達思怪遊世界 ThatsWhy's Travel: 二月廿九

二月廿九, 係viuTV喺2020年2月播出講穿越既電視劇, 內容係: 張麗紗Yeesa（吳海昕飾），2月29日出生的平凡少女。2017年，Yeesa於2月28日為自己慶祝生日，在11時59分一刻，竟然穿越時空，來到天寒地凍的北海道，過程中遇上和她未來命脈相連的兩個男人－馬智浩Ryan（徐天佑飾）與余家聰（劉俊謙飾），兩個香港男生都不約而同地聲稱與她相識。24小時過去，Yeesa穿越回到香港，現實卻只過了一秒鐘。Yeesa發現自己的穿越能力不由自主，而她竟然在現實裡重新認識Ryan及家聰……命運的齒輪在靜靜地轉動著……(轉節自viuTV網頁 https://viu.tv/encore/leap-day)

順手記念吓, 喺2020年頭, 全世界出現咗武漢肺炎, 而北海道係其中一個重災區, 所有人由北海道返香港後係要強制隔制14日. 所以就算大家睇完套劇想去朝聖都好, 我諗都要一兩年後先可以出發. 今集就等我用Google街景, 帶大家重溫吓劇中場景啦.

市電站

第一集既時候, 女主角Yeesa由香港穿越黎北海道既呢個車站. 呢個地方大家都應該估到啦, 就係ロープウェイ入口駅, 呢個站係前往藻岩山既車站, 所以好多人都必定去過. 當我睇第一集既時候, 我仲以為呢個站既名 "入口" 或者 "藻岩山" 有啲乜野神秘力量所以可以喺呢度穿越添. 結果當然係我諗多咗啦. 順手介紹多一次藻岩山, 佢係日本三大夜景之一黎架, 所以去北海道必定要去. 想知其餘兩個夜景係乜? 想知點樣去ロープウェイ入口駅? 想知點坐札幌市電? 入去呢篇文章睇吓啦>> http://thatswhystravel.blogspot.com/2019/12/sapporoshiden.html

上白石橋

第二集一開始, 離開咗醫院之後, 余家聰就帶住Yeesa喺呢條橋上面跑, 呢度就係...

位置: (https://goo.gl/maps/P4aajyaftiwGRQyM6)
條橋都寫明係上白石橋, 其實真係橋一條, 無乜特別好介紹.

酒店

第二集同第六集都出現過呢間酒店, 即係余家聰帶Yeesa暫住既酒店. 大家如果去Google街景睇既話, 係下面咁樣既:

其實你放大啲張相睇吓個招牌就會睇到呢度係Sapporo Tobu Hotel, 由於Google街景係2019年4月, 而套劇係2019年尾2020年頭拍既, 所以劇入面既場景係最update既. 即係相信已經裝修好喇, 而網友話, 呢間酒店將會改名為Fairfield by Marriott Sapporo, 不過我去咗好多個酒店網都搵唔到呢間酒店, 估計要遲下先落成.
位置: (https://goo.gl/maps/vkhTkYu8bkGqUqrV9)

好近二条市場, 行幾步就到.

二条市場

第二集, 當余家聰離開咗酒店之後, Yeesa就落街周圍行吓, 而按真實既地圖黎講, 的確係會去二条市場 (或者狸小路)既. 二条市場咁出名, 我唔多講喇, 反正我個Blog有詳細介紹, 想知點去同有咩野食既就參考>> http://thatswhystravel.blogspot.com/2019/11/Tanukikoji.html

順帶一提, 到第六集既時候, 余家聰搵路既呢個地方, 就係二条市場同酒店之間喇. 你喺張相入面見到札幌電視塔既大概都估到.

便利店

第二集開始, 第五集同第九集都出現過呢間便利店. 好明顯呢間係Sellers (大谷地店). 下面係Google街景既樣.

位置: https://goo.gl/maps/8KfzK1ZomnA67dFu6

但係唔知你有冇留意, 喺第五集, 即係Yeesa第二次穿越, 拎住部CAM周圍拍嗰一次, 未入門口之前嗰一秒, 間便利店有啲唔同? (見下圖)

細心睇下喇喎, 首先, 玻璃嗰條廣告帶唔係藍色, 而係7-11 Logo, 而玻璃出面竟然有部札幌市電, 明明上面間Seller唔係喺市電範圍內既. 另外, 枱面少咗塊黑版仔, 畫咗隻比卡超嗰塊呢. 但係全套劇, 呢間便利店只係出現咗呢一秒咁大把, 之後所有既鏡頭都係喺上面講嗰間Seller度拍既. 咁...呢間7-11喺邊呢? (Google街景如下圖)

位置: (https://goo.gl/maps/7sf1JfxcyMtheLse6)

呢間7-11喺電車事業所前駅旁邊. 一落車就見. 而呢個站就係喺ロープウェイ入口駅附近, 我估計係當初拍完Sellers之後, 發覺唔夠shot要補, 就去咗呢間7-11度偷偷咁拍.

大電視

都係第二集, 當Yeesa望住呢部大電視睇新聞. 呢個位置唔難估, 睇下面Google街景你就知你都會經過.

位置: (https://goo.gl/maps/pAVGJU6azMfb7Lwy7)

無錯喇, 呢度就係狸小路過少少既PARCO對面.

札幌電視塔

呢套劇我其中一個鍾意既地方, 就係佢拍得好日劇, 好識攞啲係人都識既景點去美化套劇. 札幌同東京, 大阪, 名古屋等等都一樣, 都係有個著名電視塔去發放電視台訊號, 例如東京鐵塔, 通天閣等等. 但係, Yeesa企既呢個地方又喺邊呢? 請睇以下Google街景.

位置: (https://goo.gl/maps/CTULK5AqBMTNeECC6)

其實佢係喺札幌電視塔正對面既一條行人天橋上面.

美春湯家族風呂

一跳去到第五集. 呢個係一個寫到明既場景 (美春湯家族風呂), 我無去過. 去得札幌想浸下水既梗係去登別溫泉啦. 詳見登別溫泉篇>> http://thatswhystravel.blogspot.com/2019/12/Noboribetsu.html

以上係Google街景. 位置: (https://goo.gl/maps/ma5s2ihUbHdSvKSD7)

多賀神社

去到第六集, 余家聰去咗一間神社度問下個御守既故事, 到第七集時, 就會見到上圖既畫面, 個燈籠寫到明係多賀神社. 但係可能你會問, 明明第一張相係札幌護國神社黎架喎. Google街景如下:

位置: (https://goo.gl/maps/tJWEpdkUWX3ks4Xs5)

唔駛奇怪, 呢度只係喺同一個公園入面有兩間神社啫, 包括札幌護國神社同埋多賀神社. 呢兩個神社我都無去過, 所以不如溫故知新下啦, 全日本最多神社既地方就係愛知縣（名古屋）. 名古屋有大大小小專科神社, 包括曾經介紹過既乳神同J神. 想知乳神同J神係主治邊一科既話, 去下面文章重溫吓啦:
名古屋篇 - 間々観音 (間間觀音) Mamakannon (乳神) >> http://thatswhystravel.blogspot.com/2019/03/mamakannon.html
名古屋篇 - 田縣神社 Tagata-Jinja (J神 / 巨根祭) >> http://thatswhystravel.blogspot.com/2019/03/tagata-jinja.html