熊本篇(下) - 上下通 及 熊本熊辦公室

上回 熊本篇(上) 講到, 大家可以即日來回熊本同博多. 而由於櫻之馬場收得早既關係, 記住行左櫻之馬場先, 然後再行上下通. 上下通又係啲乜呢? 就係熊本一條好出名既購物街, 佢位於通町筋同水道町站之間, 亦即係上圖中間綠色火車軌既左右兩邊. 右邊係上通, 左邊係下通. (係打橫嗰條先係架, 唔明呀? 睇地圖啦)

地圖入面, 紫色線就係上通同下通喇. 不過淨係識去上下通點叫做達人呀? 其實仲有條銀座通.

銀座通 / 下通

由櫻之馬場出發, 向住花畑町站方向行, 去到見到條天橋, 望過對面就係銀座通入口, 由櫻之馬場行過黎10分鐘左右.

呢度既坑渠蓋就係地圖!! 死未!!

由銀座通行入去, 數三條街轉個靚彎就入番去下通既範圍 (其實又唔駛真係數既, 望住地下既坑渠蓋就係地圖喇), 呢度有間BEST電器, 好似有五層樓高, 除左可以借廁所之外, 上面有一層係賣GAME架!! 好, 繼續行.

下通既入口就係喺PARCO旁邊. 好易搵. 下圖就係企喺下通入口望番過黎呢邊既角度.

上通

記住, 上下通並唔係打正對面, 而係斜少少對面, 即係上圖兩座樓之間既入口.

上通同下通就各有各特色, 下通比較多食肆同較為潮流既店, 好似ZARA咁. 而上通就比較手作仔同地道啲, 連食肆都係類似MOS Burger咁既平民野. 黎得熊本就梗係行飽佢啦.

熊本熊辦公室Kumamon Square

黎得熊本, 唔少得既就係黎熊本熊辦公室 (Kumamon Square) 探下熊本部長啦. 咁Kumanon Square喺邊? 

水道町站

Tsuruya 東館

Tsuruya本館 (東館既旁邊, 上一張相既背面)

其實Kumamon Square位於Tsuruya東館地下 (東館即係有Tokyu Hands嗰座) , 搭熊本市電的話, 水道町站落, 一過馬路對到正就係. 不過記住, 佢係分開門口入既. 總之一過馬路對到正嗰隻門行入去就係. 唔好真係行去Tsuruya東館範圍呀!

未黎過既你可能都知道, 熊本部長唔一定日日返工. 不過如果佢唔喺度, 你都可以買下手信, 入去佢Office參觀下. 之但係, 你能夠黑得過我既話.......就係Kumamon Square大裝修, 落左閘睇都無得睇. =.="
想知道熊本部長邊日返工既話, 記得上官網睇下呀!!
(http://www.kumamon-sq.jp/)



相關文章:
熊本篇(上) - 熊本市電及櫻之馬場 城彩苑
註: 本文地圖取材自谷歌地圖