長崎篇 - 平和公園 / 長崎原爆資料館 / 摩天輪商場

1945年8月9日, 美國向長崎投下一枚原子彈, 呢一枚原子彈, 係人類戰爭歷史上最後一次使用核武器 (希望以後都係).

長崎原爆對長崎人也好, 對日本也好, 都係一個永不磨滅既烙印. 所以去得長崎, 除咗行街買野之外, 一定要黎了解下呢段黑歷史.

平和公園

平和公園係為左祈求世界和平而起既公園. 呢度免費入場. 大家搭長崎市電到松山町站 (即平和公園站) 行5分鐘就到.

沿住扶手梯行上去, 就會見到上圖既景點, 包括平和之泉, 長崎之鐘, 平和祈念像.

之後就要原路走, 落番山, 過對面馬路去另一個地方, 就係爆心地公園, 穿過佢之後就可以去到長崎原爆資料館.

爆心地公園

爆心地公園, 保存左原爆時候既地底情況. 仲有上圖呢個母子像(其實佢叫 被爆50周年記念事業碑).

之後, 穿過下面條河, 向山頂方向行 (有Lift搭), 就會到達長崎原爆資料館.

長崎原爆資料館

長崎原爆資料館要收入場費的. 成人每位￥200.

一入場, 就會沿呢條迴旋斜路行到地底既入口. 相片可能睇得無咁清楚. 其實呢條路好有意義, 牆身係寫上倒數既年份, 當你行完整條斜路, 就等於時間倒流到1945年......

入到黎呢度, 有當年原爆前既大教堂複製品.

呢度仲有短片你睇. 同埋原爆後, 熱溶左既水樽比你摸下.

當年, 長崎市人口大約係24萬人, 而原爆造成死傷者近15萬人, 就算好彩生還既, 都有一世既創傷. 原爆除左爆炸威力同輻射之外, 爆炸所帶黎既熱力有3000~4000度, 所以大部份生還者都有好嚴重既燒傷.

行完資料館, 沿住落山方向行, 就會去到上圖既長崎西洋館. 而我身處既就係長崎市電既浜口町站(即原爆資料館站). 就可以搭幾個站去下一個景點, 摩天輪商場.

Cocowalk 摩天輪商場

Cocowalk係長崎一個新起既商場, 而摩天輪就係佢個地標. 大家搭長崎市電去茂里町站落, 行過馬路就到.

大家可以睇到, 呢度既牌子都比較新, 包括有ABC Mart, 同TitiKaka等等. 當中四樓係食肆層, 五層係摩天輪, 六七樓仲有戲院添.

而長途巴士既其中一個分站/總站, 就係喺Cocowalk既地下. 所以呢度交通好方便.

最後, 送上長崎市既地圖等大家知道下點樣去平和公園同長崎原爆資料館.

註: 本文地圖取材自谷歌地圖

長崎相關景點:

長崎15個必去景點

長崎篇 - 長崎市電 / 長崎出島 / 夢彩都