沖繩自駕遊

去年為大家介紹左點樣搭巴士遊沖繩, 今年我終於有車牌喇, 可以親身教大家沖繩自駕.

沖繩有幾間出名既租車公司, 包括OTS, Toyota或者Nissan自家租車. 當中, OTS係有免費穿梭巴士來往沖繩機場同埋租車公司的. 即係你一落機就可以即刻租車, 唔駛拎住行李轉黎轉去, 係幾方便既. 不過因為KKDAY有特價, 所以我今次租左上圖呢間Paradise Rent A Car. 仲正, 因為佢有專人舉牌接機, 連等穿梭巴士既時間都慳番.

租過車既朋友都知道, 你只可以揀種類, 無得指定車款的 (貴價PLAN除外啦). 今次抽中呢部Nissan Note, 唔好揸既, 上次租Mazda 2正好多.

GPS教學

首先教大家用GPS, 雖然每部車既GPS牌子都唔同, 但係用法都係大同小異.

首先係揀目的地, 最方便係入電話號碼. 絕大部份既景點/商場/食肆既電話佢都認得到. 另一個常用既方法就係用MAPCODE, 不過呢個方法一定要你手中有旅遊書先有用.

介紹個好方法比大家, 只要你上Google Map打你想去既地方, 例如 "萬座毛", 就會有目的地既電話, 有時呢個電話會係附近既停車場 / 管理處之類既電話, 不過唔緊要, 照入落部機度試下, 一樣去到目的地的. 另外要提提大家, 沖繩既電話係"098" 字頭的, 所以如果你上網搵到啲電話係好似上圖咁 "+81 98-966-1280" 的話, +81 大家都知係日本字頭啦, 所以入GPS時就應該入 "0989661280". 記住喇!

當你入左電話號碼之後, 佢就會顥示目的地, 你只需要按 "前往此處" 就可以.

之後, 左手邊就會顥示距離, 所需行車時間同埋料金. 料金係"$0" 既話, 即係呢段路唔需要行要比錢既高速公路. 順手講埋行車時間, 呢個時間係會計埋塞車同車速上限等等既因素, 所以係準過Google Map好多. 我好多朋友去旅行之前, 上Google Map睇過行車時間, 去到先知原來分分鐘要用多一倍時間的. 呢點要留意呀! 
最後, 按 "開始導航" 就可以開始揸車.

上圖呢個例子就係我每日一來一回酒店既行程, 留意下料金係￥1020, 即係行IC高速啦.

不過咁, 部機其實有個功能, 係可以不選擇IC高速的, 就係上圖既第二項, "有料道路使用條件", 你只需要揀 "回避" , 佢就會重新提供行車路線比你, 熟路既朋友都知道, 即係行國道58啦, 要兩個幾鐘架!

車速教學

個個都想知道, 究竟喺沖繩揸車既車速上限係幾多? 等我話比大家知啦, 其實你只要行路牌既上限加20公里就岩架喇. 例如市區路牌係寫40的, 咁你行60就差唔多架喇. 全沖繩車速最高既道路就係IC高速, 車速上限係80, 所以你行100就岩. 

另外提提大家, 由那霸市行IC高速入名護之間有5個相機位!!

1, 浦添隧道前 (未上IC高速架!!)

2, 西原IC出口前

3, 嘉手納IC出口前

4, 宜野座IC出口前

5, 過左許田收費站之後海邊大路

相機好似一個龍門架咁, 白色鐵造的, 橫誇埋對面行車線, 鐵架上面每條行車線都有一支CAM影住你 (仲有紅外線添夜晚都睇到你架). 不過大家只要跟我所講, 行車速上限加20, 係無事的. 當地人都係咁上下速度. 不過當然啦, 每個地方都有車手既, 如果你見到當地人飛車你又手痕痕既話, 人快你就快, 人慢你即刻慢就得架喇. 點究竟點分自己人(自駕遊) 定當地人? 車尾有貼紙.

只要你見到對方車尾有呢種磁石貼紙既話, 就即係自己友喇.

國際通泊車教學

沖繩有樣好, 個個景點都有得免費泊車仲要超多車位唔憂泊. 但係市區就唔同喇, 好似國際通咁, 只得收費停車場. 但係咁多個停車場, 邊個最方便邊個最抵?

記住!! 國際通入面呢種自助泊車停車場千萬不要泊!! 因為每20分鐘￥200, 即係￥600一個鐘, 仲貴過皇室堡!

介紹兩個好得意既停車場比大家, 一個喺街頭 (近RYU BO商場, 即県庁前站附近), 一個喺街中間, 近卡樂B鋪有個大電視既商場.

街頭 (近RYU BO商場, 即県庁前站附近) 既松尾停車場:

呢個就係松尾停車場喇, 佢係一個全自動泊車停車場黎, 你既家人係要喺上圖部車停低左既地方落左客先, 然後記得收鏡, 再自己揸入去呢部車機度. 裏面其實係一個好似摩天輪既設計, 當你泊好車入去之後, 你行番出黎, 透過個窗就會見到部車好似摩天輪咁轉左上去, 好特意架!
收費方面: 頭一個鐘￥300, 之後每半小時￥100, 非常抵泊!! 如果你有喺RYU BO購物每￥1000的話, 仲可以有一個鐘免費泊車添!! 唯一美中不足既係, 呢個停車場最夜只可以泊到11點, 遲左去就要第二日先攞得車架喇!! 小心!!

呢個停車場入口好唔起眼, 不過唔駛擔心, 當你過左下圖既RYU BO燈位, 一上去即刻轉左咁滯就係. 

上圖就係我企喺原位影既相. 想去呢個停車場既話, 入以下電話號碼落GPS機就可以: 0988613674

國際通近中段既 グランドオリオン通り駐車場

去過國際通既朋友都會經過呢個有個大電視喺外面既商場, 今次介紹既停車場就係喺呢個商場既下面. 認唔到個商場, 卡樂B認到喇掛?

旁邊小路就係入口. 

呢個都係全自動泊車停車場來的, 不過構造唔同, 下面再講. 收費方面, 同樣係首個鐘￥300, 之後每半小時￥100, 呢度好處係收夜晚12點. 想黎呢個停車場既話, 入呢個電話號碼啦: 0988632090

得到店長既批准, 我直情行左入去停車場內部為大家影左上面呢兩張相. (先多謝店長破例比人行入去同埋開埋燈比我影) 大家泊好車之後, 佢會自動轉90度, 即係打橫部車, 之後就會升上去, 再打橫推部車去車位度. 出車時同樣, 佢會自動轉90度出返黎, 所以泊車係車頭入去, 攞車時車頭出番黎的, 所以新牌仔都唔駛驚!

入油教學

另一個大家成日都想知既問題就係入油同埋油價喇, 今次我去五日四夜, 揸左903公里, 入左兩次油, 一共入左￥8046, 大約￥8.9/公里, 即係$0.6港幣一公里, 比香港最平都要個幾一公里計平一半咁滯. 所以可以放心揸. 至於入油喇喎, 唔識日文唔駛驚, 我教你. 電油日文係レギュラー, 即係英文既Regular, 所以發音都係Regular. 至於 "入滿佢", 日文係満タン, 直譯即係滿Tank, 發音係鯭廳. 記住喇!

最後我拍左條片比大家睇, 係我喺沖繩IC高速夜麻麻開百三四逢車過車既片段. 

拍呢條片唔係教大家喺沖繩飛車, 而係想比大家知道, 除左市區之外, 就算係要比錢既IC高速公路, 都係無街燈的, 夜晚揸車的話, 路面係完全黑晒, 淨係靠你車頭燈黎照路, 倒後鏡係乜都睇唔到的. 所以如果你唔熟路或者唔夠擔既話, 夜晚比你朋友揸, 又或者白天時行一次先, 唔好一落機喺市區玩, 玩到夜晚先揸個幾鐘返酒店, 咁樣對唔熟路既你係非常危險的.

大家有其他問題再問啦.