上集就係文青之旅, 今集就帶大家黎長崎搵西洋特式. 首先第一站就係上圖呢間熟口熟面既建築物, 估唔估到係乜?
舊香港上海匯豐銀行
比多個正面你睇, 其實佢就係舊香港上海匯豐銀行喇. 又提多次, 好耐之前, 長崎呢度係貿易港, 所以近海既地方就會有銀行. 就好似香港既中環一樣. 而今時今日, 呢座建築物已經變左做銀行博物館, 有興趣既朋友可以比錢入去參觀下.
大浦天主堂
大浦天主堂係喺1865年建成, 佢係日本現存最古老既木造哥德式建築, 裏面既花窗玻璃裝飾有100年歷史架喇!! 想入去參觀就要比入場費¥500. 我地由搭長崎市電開始講.
上圖就係大浦天主堂站, 呢段路係單軌行車的, 所以你見到得一條路軌, 遠啲個月台係落客, 近鏡頭右手邊既月台係上客出市區既.
落左車之後, 見到上圖呢條斜路, 行5分鐘上去就到大浦天主堂, 沿途可以睇下啲特式店鋪.
行到黎呢度, 眼前既就係大浦天主堂喇.
哥拉巴園
又重覆咁講, 長崎係一個貿易港, 所以好多洋人聚居, 當中唯一保存得最好既西洋建築群就係哥巴拉既故居喇, 依傢重修變成景點哥拉巴園, 入場費¥610. 入園除左可以喺佢咁大個歌德式花園度影相之外, 仲可以了解下當年洋人喺日本既生活係幾咁豪華.
想去哥拉巴園好簡單, 剛才去到大浦天主堂之後唔好停, 繼續上山行多3分鐘就到.
最後同大家重溫下今日既景點, 我地用地圖方式去重溫.
搭長崎市電, 去大浦天主堂站落, 行入去, 右手邊就係舊香港上海匯豐銀行, 左手邊沿斜路上山就到大浦天主堂, 再繼續上山就會哥拉巴園. 三個景點都非常集中易搵.
提多樣旅遊書都唔知既野你聽. 就係匯豐銀行對面就係長崎既郵輪碼頭, 郵輪碼頭門前有片大空地. 如果你當日經過時見到有郵輪停泊的話, 就記得要行過去大空地睇下. 因為每當有郵輪停泊既日子, 呢片空地就會變成大笪地, 有好多地灘擺賣. 睇呢啲好過行商鋪. 而大笪地收晚上十點左右, 所以你食完飯先黎再行過都得.
註: 本文地圖取材自谷歌地圖
沒有留言:
張貼留言