北海道兩大Outlet

達思怪遊世界終於又開放多一個版圖, 今次去到北海道.  第一集, 先介紹下北海道既兩大Outlet. 

講解下個地理位置先, 一個Outlet較近札榥市, 另一個就較近機場. 所以去邊個Outlet就視乎你行程而定, 本文會有詳細既交通指南.

三井Outlet Park札幌北廣島 (Mitsui Outlet Park Sapporo-Kitahiroshima)

第一個Outlet係2011開幕既三井Outlet Park札幌北廣島喇, 由於佢係三井集團開既關係, 所以呢度比較有規模亦都較多知名牌子進駐. 例如Coach, Armani, Michael Kors, Polo Ralph Lauren, Nike, Adidas都應有盡有. 呢度由兩棟商場組成 (分別叫Clover Mall 四葉草, 同埋Maple Mall 楓葉) 當中Clover Mall主要係名牌, Food Court同食肆; 而Maple Mall就專賣便服及運動類, 例如Puma, GAP, Nike等等, 不過奇怪地Adidas係喺Clover Mall架喎.

上圖見到, 兩座商場係有行人行橋連接.  冬天落雪都唔怕, 好喇, 我地入場睇下.

同其他三井旗下既Outlet一樣, 入到去第一件事係去顧客服務中心, 出示Passport去拎番張購物Coupon. 呢個Outlet最好, 個顧客服務中心喺正入口.

呢間專賣T-Shirt既店鋪, 啲款又特別, 又唔貴. 買三件既話平均 ¥1,500 (約$110)一件咋!!

呢提多次, 呢間神戶元町多利亞係我既至愛, 超好食. 想知有幾好食既可以睇番呢度.

睇到呢度, 等我講下大家都應該好關心既退稅問題先.

大家喺你個地圖, 或者店鋪招牌下面都會見到上面兩幅圖既指示牌, 藍色牌表示你要行完街, 買晒野之後, 去番正門個顧客服務中心度做退稅, 好處係你可以集合所有藍色牌既單夾個總銀碼去退稅, 咁就容易啲超過退稅既下限¥5,000;  而白色牌寫明 "免稅" 表示呢間鋪可以即場做退稅, 好處係方便好多.

跟住我地去埋Maple Mall:

呢邊有免費BB車借用, 按金都只係¥100, 你入錢落部車度就可以拎佢出黎用, 用完推番埋去駁落前面部車度, 就會跌番¥100出黎比你.  另外, 呢度仲有個兒童天地免費玩.

交通指南:

今次我調番轉講, 由Outlet出番市區咁講解比大家聽.

 最直接來往Outlet同札幌市(狸小路) 既方法就係搭100號巴士, 不過100號巴士每日只係對開3班, 加上如果你唔係去札幌市的話, 可以睇睇上圖個介紹, 搭班次密好多既巴士去就近既地鐵站, 例如: 福住站,大谷地站甚至係JR北廣島站.

另外, 呢度亦有巴士直達新千歲機場, 班次約一小時一班, 車程30分鐘, 車費係¥1,000.

好, 講番市區去Outlet, 大家可以去JR札晃站前1號乘車處(即係近東急百貨)度搭100號巴士, 平日朝早第一班車係09:30, 第二班已經係12:00; 而星期六日及假期就好啲, 第一班車係09:00, 之後每一小時一班車直至14:00.

而如果你係住近大通或者狸小路附近既, 可以去南一条站上車.

為咗方便大家搵, 你認住大通地鐵第37號出口就係. 再簡單啲, 你行到去狸小路1段同2段之間嗰條馬路就係, 然後你再向大通站方向行幾分鐘就會見到.  100號巴士車程約40分鐘, 收費係¥310 (約$24). 

Chitose Outlet Mall Rera

Chitose Outlet Mall Rera係北海道第一個Outlet, 所以比較舊, 亦都無咁有規模. 閒日去少人到好似死城咁. 所以呢度最貴既牌子已經係Coach, 其餘就係ABC Mart嗰類既日本本地牌子為主. 不過呢個Rera Mall都有佢既好處, 就係近新千歲機場, 搭免費穿梭巴士過黎只需10分鐘, 由JR南千歲站步行過黎就幾分鐘. 點都好, 睇咗先啦.

Rera Mall係一個典型既露天商場, 所以一層過, 眼見咁多就係咁多.  我盡可能影晒一啲比較出名既鋪出黎架喇, 較為特別都係啲賣玩具既店鋪, 另外, 呢度有一間鋪係四驅車賽道黎, 係一間鋪咁大!! 另外, 呢度有個Food Court, 算係重點黎架喇.

交通指南:
基本上已經講咗, 大部份人都係由新千歲機場搭免費穿梭巴士過黎, 上圖可以睇到係半小時一班車, 車程約10分鐘.
又或者搭JR去JR南千歲站, 行過黎幾分鐘就黎到.
自駕遊既朋友, GPS請輸入電話號碼: 0123423000

北海道篇其他景點: 

北海道篇 - 狸小路 / 二条市場
北海道篇 - 小樽
北海道篇 - 旭川市旭山動物園
北海道篇 - 小樽
北海道篇 - 狸小路 / 二条市場
北海道篇 - 札幌市電 及 藻岩山
北海道篇 - 登別 / 登別地獄 / 登別伊達時代村



註: 本文地圖取材自谷歌地圖