我要講明先, 今集並不是廣告!! 我無收錢, 如果將來有人肯比錢我我又唔怕收. 今集帶大家去名古屋浸溫泉, 仲要係露天嗰隻!
拿, 係咪正先, 呢個係7色LED露天風呂, 由於呢間店位於半山上面, 所以望出去完全唔怕有人會睇到你, 無論男同女既露天風呂都可以安心咁邊浸邊欣賞名古屋夜景. 想知幾錢同點去? 繼續睇埋落去啦.
呢間竜泉寺之湯係連鎖店黎, 所以品質一向都有保證, 而2018年12月開始, 佢地仲喺名古屋既守山開咗呢間分店, 叫做天空Spa Hill. 以後去名古屋玩又多個好去處喇!!
黎得呢啲地方, 都一定要自駕遊架喇. GPS請輸入電話: 0527932601. 呢度自設大型停車場, 免費任泊. 我當時係晚上10點半左右去到, 諗住會無乜人, 點知都泊滿晒要兜一兩個圈先有位. 停車場大約有二百個車位.
講解下個收費同流程先:
- 一入到去, 第一件事係除鞋, 大堂有幾百個鞋Locker, 鎖完對鞋之後就赤腳行去售票位置.
- 好似搭JR咁, 大堂有多部售票機, 大家排隊買票就可以. 收費係成人每位¥700 (約$55) (如果想浸埋岩盤浴就另加¥500), 所有收費係不限時任浸, 你浸足一日都得. 開放時間係06:00 - 零晨03:00.
- 買咗票之後, 就會過入閘機, 之後就可以去沖涼再浸溫泉.
提提大家, 最好帶埋酒店條毛巾黎呢度. 否則要租毛巾又要比錢, 收費¥300, 包一大一細毛巾.
入完閘之後, 就會黎到呢個休息區, 呢度平時坐滿晒人, 有啲人訓埋喺度添. 而休息區既周圍就有幾間食肆, 食肆開朝七收零晨一點.
講完呢度, 大家當然好想去浸溫泉啦. 同平時既溫泉旅館一樣, 浸溫泉前先要沖涼, 所以由呢度開始, 男同女會分別去唔同既更衣室, 各自沖涼, 同各自浸溫泉. 呢度係男女分開浸的, 如果約左朋友既話, 就指定一個時間, 出番黎休息區度集合啦.
講番更衣室, 呢度有收費Locker比你用, 同香港既泳池一樣, 走既時候插番條鎖匙落去係會跌番錢比你既.
而沖涼既地方喺室內溫泉區. 沖完就可以直接行過去室內溫泉區浸架喇.
上面最底嗰張就係電池, 係有電既溫泉池, 我就唔敢試喇. 講番室內溫泉區, 大家睇到面積都唔細, 容納三四十人唔係問題. 我發覺室內池多數都係上年紀既人浸比較多, 所以浸咗一陣, 都係出室外睇吓.
一出室外, 最吸引就係眼前呢6個單人UFO缸 (官方叫: 美泡の壺), 好彩咁啱有人起身, 我就即刻跳落去浸, UFO缸最正係無人同你逼, 一個人浸飽佢. 而UFO缸既周圍就係不同既池, 相中間望出去, 最出既就係本文一開始介紹過既LED露天風呂喇.
呢個同樣望到街既池叫泡の湯, 官方話呢個池係用陶燒既板製成泡泡, 所以叫泡の湯. 呢個池好舒服, 啲泡好似按摩咁.
呢個叫露天炭酸泉, 明顯係話炭酸濃度高, 而呢個池講明係用天然溫泉水做.
呢度有兩個池既水溫係19至25度, 即係水風呂嗰啲. 其餘所有池水都係平均40度左右. 除左上面介紹嗰幾個之外, 呢度大大小小既池都有幾個, 留番比大家黎自己玩. 講番感想, 呢度一定無大陸人, 連香港人都見唔到個. 但係我又估唔到日本人咁鍾意山長水遠黎浸. 而浸既多數都係三五成群, 一路浸一路吹水. 所以佢地霸住個池浸好耐, 但係一走就成個池吉咗出黎. 不過當然, 只要夠位, 你照逼入去浸佢地無任歡迎. 日本人是優良民族!!
除左浸溫泉之外, 當然仲可以焗桑拿啦.
浸咗一個鐘溫泉之後, 個人真係醒晨晒. 當晚室外氣溫係1至2度. 我去既時候仲著住羽絨褸, 但係浸完之後, 係熱到褸都唔駛著, 就咁著一件T行去攞車. 真係行氣活血!!
以後去名古屋又多個好去處啦!! 邊個話名古屋好悶架?
註: 本文地圖取材自谷歌地圖; 本文大部份相片取材自竜泉寺之湯官方網頁
沒有留言:
張貼留言