北海道篇 - 小樽

喺札幌行行下街, 見有時間, 就走咗去小樽行下. 所以成就咗呢篇突如其來既小樽遊記.  本文最尾段, 當然唔少得交通指南啦.

先睇下小樽周邊地圖

從上面地圖可以睇到, 要遊覽小樽的話, 由JR小樽站一出, 向住海邊 (小樽運河) 方向行就可以. 以下由JR小樽站出發.

上文講咗, 一出火車站, 沿住呢條大馬路, 一路向海邊行啦.

小樽都通り

日本既每一個地區, 都總有一條購物街. 就好似札幌既狸小路, 熊本既上下通咁樣. 不過呢條通又真係悶咗少少既, 難怪旅遊書都無提過. 好, 又繼續向海邊行.

舊手宮線 (國鐵手宮線遺址)

呢個鐘真係會響, 仲好響添. 1983年平安夜喎.

呢度連柱都係用番路軌鐵黎造成

呢條國鐵手宮線沿自1880年, 呢條鐵路係來回札幌同小樽既貨運鐵路, 一直用到1985年先至停用. 當地政府為左保育, 就保留咗呢一段細比大家回味吓. 呢啲咪真保育囉.  

小樽運河

近運河旁邊, 有一個旅客服務中心. 入面有洗手間, 有小型超市同咖啡室. 不過要飲野梗係去運河啦.

平時大家睇落雪小樽運河相就多喇, 無雪既小樽運河係咁既.

當然唔少得遊船河啦.

北日本左手邊藍色幕就係上一張相遊船既售票處, 買完直接上船.

呢度係小樽運河食堂, 時間關係我無入過去, 大家可以去睇吓.

小樽運河周邊

首先要介紹吓, 呢度竟然有人力車坐. 雖然好似都幾貴, 不過未坐過既朋友一場黎到梗要試下啦.  我就 "睇" 人坐過, 原來唔止坐車咁簡單. 個車夫會車你去周邊既景點門口, 教埋你點擺post幫你影相, 其實都幾好服務.

一開始講過, 手宮線都有成百年歷史, 所以呢度周圍既建築物都列晒入古蹟, 你是但睇一座門口都會有個牌介紹佢係邊一年建成. 就好似上面張相咁, 佢寫住係藝術館入口, 但係其實佢係舊三井銀行小樽分行既原址. 對藝術有興趣或者鍾意影相既朋友, 小樽真係啱晒你.

順帶一提, 從一開始地圖度可以睇到, 小樽有一條小樽壽司通り, 壽司通入面有十幾間壽司店, 好似話是但一間都好平靚正. 時間關係我無去到, 大家去完可以返黎介紹吓. 

交通指南:

首先介紹下個地型先, 札幌既位置係小樽同新千歲機場既正中間, 所以搭JR時間都係一樣咁滯, 下圖紅色字就係急行班次, 而所有急行班次既總站就係新千歲機場, 所以調番轉, 如果你由新千歲機場出發, 所有急行班次既目的地都係小樽, 而札幌只係中途站.  另外提一提, 如果你驚無位坐既話, 呢條線既特急班次係會有一卡劃位既車箱, 叫 "U Seat", 不過當然要加錢, 每位加¥530. 而JR北海道既急行班次同各停班次都係一樣價錢既, 所以梗係搭急行啦.

睇完你都估到, 由小樽出發, 逢00同30分就係急行班次喇.

沿住海邊行, 啲自然風景好靚架.

呢度係其中一個中途站. 大家留意吓部出閘機, 出完係無路離開架喎, 究竟點解會咁? 千奇百趣好似講過, 大家想知答案既去Facebook PM我啦.

北海道篇其他景點: 

北海道兩大Outlet
北海道篇 - 狸小路 / 二条市場
北海道篇 - 旭川市旭山動物園
北海道篇 - 狸小路 / 二条市場
北海道篇 - 札幌市電 及 藻岩山
北海道篇 - 登別 / 登別地獄 / 登別伊達時代村

註: 本文地圖取材自谷歌地圖