北海道篇 - 旭川市旭山動物園

日本有兩大著名動物園, 一個係位於東京上野既上野動物園, 一個位於北海道旭川市既旭川市旭山動物園.  但係如果我話你知北海道嗰個動物園既入場人次仲多過東京嗰個你信唔信?  

唔講你唔知, 旭山動物園曾經因為動物集體死亡而差啲關門大吉.  好彩當時園長同飼養員唔放棄, 佢地當時主張 "行動展示", 即係遷就番動物本身生活習慣去設計唔同既園區比市民參觀.  有啲人話, 車, 咪即係野生動物園.  但係當你去完之後, 就知道乜野叫 "行動展示", 你亦都會明白點解一個咁偏遠既動物園竟然做到日本第一.

旭川市旭山動物園

黎到旭川市旭山動物園門口, 當然有售票處, 每位¥820 (2019年10月1日前既價錢, 10月1日後日本加消費稅)

旭山動物園話大唔大, 話細都唔細, 大約一個維多利亞公園再大少少咁啦. 我當時選擇逆時針行, 即係上圖地圖既右下角開始向右上方行, 第一站會係企鵝館.

一行入去企鵝館, 即刻感受到 "行動展示" 既威力, 首先係有一條透明既隧道, 等你可以喺隧道入面睇住啲企鵝喺你頭頂游過.  當你上到二樓, 就可以近距離接觸地面既企鵝喇.

而另一個 "行動展示" 既方法, 就係喺每一個園區入面, 都有上圖既玻璃罩, 你企喺個玻璃罩度望出去, 就係動物活動既地面高度, 所以可以好近距離咁接觸佢地, 而又唔會影響佢地生活.  而呢一點正正同野生動物園坐住部車去睇動物既最大分別. "行動展示" 可以做到你有你睇, 佢有佢生活既模式.

香港既海洋公園睇小熊貓係喺個室內睇既, 呢度啲小熊貓喺戶外活動, 仲有得爬真樹, 同喺你頭頂行天橋, 自由自在得多.

搵唔搵到隻貓頭鷹?

企喺展覽館入面望出去, 水面水底都可以一次過睇晒.

由於北海道地區冬天好大雪既關係, 所以園區入面有好多休息室比大家坐下同取暖.

餐廳黎講, 就只此一家. 價錢算平, 味道就唔知喇, 我無食過.

最後提幾樣野, 由於有部份動物怕凍既關係, 園區有分夏天開放時間同冬天開放時間, 而戶外既動物亦可能會搬入去室內園區. 所以冬天黎同夏天黎睇動物會有少少分別.  另外, 由於冬天會落雪, 而北海道必定係厚雪既關係, 每年12月至3月期間, 啲企鵝會走晒出黎玩巡遊, 好似話好好睇, 好得意. 有興趣既朋友上官網留意下喇.

交通指南:

旭山動物園距離JR旭川站大約50分鐘車程. 大家可以由JR旭川站搭巴士直達旭山動物園, 每一個鐘大約有兩班車, 班次如下:

自駕遊既朋友, 呢度有免費停車場, GPS請輸入電話號碼: 0166361104

北海道篇其他景點: 

北海道兩大Outlet

北海道篇 - 狸小路 / 二条市場

北海道篇 - 小樽

北海道篇 - 狸小路 / 二条市場

北海道篇 - 札幌市電 及 藻岩山

北海道篇 - 登別 / 登別地獄 / 登別伊達時代村

註: 本文地圖取材自谷歌地圖