拿來長島冰茶換我半晚安睡...., 呢個世界有好多長島, 淨係日本都有幾個. 不過, 長島度假村只得一個, 就係今集名古屋篇既其中一個好去處, 長島度假村又係一個親子遊既好地方, 呢度除左有Outlet比你血拼之外, 仲有個唔算太大但係有勁刺激既機動遊樂場比你玩, 年紀細啲既小朋友唔玩機動遊戲又可以去名古屋麵包超人兒童博物館&公園, 玩到攰, 呢度有埋酒店仲有溫泉, 夏天仲會開放埋水上樂園添. 講到咁仲要諗? 一齊黎玩啦!!
睇睇地圖先, 右上角係名古屋市, 左手邊窄窄長長既就係長島喇, 而長島度假村就係喺長島既最底, 所以搭JR係去唔到, 一般都係自駕或者搭直通巴士. 交通最後先講, 依傢由落車開始睇.
一入到黎, 係咪好大好誇張呢? 上圖左邊係遊樂場入口, 直去係Outlet.
 |
| 遊樂場入口 |
 |
| Outlet入口 |
MITSUI OUTLET PARK 爵士之夢長島
從相中可以睇到, 呢個Outlet係兩層高, 長條型既設計. (事實上係Y字型), 營業時間就有分冬天同夏天時間, 相入面未必作準, 想知既出發前上官網睇咗先> https://mitsui-shopping-park.com/mop/nagashima/tw/
睇住咁多相先, 相入面有兩間鋪係主打賣童裝, 話明親子遊, 所以專登影比大家睇下. 其餘常見既牌子, Nike, Adidas, Coach當然一定有. 搵食方面, 呢度都算多餐廳, 另外仲有上圖既Foot Court, 不論Food Court定餐廳, 以Outlet黎講呢度啲野食算平, 我直情覺得佢太仁慈, 例如Food Court食個拉麵都係¥800-¥1000, 真係好有良心.
講番血拼攻略先!!! 各位去到Outlet時唔好急買野, 要先去退稅櫃枱 (地下某一個鋪位內) 出示Passport去換一本Coupon先. Coupon係好多鋪頭都用得, 仲要係實實在在咁有折, 無古惑, 非常抵!! 除咗攞Coupon, 記得攞埋張地圖, 地圖好有用. 因為呢度既店鋪係分咗紅色鋪, 藍色鋪, 同其他顏色鋪. 分別就係, 紅色鋪可以做即場退稅, 藍色鋪就要去番退稅櫃枱退稅, 而其他顏色既鋪就完全無得退稅. 所以攞住地圖, 揀有得即場退稅既買咗先, 之後再行其他既, 就唔會整亂自己.
講番outlet既定位, 二樓主要係平民野, 例如Nike, Adidas同Wego呢類年青品牌同Food Court就集中二樓, 地面(一樓) 就係貴野, Coach, Agnes b., Vivienne Westwood等等. 以我老婆(血拼專家)既睇法, 佢話爵士之夢長島outlet仲大過沖繩既Ashibinaa同九州既Tosu Premium Outlets. 我覺得面積計一定係九州既大, 但係名古屋呢度係兩層設計, 其餘既得一層, 所以名古屋呢度多鋪啲都正常.
當然啦, 咁大個outlet一定有收費Locker, 收費為￥200 -￥400 (有小中大三個size Locker).
提提大家, 呢個outlet並不是免費泊車架!! 不過有泊車優惠, 詳情請睇埋落去交通指南.
Nagashima Spa Land長島溫泉樂園
行到黎上圖呢個地方就係遊樂場既入口喇, 左手邊係名古屋麵包超人兒童博物館&公園, 不過臨尾先講, 相入面右手邊就係售票處.
講下收費先, 佢同香港既海洋公園同迪士尼有啲唔同, 反而似以前既荔園, 淨入場唔包玩的話, 成人¥1600, 如果想任玩連入場的話就¥5000.
我就揀咗¥5000呢種, 你買飛嗰陣話 "Passport" 佢就明, 由於係任玩既關係, 佢會幫你綁番條手帶做記認, 每次排隊玩遊戲時show條手帶就玩得.
睇落好似好大, 其實由中間開始至左手邊摩天輪之間先係遊樂場範圍, 一日一定玩得晒.
跳樓機, 唔係錯覺, 真係高過海洋公園嗰個好多!!!
呢隻Viking係全場最高既海盜船, 有幾高?
喺摩天輪度影出去, Viking有間酒店咁高, 你話正唔正先?
呢隻海盜船真係要介紹下, 由於佢太大既關係, 所以佢係逢15分鐘開一次, 大家睇準時間去排定隊就玩得. 目測一行坐20人, 即係隻船可以容納百幾人. 剛才張相睇到啦, 佢上到最高, 成90度正角既時候有十幾層樓高, 向下衝既時候直情係跳樓機既感覺. 不過對我黎講係無感覺.
驚既朋友, 不如玩摩天輪啦, 呢個摩天輪夠晒高, 可以睇到晒全個遊樂場, 而上面藍色既過山車就仍在建築中, 預計2019年尾登場, 就咁睇就真係好長喇.
如果你同我一樣, 係勁鍾意玩過山車的話, 就一定唔可以錯過呢個創下世界最長雲霄飛車金氏世界紀錄的「鐵龍2000」. 你睇下張相, 就知佢有幾高, 至少有30層樓高, 然後一口氣衝落黎, 係非常刺激!!! 由於佢太高同太快, 所以好受當日天氣影響. 上圖佢列出咗當時既風速, 同排隊既時間, 我見佢要排45分鐘就去咗玩第二樣諗住轉頭返黎玩. 點知轉個頭返黎, 由於風速太快, 所以暫停無得玩, 人生呀!!!!
另外, 你見到有一個牌寫住5分鐘, 又係乜野黎呢? 呢度咁多種遊樂設施, 以三大過山車排隊時間最長, 平均都要45分鐘至90分鐘之間, 唔想排隊既朋友就可以¥1000特快玩一次! 係一次咋!! 所以真係要考慮吓幾時用呢張皇牌, 除非你大把錢, 可以每一個遊戲都比多¥1000.
介紹完鐵龍2000之後, 就要介紹埋三大過山車之一既「嵐」. 佢特別之處係個車箱會360度自由轉動, 所以就算一條直路都轉到你暈, 我就對呢個遊戲麻麻, 玩另一個激啲既!
呢隻懸吊式雲霄飛車「白色龍捲風ACROBAT」就真係夠晒刺激, 除咗佢夠長同快之外, 佢仲係懸吊式設計, 即係兩腳離地咁玩, 未夠激? 玩嗰陣佢張椅係會向後傾大約50度, 所以你個人就會好似超人咁頭向前腳向後, 飛住咁玩, 個個叫到七彩. 不過對我黎講, 又係無感覺. =.="
玩完激既, 玩飛車, 都唔錯.
呢個大朋友應該好熟架喇, 以前荔園叫佢做衝天宇宙船, 我當年未夠高玩, 依傢玩到喇, 感覺係.....海盜船我都未驚, 呢個好似搭巴士咁囉. 掉轉又如何.
呢度有鬼屋, 有興趣既朋友可以去撞下日本鬼.
飛天鞦韆就海洋公園都有啦, 不過睇真啲, 佢上到一半都已經高過晒海洋公園, 上到頂既話有20層樓高, 就咁坐喺木椅升到20層樓高, 嚇都嚇到你腳軟!!
想再腳軟啲既我介紹大家玩呢個, 我形容佢做跳樓LIFT. 坐喺部LIFT度升到頂, 之後L型咁落番黎, 落到底嗰陣你係訓左喺度, 都幾得意, 又無跳樓機咁高, 可以一試.
介紹番啲小朋友遊戲先, 嗰啲旋轉木馬, 小飛象就一定有架啦, 仲有夾公仔機, 同少量攤位遊戲槍GAME等等. 而最特別反而係上圖呢個....室內釣魚機!!! 佢得意在釣魚就釣魚啦, 但係玩玩下出面個大電視會有唔同情景出現, 今次就係大風雨喇, 之後枱上面個MON就變到好大浪, 好難釣魚, 啲小朋友就係咁叫, 啲大人就係咁叫小朋友落力釣, 一個好普通既仿真GAME竟然係最親子既活動, 你睇吓, 全部都係小朋友釣而大人企旁邊指導架!!!
夏天仲有水上樂園架!!!!
一入場既時候咪講咗, 唔買Passport既話, 可以齋比錢入場既, 咁玩遊戲逐個計幾錢? 三大過山車就每次¥1000, 已經係最貴既遊戲; 其餘小朋友玩既小飛象同旋轉木馬類就￥300 -￥500. 而第二貴既係飛天鞦韆, 每次¥800. 咁所以如果你係入黎陪小朋友玩的話, 買齋入場都得. 不過如果你個小朋友想玩三大過大車之類既刺激性遊戲的話, 佢係要求成人陪坐的, 所以你都要買Passport先掂.
講番入場時候既左手邊, 名古屋麵包超人兒童博物館&公園.
交通指南:
1) 直通巴士
睇落好似好大, 其實由中間開始至左手邊摩天輪之間先係遊樂場範圍, 一日一定玩得晒.
另外, 你見到有一個牌寫住5分鐘, 又係乜野黎呢? 呢度咁多種遊樂設施, 以三大過山車排隊時間最長, 平均都要45分鐘至90分鐘之間, 唔想排隊既朋友就可以¥1000特快玩一次! 係一次咋!! 所以真係要考慮吓幾時用呢張皇牌, 除非你大把錢, 可以每一個遊戲都比多¥1000.
 |
| 香港迪士尼無左馳車天地, 喺呢度可以補番. |
一入場既時候咪講咗, 唔買Passport既話, 可以齋比錢入場既, 咁玩遊戲逐個計幾錢? 三大過山車就每次¥1000, 已經係最貴既遊戲; 其餘小朋友玩既小飛象同旋轉木馬類就￥300 -￥500. 而第二貴既係飛天鞦韆, 每次¥800. 咁所以如果你係入黎陪小朋友玩的話, 買齋入場都得. 不過如果你個小朋友想玩三大過大車之類既刺激性遊戲的話, 佢係要求成人陪坐的, 所以你都要買Passport先掂.
講番入場時候既左手邊, 名古屋麵包超人兒童博物館&公園.
交通指南:
1) 直通巴士
- 直通巴士最方便, 唔駛轉黎轉去, 由名鐵名古屋巴士總站4樓22號月台上車, 50分鐘就到達, 車費單程成人¥1,060, 買來回就平啲, 每位¥1,900.
- 班次每小時約3至4班車, 所以都算密. 頭班車開08:00.
- 另外, 名古屋中部國際機場都有直通巴士黎呢度, 不過一日得三班車, 我都係建議大家出咗名古屋先方便啲.
2) 自駕遊
自駕既朋友, GPS請輸入電話號碼0594451111. 去到你會見到上圖呢個收費站, 無論你去遊樂場定outlet都好, 都係用同一個停車場, 收費亦都係一樣, 無時租, 日泊¥1000一部車.
即刻比錢, 無雞走, 比完錢記得拎番張泊車飛, 喺outlet買野有免費泊車退番比你.
由於停車場係超大既關係, 大家泊好車之後, 影定張相, 然後打橫行番出到行人路, 行人路有路標, 話你知呢度係邊一區同第幾行. 例如上圖就係D-5區喇. 咁你玩完返黎就知去番邊度攞車.
講番免費泊車, 喺outlet入面, 你會見到唔同地方都有呢啲咁既機, 唔識日文, 就咁睇漢字都估到佢係寫駐車場料金返金 (即係退錢啦). 全場任何一間鋪買滿¥3000 (即係二百幾蚊港紙)就有得免費泊車架喇. 當你買野比錢嗰刻, 你比埋張泊車飛佢, 佢會幫你張飛過一過機, 然後比番你. 之後你就搵上圖呢啲機, 入張飛落去, 就會即刻跌番¥1000比你. (註: 張車飛佢會食咗的) 唔駛擔心, 揸車離開不需要車飛!
實用網址:
MITSUI OUTLET PARK 爵士之夢長島>> https://mitsui-shopping-park.com/mop/nagashima/tw/
Nagashima Spa Land 長島溫泉樂園>> http://www.nagashima-onsen.co.jp/resort/download.html/
註: 本文地圖取材自Open Map
沒有留言:
張貼留言