大嶼山自駕遊

今日唔係去日本, 又唔係去台灣. 留番喺香港玩自駕遊.

想玩大嶼山自駕遊, 仲難過搶平價機票. 首先, 你要一早七點正登入以下網站搶許可證. 每日只會派發25張證, 當中仲有5張係電動車專用, 即係汔油車得番20張證咋. 

想知大嶼山自駕遊既必搶申請攻略, 請睇泊邊好文章:
Parkbin.hk/permit

當你成功搶到許可證之後, 政府會郵寄張證連同一張大嶼山自駕遊駕駛者須知既小冊子比你. 好方便, 唔駛去拎. (2020年開始, 小冊子要上網睇, 唔會再寄黎)

行證車大家都知啦, 放喺車頭等人查. 而小冊子就係一張地圖, 地圖上面有唔同地方既車位數量.  難得可以揸車入去, 當然要去啲平時搭巴士唔會停留既地方啦, 第一站係一個無沙既沙灘, 上長沙.

上長沙

上長沙呢度真係好神奇, 明明係個沙灘, 但係因為大浪既關係, 啲海水浸到上救生亭度. 呢張相已經潮退既時候影, 如果潮脹既話, 連樓梯都見唔到, 你話係咪千奇百趣?

而去得上長沙, 一般都會去埋下長沙既. 下長沙係一個好長既沙灘, 仲有幾間餐廳食肆. 大家平時睇相見到人地望住個沙灘食野既就係下長沙喇.

石壁水塘

跟住大家一定要黎呢度影張相, 無論點影都咁靚, 呢度就係石壁水塘. 呢度附近無錶位, 要泊就學我咁揸入去水塘邊個平台仔啦. 影完相就出發上大佛.

天壇大佛

天壇大佛呢度既車位就係喺巴士總站旁邊, 放心啦, 成個大嶼山有路牌既地方, 都加設晒 "P" 字既停車場指示牌, 好清楚的. 呢度大把位, 無人同你爭, 唔駛驚無位, 唯一特別既係, 全個大嶼山, 得呢度係要比錢入錶, 就連大澳同埋梅窩都係免費泊車的, 你話奇唔奇?

去得大佛, 除咗食齋, 當然唔少得去心經簡林. (TVB劇集踩過界2就係喺呢度拍架)

跟住落黎, 當然會順路去埋大澳, 大澳個停車場係喺平時大家上落巴士個巴士總站附近, 去到你就見到架喇. 呢度車位都尚算充足, 不過如果真係唔好彩無位既話, 你可以泊入去屋村入面, 村入面都有個停車場. (都係露天既, 其實全個大嶼山既車位都係露天架喇, 夏天去曬死)

大澳

左手邊係大停車場入口, 右手邊係大澳巴士總站. 呢度係免位泊車位無需入錶, 亦都無安裝咪錶.

呢間茶果鋪係無招牌既, 佢無開門既日子你完全唔知佢係賣茶果. 呢間啲茶果超好食, 有花生同眉豆味比你揀. 佢不定時開, 賣晒就收鋪.

大澳啲貓好黐人, 隨街都有貓同你玩

你估你跳到二樓咁高我就影你唔到?

貝澳

如果你覺得你手車唔錯, 而又勇於探險既, 大嶼山好多唔似行車路既路可以比你去發掘. 例如下面呢條車CAM片, 帶你去貝澳天后廟.  唔係揸住部Smart都唔敢入去. 越行越窄.

最後, 當然要去埋梅窩, 雖然梅窩大家都去慣去熟唔駛我多介紹, 不過全個大嶼山自駕遊, 最難搵位既就係梅窩. 你一去到, 本身村民既車已經泊晒上行人路, 可想而知你想搵個位係有幾難. 一般黎講, 我會介紹大家去梅窩碼頭旁邊泊收費既爛地停車場, 好平, 只需$8一個鐘.  如果你唔介意行既, 可以再去遠少少教堂旁邊有個大型咪錶場. 不過我試過, 未必有位. 

梅窩

呢個係無人店. 你泊完車之後行過黎自己按制取票 (見下圖). 攞車走既時候, 就好似自助超市咁掃一掃八達通機旁邊部掃瞄器, 然後拍八達通比錢就得.

(2020年3月3日新增行程)

梅窩瀑布

如果你放大張相黎睇, 條柱係寫住 "咖啡, 奶茶" . 呢度以前係士多黎架.

要去梅窩瀑布有兩個行法, 比較舒服既行法就係由梅窩街市嗰邊, 沿白銀鄉方向行, 呢度沿路都係平路, 踩單車去都無問題. 由梅窩街市停車場出發去到梅窩瀑布, 步行約20分鐘, 踩單車約10分鐘. 

過咗白銀鄉少少就會見到呢間文武廟. 再行前多少少就會去到上幾張相既奧運徑, 再沿指示牌行就會到梅窩瀑布.

唔知叫好彩定唔好彩, 由於呢幾日都好好天無落雨, 所以你係可以行入去個瀑布底好似我咁周圍影相. 佢真係有樓梯比你行出去, 唔係我夾硬黎架. 不過當你行到出去時當然要小心啲. 而唔好彩既係, 由於太好天, 所以好似無乜水比你感受到瀑布既威力. 所以我補番張官方相你睇啦.  睇完瀑布唔好走住, 再向山上面行多幾分鐘. 就會到梅窩銀鑛洞.

個洞行到最入都係咁啫, 我專登打光咗比大家睇吓入面係點樣既.

後記:
1) 由於限額既關係, 全條路都唔多車, 直情可以用無車黎形容. 
2) 我原本以為東涌道係最難行, 但係原來羌山道先至係最難. 原因係東涌道夠闊又直, 起碼部車可以上三波慢慢行. 但係羌山道全部都係盲眼彎, 條路又勁斜, 斜得黎你一比油, 對面線就有部巴士衝住落山兼食埋你條線. (大家有喺車谷睇過片都知啲巴士幾衝得架啦) 於是我全程上山都要一波二波咁上上落落, 未到大佛前, 水溫燈已經著住100度, 對部車既考驗極大.
3) 除左嶼南道 (約長沙至塘福) 一段既車速限制係70之外 (已經全部改晒做50), 大部份路段都係行50. 至於大家最擔心既測速相機位得一個, 仲要係限速30公里既路段!!! 梅窩出黎東涌/大澳的話, 見到30呢個路牌開始要小心, 雀籠喺一條大落斜最底近貝澳老圍村. 個雀籠比啲樹遮住晒, 好隱閉的! 而由東涌/大澳去梅窩的話, 調番轉貝澳上斜, 上到頂平地既時候, 左手邊就會見到大大個橙色雀籠, 呢個明顯好多.

其他自駕遊文章：
港珠澳大橋半自駕遊
沖繩自駕遊（附國際通泊車教學）