2018年7月31日 星期二

長崎15個必去景點


長崎係日本島最西邊既地方, 以前長崎係一個貿易港口, 所以呢度有好多西洋既建築, 亦有佢獨有既多國菜飲食文化. 由福岡可以搭787特急列車 (JR鹿兒島本線 特急) 過黎長崎, 車程約2小時10分鐘. 
拿! 無呃你! 佢真係叫787 Limited Express架!! 波音787我就未有機會坐喇. 黎到長崎, 當然要去以下15個必去既景點啦. 有啲連旅遊書都無介紹過架!!




1) 長崎市電


黎到長崎第一個景點, 當然係長崎市電啦, 一如熊本市電九州呢度由於地勢平坦, 所以好適合使用電車運輸.  長崎市電單程收費係¥120, 而一日無限任搭PASS就¥500. 呢度既電車有好多唔同既型號, 當中有啲型號有50年歷史咁耐!! 所以越對係一個景點, 同熊本市電一樣, 佢有低床電車既版本. 有興趣既朋友, 可以睇日後既長崎篇會有詳細介紹.



2) 夢彩都




長崎有三個大型商場, 一個係長崎站外既AMU Plaza, 另一個係摩天輪商場 (Cocowalk), 而最後一個就係夢彩都. 點解要黎夢彩都, 除左佢有大量食肆, 超市同百貨商店比你行之外, 佢同下一個景點只係一橋之隔, 就係出島碼頭


3) 長崎出島碼頭


長崎出島碼頭就好似黃金海岸咁, 係一排向海既餐廳. 呢度有魚生飯, 有PIZZA, 又有啤酒飲. 而喺長崎出島碼頭夢彩都之間個渡輪碼頭, 就係坐船去軍艦島既登船地方.

詳情請參閱: 長崎篇 - 長崎市電 / 長崎出島 / 夢彩都 >> http://thatswhystravel.blogspot.com/2018/08/blog-post.html


4) 平和紀念公園


大家都知道, 二次世界大戰時, 美國向日本長崎投下原子彈. 為左紀念和平, 就起咗呢個平和紀念公園. 喺1996年仲被納入為世界遺產之一. 去到長崎, 無理由唔去紀念下掛?



5) 長崎原爆資料館


就喺平和紀念公園既附近, 就有呢個長崎原爆資料館, 入場費係¥200. 呢¥200非常值得比, 呢度除左有當年長崎原爆時候既片段同仿製既建築物之外, 仲有當年被幅射照過既物品比你親手摸下, 究竟係乜? 留意住達思怪遊世界往後既長崎篇啦!



6) 摩天輪商場 Cocowalk


一開始我已經介紹過, 長崎有三間商場. 當中呢一間摩天輪商場 (其實佢叫Cocowalk) 就最新最潮, 大家可以睇到佢啲鋪都係熟口熟面既流行牌子, 5樓仲有個摩天輪比你玩, 而7樓仲有戲院添.  旅遊書無介紹過架!!

詳情請參閱: 長崎篇 - 平和公園 / 長崎原爆資料館 / 摩天輪商場 >> http://thatswhystravel.blogspot.com/2018/08/blog-post_23.html



7) 眼鏡橋


眼鏡橋係日本最古老既拱型石橋, 而由於佢係雙拱型設計, 當湖面平靜時你影相的話, 石橋既倒影連埋條橋睇落好似一副眼鏡咁, 所以得名為 "眼鏡橋".



8) 長崎龍馬之路


長崎龍馬之路好似係無一本旅遊書有介紹過, 甚至去過長崎既朋友可能都無聽過.  其實呢度係一條好長既平民商店街, 當中最出名既有幾間賣食物既店鋪, 特別係賣麵包既一間, 成日上電視架!!



9)  銀座通


過左長崎龍馬之路, 緊接住既就係銀座通. 其實銀座通係兩條十字型既商店街型成既購物點. 銀座通比較適合遊客行, 因為呢度有藥粧店仲有長崎唯一一間驚安之殿堂.



10) 新地中華街


你似為中華街係遊客先去? 錯晒!! 長崎縣人係好鍾意食中式野, 佢地鍾意到一個星期最少會黎一次, 但係佢地只係會食一種野, 究竟係乜? 留意住往後既長崎篇啦!!

詳情請參閱: 長崎篇 - 眼鏡橋 / 長崎龍馬之路 / 銀座通 / 新地中華街 >> http://thatswhystravel.blogspot.com/2018/09/blog-post.html

11) 舊香港上海匯豐銀行


呢座建築物就算我唔講, 你日日對住啲錢都會覺得熟口熟面啦. 佢就係舊香港上海匯豐銀行. 同香港既中環有啲相似, 長崎呢度係貿易港, 所以近海既地方就會有銀行.  今時今日, 呢座建築物已經變左做銀行博物館, 仲要收入場費添. 作為香港人, 匯豐賺我唔少仲要我比錢入去? 我影張相算, 仲要早晚各影一張, 夠比面喇掛?



12) 大浦天主堂


大浦天主堂係由法國傳教士喺1864年建立.  係日本現存最古老既木造哥德式建築, 裏面既花窗玻璃裝飾有100年歷史架喇!! 入場費¥500.



13)  哥拉巴園


又重覆咁講, 長崎係一個貿易港, 所以好多洋人聚居, 當中唯一保存得最好既西洋建築群就係哥巴拉既故居喇, 依傢重修變成景點哥拉巴園, 入場費¥600. 入園除左可以喺佢咁大個歌德式花園度影相之外, 仲可以了解下當年洋人喺日本既生活係幾咁豪華.

詳情請參閱: 長崎篇 - 大浦天主堂 / 哥拉巴園 / 舊香港上海匯豐銀行  >> http://thatswhystravel.blogspot.com/2018/10/blog-post.html


14)  諏訪神社


諏訪神社拜乜野最靈我就唔知, 但係呢間神社出名高同大. 淨係睇下山腳呢兩座獻燈就知有幾巨!! 然後再要行三百幾級樓梯先上到去, 不過上到去之後, 長崎市既景色盡收眼簾. 值得一去!



15)稻佐山



世界三大夜景之一既稻座山, 點可以唔去?  其餘兩大夜景係乜? 一個係摩納哥, 另一個係...香港!!!!!  而稻座山既夜景更加被喻為千萬夜景添 (香港係百萬夜景喎). 究竟稻座山有幾巴閉, 又應該點搭吊車上去, 請留意往後既稻座山篇.

詳情請參閱:  長崎篇 - 稻佐山 >> http://thatswhystravel.blogspot.com/2018/10/blog-post_16.html

按此進入九州篇所有文章>> http://thatswhystravel.blogspot.com/search/label/%E6%97%A5%E6%9C%AC%E4%B9%9D%E5%B7%9E


沒有留言:

張貼留言