M+博物館終於開幕喇，咁啱我係VIP，可以早一晚入場，唔駛同人逼之餘，仲可以優先睇晒所有展品。所以今集嘅內容就係話比大家知究竟入場有咩攻略，有咩係必定要睇，有咩係要排長龍。其中有一個展品每人限睇30秒咋！非常珍貴，想知睇乜？就要睇埋落去喇。
首先提大家一句，M+博物館係要預約先可以入場既，預約網址請按此。至於開放時間：
星期二至四、週末及公眾假期：早上10時至下午6時
星期五：早上10時至晚上10時
星期一：休館
M+博物館的開幕展由六個專題展覽組成，體現了M+館藏的各個重點領域，展示博物館由2012年開始蒐羅的M+藏品系列內的視覺藝術作品、流動影像作品、設計品、建築項目、檔案藏品。這些展覽分別為：
- 香港：此地彼方
- M+希克藏品：從大革命到全球化
- 物件・空間・互動
- 個體・源流・表現
- 安東尼・葛姆雷：亞洲土地
- 博物館之夢
我哋由大堂開始出發，不過要提提大家，落車嗰一層其實叫B1，上一層先叫G，唔好問我點解，藝術嘅野我識條鐵咩？
呢度暫時開放嘅展廳有兩層，分別係G同上一層(我都唔知叫1定2，總之就G搭扶手電梯上一層啦)。兩層都係用 "口" 字型嘅設計，所以你是但入去一個展廳，出番黎之後順時針或者逆時針順住行就可以行完。唔計排隊，要睇晒所有展品至少要兩個鐘，真係好大架。
首先大家一入場，記得要排隊睇呢個安東尼‧葛姆雷：亞洲土地。喺公眾入場之後，我估呢個最少要排半個鐘隊，加上一上扶手梯就見到，所以記得排咗先。淨係睇上面呢張相，可能你完全唔知有咩咁值得排，亦睇唔出佢係乜野黎。其實佢係由英國藝術家安東尼‧葛姆雷喺2003年請咗300多位廣州市花東鎮嘅村民，用人手製作咗近20萬個泥人。呢度仲有嗰300幾位村民既相片以及佢地各自既製成品照片。而究竟20萬個泥人有幾多有幾大呢？睇睇下面。
你無睇錯，我要用wide鏡先影得晒。係成個展覽廳過萬呎咁大。不過大家只可以企喺門口望入去。不過呢啲藝術嘅野，睇相係睇唔到有幾震撼，你一定要親身行埋去先感受到。所以排半個鐘都值。(相片右下角其中一個頭，就係689太太喇😂😂😂)
跟住落黎，我哋去咗睇希克藏品先，呢度係展示當化中國藝術舉足輕重嘅40年，當中最具爭議嘅當然有艾未未嘅作品啦。有啲展品我真係唔敢Post出黎，大家親身去睇啦，我參考過呢兩日各大報章嘅相，揀咗以下呢啲出得街既比大家欣賞吓：
上面呢一個就係艾未未其中一個大型藝術品，叫做《洗白》，佢真係將古代陶罐既表面油成白色，覆咗原本嘅裝飾紋樣。而呢個唔係重點，重點係隔咗咁多年後，啲白色逐漸脫落，陶罐既紋樣再次露出，表明粉飾洗白不僅無法完全掩蓋過去，而且仲會成為歷史嘅一部份。當中嘅含意，大家各自表述，我都唔敢多加意見。
跟住落黎，你唔好比佢外表呃咗你，佢唔係一間日式食肆，佢的確係一件藝術品，我入場就係為咗睇佢，而佢只係容許你睇30秒，所以非常珍貴，究竟佢係乜？
佢就係真真正正，由日本嘅東京新橋嘅清友壽司吧度買返黎嘅吧枱。據聞買佢返黎用咗$1500萬！！所以佢係必睇嘅項目。唔睇就笨，你有份比錢架！！所以就算我喺VIP參觀時段去睇，都要排長龍，今日正式開放之後，我諗排得更勁，不過無得去日本時，可以睇到真真正正由日本運過黎嘅日本歷史藝術，排幾耐都要排呀！
繼續參觀埋其餘嘅展覽廳，有大型展品，亦有小型嘅展品。
呢幅牆上面嘅方塊係可以比你自由組合嘅，佢係一套磁石牆。又係嗰句，我係VIP時段入去，所以無你哋想睇嘅野架喇，你哋自己去組合吓啦。
拿呢間黑房大約有三層樓高，睇嘅係呢個投射式嘅藝術品。佢啲字同圖係會不停喺個十字架size內轉變。
而呢個就係形容當代嘅展區，原來呢一個世代嘅代表就係emoji。
最後我哋睇埋同香港有關嘅展區，呢個完全代表到M+博物館同世界各地博物館最不同嘅地方。
我想請問00後知唔知呢啲字係邊個寫嘅？係九龍皇帝曾灶財呀。
香港以前係個漁村，好似話有八成人口都係喺水上居住。所以上面呢件藝術品正正代表咗船上家居呢個感覺。
呢套唔係相，而係片，佢係令到你真係好似身處呢個大廈望出窗咁樣，睇到啲車郁黎郁去。解像度又高，完全好似置身香港島嘅呢一座大廈咁，究竟係邊座呢？估唔到嘅朋友就入場去睇喇。
呢件藝術品我睇咗好耐先明，原來佢係香港島黎。拿，左下角好似好多支音叉咁嘅係中環港外線碼頭，向右過少少一條長長地既咪係港澳碼頭囉，即係平時上噴射船嗰個位。係咪一講就睇到？
呢個我覺得好好笑，但係又好代表到香港。佢係遊戲世界中的香港。將來遊客可以黎香港之後，我好想同佢地介紹吓香港呢個咁細嘅地方，但係吸引咗好多遊戲同電影黎香港取景。
呢度仲有比你寫吓野畫吓野嘅地方，我去嗰日當然係免費任畫。公眾開幕之後就唔知喇，你哋去完話我知啦。
拿，呢幅畫係咪值得貼堂先？
睇完藝術品，覺得總係爭啲嘢嘅。臨走前去埋G/F層嘅M+本店買件藝術品走丫。
最後提提各位揸車嘅朋友，呢度消費係不設免費泊車優惠的。至於泊車嘅好介紹，當然要去睇小弟有份嘅
泊邊好網站相關文章啦。
M+博物館開放時間：
星期二至四、週末及公眾假期：早上10時至下午6時
星期五：早上10時至晚上10時
星期一：休館
沒有留言:
張貼留言