達思怪遊世界 ThatsWhy's Travel: 長崎篇

黎到長崎篇既最後一章, 梗係要介紹下世界三大夜景之一既稻佐山啦. 另外兩大喺邊度? 一個係摩納哥, 另一個係香港!!! 勁呢!!!

不過, 可能你會聽過香港既夜景就叫百萬夜景, 而稻佐山既夜景就叫千萬夜景. 竟然貴得過香港? 有咩咁巴閉? 一齊黎睇下.

要上稻佐山, 除左自駕之外, 就係搭長崎空中纜車. 個纜車站都幾吊腳下, 仲要位於淵神社入面.

我已經盡諒較光左, 你去到現場呢段路係完全無燈, 好彩只係行十拎步就會見到纜車站售票處.

由於多數遊客都係由旅遊巴士接載過黎既關係, 排隊既人龍係一批一批咁長期多人, 可能白天黎會少人啲既. 票價方面, 成人單程￥720, 來回￥1230. 不過等我教你一個平DD既方法, 就係上網Print定張Coupon出黎, 咁來回只需￥1100. 幾多個人都好, Print一張就夠, 去呢度Print >> https://www.nagasaki-ropeway.jp/facility/coupon.php

買完票就上車, 上車站係淵神社駅, 而總站係稻佐岳駅. 車程約5分鐘, 班次就要15-20分鐘一班.

介紹下部纜車先, 佢除左地板之外, 周圍都係透明玻璃, 所以睇夜景非常清楚, 車箱入面有位姐姐會用日語介紹景色比你聽. 之不過, 你睇相都知部車有幾逼人. 真係乜心情都無晒.

講少少威水野, 呢部纜車既外型係由KEN OKUYAMA DESIGN設計, Ken Okuyama係一位日本人, 佢做工程設計既, 有咩設計? 法拉利都有設計過, 係咪勁先?

落左車之後, 沿星光走廊行, 幾分鐘後就會到達稻佐山觀景台.

呢度除左天台係比你影夜景, 同埋2樓係一間餐廳之外, 呢度係乜都無既!!

如果你想望住個夜景食晚餐既話, 記得要早啲黎, 因為呢間餐廳收21:30, 仲要20:30就last order唔比人入去. 大家睇到個餐牌, 呢度主要係食呢個和牛餐, ￥2500咋!! 所以記得20:30前一定要到!!

講番點解長崎既夜景有千萬夜景之稱先. 其實原因係長崎既電費比香港貴好多, 所以長崎市呢個夜景大概要成千萬電費先可以有咁既效果喎. 相對黎講, 香港電費平得多, 要百萬成本就夠. 但係我個人覺得, 香港夜景靚好多喎.

交通指南

1) 免費穿梭巴士

呢條免費穿梭巴士, 一晚有四班車 (除左第一班車有可能趕得切去餐廳之外, 其餘三班車必定遲過八點半到), 主要係服務幾間酒店既客人, 所以如果你去長崎係為左上稻佐山的話, 我建議入住有中途站既呢幾間酒店 >> https://www.nagasaki-ropeway.jp/bus/

雖然係免費, 但係想搭車係要預約既, 你去番嗰幾間酒店既櫃面問佢攞票就可以, 基本上我見過即日的話一定有票咁滯. 另外, 你會見到佢有往同復既班次. 你坐邊班車去的話, 就一定要搭番同一班車回程既班次走. 所以上到山頂都幾趕下, 如果食埋飯就一定趕唔切. 不過, 我親身測試過, 只要有位剩, 你搭下班車佢都會照比你上. (講明先, 比你上係人情, 唔比係道理!!)

2) 自駕

自駕就當然方便啦, 不過提提大家, 自駕的話最高只可以去到山腰既中腹駐車場. 泊完車之後你係要行上山的, (傳聞話有免費巴士, 但係現場我又睇唔到有牌). 另外, 2018年夏天我去既時候佢有張Poster寫住平成31年會有單軌火車來往中腹駐車場同山頂. 平成31年即係2019年, 不過我去既時候根本乜都未起, 所以我唔相信2019年會起得切條單軌.

點都好啦, 整個長崎市為左長崎新幹線既通車, 已經不斷咁改善市內既設施, 務求吸引更多既旅客. 大家都去支持下啦!!