2019年3月19日 星期二

名古屋篇 - 間々観音 (間間觀音) Mamakannon (乳神)


唔講你唔知, 全日本最多寺廟/神社既地方, 唔係京都, 而係愛知縣 (名古屋), 愛知縣有超過8000間寺廟及神社, 可想而知愛知縣人有幾迷信.  亦都因為咁, 呢度有好多 專科寺廟/神社, 今日先帶大家黎名古屋 "與神 (乳神) 同行".  黎得搵乳神, 你梗係以為佢既專科係女士們啦.  無錯!! 係啱一半, 呢間廟仲有一個功能, 睇埋落去你就知架喇.




呢間廟其實係供奉間間觀音菩薩, 一般黎講的確係女士們黎參拜多既.

為咗大家身心著想, 我專登影咗呢張相比大家睇, 呢張相係2019年影既, 不過年份並唔重要, 大家可以集中睇歲數就得架喇. 牌上面寫住既歲數都係厄運年, 黎呢度拜一拜就可以逢凶化吉.






首先教大家點樣去拜啦.  當你行到入廟之後, 你就會見到上面呢一座塔, 喺塔既旁邊有個架放左啲湯勺, 然後你就要順時針幫塔上面既觀音沖涼 (淋水).  之後就去到下面既戲玉部份喇.





首先, 呢度有個石乳房, 你可以摸下佢許願, 而石既下方係上香既香台. 之後就行上去廟度. 上面唔容許影相, 所以我用文字講解比大家聽. 首先, 上到去之後係由左至右咁參拜, 同埋係要除鞋的. 

由左至右咁講, 首先有個, 一如所有日本既廟, 你要敲個鼓等神知道你黎咗, 之後好似係有對石乳房, 你當然要摸下佢同許願, 再向右手邊行會見到一座菩薩, 菩薩面前亦有對石乳房. 如是這, 就完成整個參拜. 

最後, 大家可以買啲繪馬同埋御守黎傍身, 如果大家放大張相黎睇下既話, 呢度啲繪馬係一對乳房既樣黎架!



好喇, 開估喇, 呢間廟究竟係主治乜野既呢? 首先唔少得既有女士們既健康, 有BB既就求安胎同順產.  另外, 就係為子女參拜既, 求子女健康, 讀書聰明, 考試成功都可以. 
提多一句, 寵物佢都當係子女既, 所以呢度有寵物御守賣, 相當難得.  所以無論係想生B, 定已經生咗B既朋友, 都值得黎呢度一拜.

交通指南:




間々観音 (間間觀音) 位於小牧市, 所以都係自駕啦, 自駕遊既朋友請於GPS輸入電話號碼: 0568736173, 呢度有停車場, 約有十個位左右, 但係完全免費.  一般日子黎都會有位架喇.  由名古屋揸車黎大約40分鐘.

如果你唔識揸車既話, 就唯有由名古屋名鐵小牧線小牧站再轉的士. 或者再平啲可以搭小牧市役巡迴巴士11號線, 由小牧站開出, 約一個鐘一班車, 搭到去"間間乳觀音前" 站落車行8分鐘就到, 車程約13分鐘, 車費係¥200.


(註: 本文地圖取材自谷歌地圖)

沒有留言:

張貼留言