長崎篇 - 長崎市電 / 長崎出島 / 夢彩都

黎得九州, 一定要去長崎. 長崎同香港既歷史都有啲似, 由於長崎係日本島既最西面, 所以長崎自古就係一個商貿港. 亦都因為咁, 長崎既建築物同食物都好聯合國, 例如富有西方色彩既大浦天主堂, 亦都有中國特式既中華街.  唔講你唔知, 長崎人好鍾意食中餐架, 一個星期最少會去食一次. 不過留番下集講. 今集集中講下長崎站附近既景點先.

長崎駅

由福崗出發, 一般都係搭JR鹿兒島本線(特急)去長崎, 車程約兩個鐘多少少.  而專門行走福崗至長崎之間既特急車就係上圖既787號.  幾好坐架, 起碼好過行駛大分至福崗既SONIC號.

長崎站得一個出口, 上圖就係一出閘見到既景象. 眼前就係AMU Plaza.

而長崎站既對出馬路中間, 就係長崎市電既車站.

長崎市電

我地行番入去長崎站, 喺出閘機既左手邊就會見到觀光案內所, 入面就有長崎市電一日乘車券賣.

一日乘車券好似一份小冊子咁, 有齊長崎市電既路線圖, 而封面就印明一日任搭既日期, 所以你邊日用就邊日買. 好喇, 有票就上車喇.

由於長崎站係位於行車線既正中間, 所以無論你想搭邊個方向既車都好, 你都要沿天橋行過去, 再落樓梯去市電站.  (一諗回程要行樓梯番上去既問題, 我回程梗係搭巴士去長崎站啦!!)

由於長崎市電舊車有啲成四五十年歷史, 設備係舊啲, 但係同香港既電車好似. 同樣都係Air Brake.

單程車費係￥120. 而一日乘車券就￥500, 即係你一日內搭5程就回本.

同熊本市電一樣, 長崎市電亦都有低床列車. 我又專登為大家影左呢部5001A, 佢係三卡車設計, 上車門在中間嗰卡車, 而落車門照舊喺車頭. 落車時比錢或者show pass.

由第三卡望去車頭, 空間濶落.

長崎市電係長崎既主要交通工具, 所以班次夠晒密.

長崎市電一共有5條路線. (明明幅圖寫住1, 3, 4, 5 四條線咋喎!!) 其實仲有條 2 號線係夜晚臨收車前用, 印象中係1同5既合體方便夜歸人士. 當中 "築町" 站係轉車站. 如果你唔用一日券的話, 只可以喺呢個站免費轉車, 落車時記得同司機攞轉車券.

而為左配合長崎新幹線既發展同吸引遊客. 2018年8月開始, 部份長崎市電站會改名. 詳情如下:

大家可以見到, 改名後, 車站名會用相關既景點黎命名. 例如松山町站會改為平和公園站; 築町站就直接叫新地中華街站. 方便遊客好多.

夢彩都

長崎市有三個大商場, 第一個係上面講左既AMU Plaza, 另一個就係下下集會介紹既摩天輪商場, 而最後一個就係依傢講既夢彩都.

夢彩都係一個典型既日式商場, 最底層係超市, 中間係百貨商店, 頂層係停車場同埋餐廳.  想搵食既黎呢度就一流.  至於點解我會專登介紹夢彩都呢? 因為夢彩都行過少少就係著名出島碼頭.

長崎出島

出島碼頭係搭船去軍艦島既登船碼頭, 而出島碼頭行過少少, 就會見到上圖呢個出島碼頭露天食肆 (其實都係統稱做出島碼頭).

由夢彩都, 沿天橋行過去就係出島

呢個係出島碼頭, 右手邊You Me個商場就係夢彩都. 而我影相身處既地方就係出島露天食肆.

換個角度睇. 眼前第一間餐廳係食魚生飯既. 好出名, 個個遊客都好鍾意黎呢間食野. 但係價錢唔平. 我就唔會花錢買風景喇.

行到近長崎縣美術館前面, 有條小河, 呢度有水上單車玩.

最後, 送上長崎市地圖比大家參考.

前往夢彩都, 搭市電去大波止站落, 行幾分鐘就到.  而去出島碼頭就搭市電去出島站落, 行幾分鐘就到.


註: 本文地圖取材自谷歌地圖