2018年11月12日 星期一

港珠澳大橋半自駕遊


睇新聞以為港珠澳大橋好多人? 因為佢地無攻略啫. 今集我就帶大家喺港珠澳大樓開通後第三個星期六黎個港珠澳大橋半自駕遊. (半自駕遊呢個名係泊好先改既)

先解釋下咩係半自駕遊先, 即係你將部車泊喺香港口岸既停車場, 過咗關之後搭金巴 (過境穿梭巴士) 過橋去澳門就係半自駕遊喇. 咁全自駕遊呢? 就係直接揸部車去過關, 揸埋上橋直接去澳門.....既口岸停車場. 無錯!! 暫時係無得自駕去澳門市內的, 最遠你只可以去到澳門口岸停車場停泊. 為左可以揸自己部車過橋, 你要去運輸署申請通行證, 仲要買埋國內同澳門既汔車保險, 再比埋橋錢....你真係會玩全自駕?

好喇, 出發!! 

港珠澳大橋 > 離境篇 (往澳門)





先睇下地圖講解下香港口岸既停車場先.  港珠澳大橋香港口岸人工島5個停車場, 而可供預約(日泊/時租)既私家車停車場只得P2, P3兩個, P4係輕型客貨車預約停車場, P5係的士預約停車場. 而最近旅檢大樓既P1停車場係不設預約既時租停車場, 好明顯, P1係用黎比你上落客用, 所以P1係有30分鐘免費泊車時間的.  如果想預約既話, 去呢個網址>> https://www.hzmbparking.com.hk/zh-hk (日泊收費$160/24小時)





泊好車, 呢度有條扶手電梯, 同香港機場一樣, 上層係出境, 下層係入境.



一入到大樓, 就好似下圖咁, 乜都無, 直接過關架喇.

雖然啲鋪全部未開, 但係就算開咗, 你都係黎過關. 啲鋪作用唔大.


過咗關, 先去大堂既中間既售票處買金巴車票. 單程$65一位.


由於呢度仲係喺香港境內, 所以你可以用八達通或信用咭比錢. 不過暫時未有來回車票賣, 真失敗!!

買完飛, 出去室外排隊上金巴就可以. 記住睇清楚你係去澳門珠海, 兩條完全唔同既隊黎架!!





金巴有單層有雙層, 當中以單層數量最多. 好喇, 開車!
車程大約35-45分鐘, 喺呢個位講下閒計先. 有別於其他陸路既口岸, 你過左關之後其實仲係喺香港境內範圍, 不過, 一上巴士嗰刻已經係用左軚駕駛方法行車, 所以全自駕遊既朋友要小心!! 首先, 你會沿住條路兜番去民航署總部後面既公路, 然後會穿過觀景山隧道 (即係昂平360轉向站山邊嗰個隧道出口), 再之後會沿住機場邊出海直達海珠澳大橋.

話咁快, 落車!

一落車, 眼前就係澳門海關, 順手一提, 澳門海關珠海海關係兩座相連既大樓, 就好似香港機場T1同T2航廈咁, 行幾步就到, 詳請睇回程篇詳細再講.


離開海關之後, 就去到呢個巴士總站, 前往市區既巴士線喺左手邊, 而右手邊係港澳直通巴士同賭場巴士 (暫時只有非常少量賭場巴士).

呢度一共有兩條前往澳門市區既巴士線, 分別係去澳門市101X (即係大三巴, 新馬路, 葡京一帶), 同埋去氹仔102X (即係官也街) 呢兩條巴士線都係24小時運作, 我親身試過搭102X去氹仔, 需時約30分鐘. 算唔錯架喇, 而兩條巴士線既車費都係$6.

港珠澳大橋 >> 回程篇 (返香港)





又係搭102X返黎港珠澳大橋澳門口岸, 同香港一樣, 上層係離境, 下層係入境. 一落車, 眼前呢座就係海關大樓喇.



入到去行到盡, 就會見到售票處, 由於呢度係澳門範圍, 所以今次唔可以用香港八達通比錢喇, 反而可以用澳門通.



買完飛之後, 沿地下既指示圖行, 就可以去到上圖呢個分叉路. 上文講到, 澳門珠海海關其實係兩座相連既大廈, 所以你可以由呢度行番去珠海海關去大陸, 即係同時澳門離境兼大陸入境一次過做晒, 調番轉, 你可以喺珠海海關行過黎澳門海關都得.

我當大家依傢返香港咁計, 向右轉就會去到海關櫃位, 出境去香港喇.


臨出去搭金巴返香港之前, 其實呢度都仲有個售票處, 所以如果出面嗰個太多人既話, 入到黎先買就醒喇!! 出到去, 金巴就得去香港一條隊, 一定唔會排錯. 又上車喇.

一開車, 幾分鐘就到大橋收費處

前面就係西人工島喇, 過咗呢度就係隧道

出咗隧道一陣, 就黎到大橋既香港範圍, 所以地下終於寫繁體字. 另外, 香港範圍有一樣香港常見既道路設備, 就係雀籠 (測速相機), 你預咗有龍門架就有一部相機, 好密架!! 特別小心強風既日子, 車速限制會由100改為50, 一個唔小心, 停牌都有份!!
落車後, 沿往香港既牌進入旅檢大樓, 過完關就去番巴士站/的士站同埋停車場.

如果肚餓既話, 仲可以食埋翠華先走添. 翠華係我個客黎架!!! 我愛翠華!!!

最後, 當然要講攻略啦.
  1. 去港珠澳要留意時間, 上午係由珠海去香港既高峰期. 所以呢個時間出發去澳門或珠海就最少人.
  2. 下午至黃昏就係去珠海既高峰期, 所以唔好呢個時間離境.
  3. 如果你真係有需要去珠海, 但係又太多人等金巴的話, 其實你可以先搭去澳門, 再用我上面既方法, 入境澳門後, 立刻出境行去珠海. (大前提係, 你有權入境澳門, 香港出世既一定無問題啦, 其餘既朋友要自己留意)

註: 本文地圖取材自OpenStreetMap

沒有留言:

張貼留言