北海道篇 - 登別 / 登別地獄 / 登別伊達時代村

由於日本好多火山既關係, 所以有好個地獄, 好似九州既別府地獄. 而北海道就有登別地獄. 除咗登別地獄之外, 我仲會介紹我住既一間和式酒店同埋忍者村(登別伊達時代村), 今集內容非常豐富, 繼續睇落去啦.

登別

睇咗兩幅地圖先, 登別喺札幌既西南方約2小時車程既距離. 而登別地獄/ 登別溫泉街以及登別伊達時代村都係喺同一條行車路上面, 所以唔怕揸錯路, 一條路揸到底就係. 首先介紹下酒店.

清水屋係一間幾出名既溫泉酒店, 上圖可以睇到佢係和式房間, 夜晚佢會入黎幫你鋪tatami (榻榻米)架喇, 唔駛擔心呢個問題. 間房都算大, 有廳有房. 呢度有一個室外溫泉同一個室內溫泉, 係男女分開的.

登別溫泉街

呢條溫泉街同一般既溫泉街一樣啦, 都係食肆同手信鋪為主, 仲有間遊客中心添. 而當晚我地係食咗上面魚生飯嗰間, 去得北海道唔食魚生有冇搞錯. (其實日本邊度我都係咁講. 呵) 另外, 北海道既牛乳當然係名物, 所以牛奶同雪糕類既野大家都唔好錯過. 而講到地獄, 大家諗到啲乜? 會唔會諗到審判?

呢個機械表演都幾得意, 每日指定時間就會對人類作出審判. 而佢個樣亦會由原本好慈祥變成惡魔, 究竟係點變? 你黎睇吓咪知囉.

登別地獄谷

如果係過夜既旅客, 一般都係喺酒店放低完行李之後步行前往地獄谷既, 由溫泉街行過去大約10分鐘左右. 而去地獄谷之前就會經過以下既泉源公園.

呢個泉就利害喇, 佢每三小時就會噴發一次, 每次50分鐘左右. 而每噴一次就會噴出約2000公升水, 而水既溫度係達到80度咁熱, 所以行埋去係好暖架!! 好彩當日佢咁啱噴發緊, 我仲拍埋片比大家睇.

好, 繼續去地獄谷.

呢塊石頭叫題目石, 唔知點解, 不過係景點之一.

呢度係遊客中心, 有野飲賣亦有小量紀念品賣, 旁邊有洗手間, 去完就可以出發, 地獄谷入面無洗手間架喇.

呢度有幾段唔同既步行路線比大家揀, 要行晒佢都要個幾兩個鐘, 我行最短嗰條算, 10拎分鐘. 睇到鉄泉池同藥師如來就算.

呢個係藥師如來. 當然係有段故架啦, 大家黎到睇下塊版寫乜啦.

叫得地獄谷點止咁簡單呀?  呢度每晚六點後就會點燈, 變成鬼火之路, 每晚開到晚上九點半. 而六七月期間仲會有地獄谷鬼花火活動添.

我知我影得唔好, 所以影埋官方張相比大家睇. 由於呢度係地獄谷, 所以如果好凍天時黎既時候, 就會因為泉水同地熱而令到周圍煙霧瀰漫, 再配合埋燈光效果, 就會令你好似好行緊地獄, 周圍有火有煙圍住你既效果. 係好得意既體驗.

登別伊達時代村

黎到登別, 梗係要參觀埋呢個登別伊達時代村 (忍者村) 啦. 內容就同一般既忍者村無乜大分別. 都係有啲機關同忍者表演比大家睇咁樣, 不過忍者表演的確係睇幾多次都好睇既. 又因為登別地獄既原故, 所以呢個忍者村加入咗妖怪既原素, 即係忍者打妖怪啦. 大家睇咗相先, 我陣間再講吓表演.

先講入場費, ￥2,900一個人, 入面有4個不同既忍者表演, 最好睇梗係忍者屋同埋戶外嗰個打鬥表演啦.

一眼睇晒, 唔算太大, 有野食有灘位遊戲.

鬼屋當然係設施之一.

講番啲好玩既野喇, 下面就係其中一個遊樂設施, 忍者怪之迷路. 就好似平時大家玩過既逃出遊戲咁, 你要搵路, 拆解唔同既機關, 仲有啲下面張相嗰啲打斜既屋影響你感官, 係幾好玩既, 不過香港人都應該玩過晒逃出遊戲, 所以玩呢個容易到不得了, 但係我前面個日本人我玩完都未出得番黎.

跟住講吓表演, 首先講室內表演. 同之前介紹過日光嗰個忍者表演一樣, 都係間屋同地板上面有唔同既機關, 所以佢地可以彈出又彈入咁啦, 而最精彩既係, 呢個忍者表演係有現場Matrix既效果!! 喺打鬥既過程, 突然間, 全個場既射燈會變成一閃一閃, 而台上既人就會以極慢動作咁打落去, 呢個細心位演繹得相當好, 完全好似睇緊戲咁, 不過係現場版喎, 所以呢個表演必定要睇.  另外, 入場前佢地會每人派一張正方形既白紙比你, 究竟有咩用既呢? 原來係比你喺完場謝幕既時候, 用白紙包住啲錢拋上去個台度做打賞用架.

睇完室內到室外喇喎, 室外地方大啲, 當然可以玩埋火同威也啦.

登別伊達時代村 >> http://edo-trip.jp/tw/

北海道篇其他景點: 

北海道兩大Outlet
北海道篇 - 小樽
北海道篇 - 旭川市旭山動物園
北海道篇 - 狸小路 / 二条市場
北海道篇 - 札幌市電 及 藻岩山

註: 本文地圖取材自谷歌地圖