, 所以唔方便影相. 再行入啲, 有得你摸龜頭添呀!

呢度除左供奉巨根之外, 你眼前仲有支龜頭比你摸, 摸下龜頭, 紅運當頭, 男女老幼都摸下佢喇. 但係下面張相既野你就唔好亂摸喇喎.

喺支龜頭既旁邊, 有呢兩粒蛋蛋. 如果你諗住生番件既, 就唔好客氣過去摸下粒蛋. 否則, 好似我咁, 影張相就好走喇, 傳聞一摸就中架喇.

拜完神, 一般都會買番啲御守既, 田縣神社既御守當然係巨根模樣架啦.

最後, 又到開估時間, 究竟呢間田縣神社咁男性向, 除左男人之外, 仲適合乜野人拜呢? 就係揸車既人喇. 因為田縣神社其中一個專科係交通安全祈願.  所以唔一定男人先拜得架.

田縣神社豐年祭

每年3月15日, 田縣神社都會舉行豐年祭, 一班男人會抬住支巨根 (直徑60cm, 長兩米) 遊街, 好熱鬧架!!

交通指南:

田縣神社位於小牧市, 由名古屋揸車黎約40分鐘車程. GPS請輸入電話號碼: 0568762906.  呢度有大型停車場, 不過豐年祭其間係暫停使用的. 到時要搭鐵路喇.

搭鐵路既朋友, 可以由名古屋轉兩程車, 黎到名鐵小牧線既 田県神社前站, 落車行過黎 5分鐘就到. 講番豐年祭, 2019年既豐年祭遊街既路線就係由熊野神社行去田縣神社喇.

田縣神社網頁>> http://www.tagatajinja.com/index.html

豐年祭 (愛知旅遊官方網站)>> https://www.aichi-now.jp/tw/spots/detail/70/#content_2

(註: 本文地圖取材自谷歌地圖)