伊勢神宮 / 托福橫丁 (おかげ横丁)

今日介紹既伊勢神宮, 日本人話一生人一定要去一次. 而我去完之後, 我都好想同大家講, 一定要去, 好值得去!!

伊勢神宮的正式名稱為「神宮」，位於日本三重縣伊勢市，由供奉天照大御神的皇大神宮（內宮）以及供奉豊受大御神的豊受大神宮（外宮）為主的125座神社所構成，其面積幾乎相當於法國巴黎。

在此一年內舉行約1,500場祭典，祈求皇室繁榮、國民平安及五穀豐收。

伊勢神宮除咗面積勁大之外, 佢既地位係超越晒全日本所有既神社, 所以伊勢神宮喺日本既社格制度 (即係神社等級)中, 唯一一間無被評級既神社, 利害未?  亦都係咁, 所以伊勢神宮可以簡稱自己做神宮. 但係其餘既神宮 (例如東京市既明治神宮), 都一定要講自己叫XX神宮, 無得簡稱.

講咗咁耐, 不如睇睇地圖, 感受下神宮有幾大先啦.

一般黎講, 想參拜神宮就先去外宮, 後去內宮. 而面積計, 外宮都係細啲既, 加上內宮除左大之外, 仲有一條托福橫丁 (我形容佢做古裝街) 比大家行街食野.  所以要留番多啲時間喺內宮呀.

伊勢神宮 (外宮)

首先介紹既係外宮, 從地圖可以見到, 外宮距離伊勢市站好近, 步行約5分鐘就到. 自駕既朋友仲簡單, 直接泊去外宮前停車場就可以, 免費泊車.

進入外宮, 係要行左邊通道入. 入口有個牌寫住 "左側通行".

入到外宮之後, 就會見到上面呢個牌, 跟住佢向右行就會去到外宮既正宮 (外宮同內宮都各有一個正宮的).

上圖入面就係正宮 (御饌殿), 裏面唔容許影相, 簡單話比大家知, 神宮係唔會有神像之類既野比你去拜, 內外宮加埋100幾個大小既宮都係呢啲好似一間間木屋咁既地方, 大家去到排住隊入去, 去到間屋既正門前就用番日本神社既參拜方式去許願 (即係鞠躬2次, 拍手2次, 再鞠躬1次), 然後我見當地人都會拋個硬幣出去許願.

土宮

風宮

多賀宮

其實我都唔明點解要圍住呢堆石, 但係見當地人個個都伸隻手出黎感受下佢. 好啦, 我又伸, 如果你感受到涼意既話, 即係你感覺到神既出現!! (我估)

隻馬係真架, 唔係公仔

伊勢神宮 (內宮) 之托福橫丁(おかげ横丁)

由外宮黎到內宮, 自駕遊的話車程約10分鐘, 距離大約係4-6公里, 唔算太遠但係又行唔到既距離咁啦. 因為順路既關係, 我會由托福橫丁 (おかげ横丁) 開始講起.

市內所有路牌都會寫係內宮定外宮. 唔用GPS都唔怕行錯路. 但係內宮遊客眾多, 宮外A1至A4停車場長期爆滿, 今次我要泊到去B6既市營停車場, 話明市營即係要比錢, 入閘攞飛, 出閘時入錢就可以. 無日泊, 好似幾百YEN一小時.

身處B6停車場望過去內宮, 係影都望唔到. 而河既對面 (右手邊) 係B5停車場, 多車到你唔信.

指示牌會教你去淺水區過河, 唔好亂過呀!

呢度就係過河既地方喇, 無水既. 但係好多石仔, 小心行.

過咗河之後一直繼續行, 行到眼前見到條橋, 就上橋轉右, 就會到達托福橫丁喇.

上面幅圖可以見到托福橫丁係一條上下兩個十字組成既行, 所以好易行, 最下面係剛才經過既天橋. 而左手邊就係內宮入口. 以下係托福橫丁既一啲特式鋪頭. (所有相片可按圖放大)

赤福係呢度既特產小食, 但係排隊超多人, 所以我連見都見唔到. 當地人話係甜點黎.

伊勢另一名產係龍蝦, 所以呢啲龍蝦餅要買多啲, 勁好食!!

呢條街有幾間賣松阪牛既, 大家一定要試, 好食到癲. 貴就貴咗少少, ￥800 (約$60) 一串.

除咗行街之外, 呢度仲有玩樂同休息既地方.

喺托福橫丁入面, 有十幾隻貓既藝術品, 有時間既大家可以依照上面個地圖搵番佢地出黎.

上圖係其中一隻貓.

攤位遊戲區

好多地方比你坐, 行到攰都唔怕.

呢度仲有表演添

講咗咁耐, 大家都肚餓啦, 帶大家食好野!!

表面上呢間伊勢角屋麥酒係賣酒既, 不過你只要行入去堂食, 即刻見到內有乾坤.

以上三張相, 淨係食環境都值回票價喇掛. 放心, 我介紹得唔會貴得去邊. 注文啦!

呢碗係半條鰻魚既鰻魚飯套餐, 大約¥1800 (約$125).

上圖呢個係牡犡餐 (全蠔餐), 左上角係燒蠔, 右上角係吉列蠔. 呢個餐約¥1500 (約$100).

實在太好食, 外加一碟燒蠔, 唔記得咗幾錢. 

伊勢神宮 (內宮)

行完托福橫丁之後, 要拿拿聲去內宮喇. (內宮收下午5點至7點左右, 視乎月份).  而入內宮首先會經過宇治橋, 跟外宮唔同, 外宮入宮係行左側, 而內宮呢度入宮係行右側架!!

宇治橋長約100公尺, 係聖界同人類凡界之間既分界處, 代表一過橋就去左聖界咁解.  呢條橋會因為式年遷宮, 每20年重建一次.

行到黎呢度, 就係買御守既地方, 再向前行同上百幾級樓梯就會到達內宮既正宮 (天照大御神).

上面就係正宮喇, 當然唔比影相啦. 當地人認為呢度係全日本最崇高的聖地, 係可以洗滌心靈既地方, 所以日本人一生之中一定要黎一次咁話.

式年遷宮

伊勢神宮每20年一次於正宮旁邊與其相同大小的土地上重建新的神殿，並重新訂製神殿內供奉的裝束、神寶，將天照大御神移駕到新的神殿。此祭典被稱為「式年遷宮」。式年遷宮前後約耗費8年時間，並同時舉辦30場以上的祭典活動。而式年遷宮除了內宮與外宮等兩大正宮以外，也會在14座別宮舉行。

第1次式年遷宮可追溯至距今超過1,300年前的第41代持統天皇時代（西元690年），2013年舉行了第62次式年遷宮。所以下一次遷宮就要等到2033年, 同時宇治橋亦都會因為式年遷宮而重建.

交通指南:

• 最方便當然係自駕遊啦, 由名古屋出發, 行收費既高速, 車程約2小時. 不過高速收費都幾貴, 一個單程都二百幾三百蚊港幣, 大約150公里左右. 
• 外宮停車場GPS請輸入電話號碼0596233323, 呢個係外宮前旅客服務中心電話, 去到外宮前請依照當時工作人員指示泊唔同既停車場.
• 內宮GPS請輸入電話號碼0596281150, 同樣地, 去到依照工作人員指示泊唔同既停車場.

• 搭鐵路.  由名古屋出發可以坐JR或者近鐵去到外宮 (伊勢市站), 車程約1.5小時, 票價約¥2000.  然後行5分鐘, 或者搭一個站巴士去外宮都得. (巴士可以搭51或55號線, 如下)
• 由外宮去內宮可以搭市內三重縣巴士51或55號線. 大約10分一班車, 車程約20分鐘, 車費為¥430.

註: 本文地圖取材自谷歌地圖; 本文部份文字及圖片取材自伊勢神宮官方網站.