台中咁好玩, 點會咁快走? 今日筆者再為大家介紹一個香港人必到既台中著名景點. 就係南投縣既日月潭喇! 講開日月潭, 早兩個月睇台灣既新聞報導. (筆者在香港都係睇台灣既TVBS的). 新聞話, 由於無論遊客定當地人都淨係識日月潭, 而無人記得日月潭就係南投縣, 所以不如將南投縣改名做日月潭縣. 當然, 我地暫時可以當笑話黎聽, 但不過, 大家可以知道日月潭對南投縣黎講係幾咁重要.
起開始呢篇介紹之前, 大家要知道日月潭係一個幾大既地方, 加上景點分散,
所以你至少要預一日時間遊覽. 如果你想去埋九族文化村玩埋機動遊戲既話, 咁就要兩日時間了. 故此, 日月潭既介紹我會分幾篇文章黎寫. 今日第一篇寫總覽, 等大家知道日月潭有咩地方好食好玩, 同埋點搭車去. 聽日開始我會逐個景點作詳細介紹. 依傢就先睇下日月潭既地圖先啦.
日月潭位於台灣本島中央南投縣的魚池鄉，是台灣最大的淡水湖泊，也是最美麗的高山湖泊。潭面以拉魯島為界， 東側形如日輪，西側狀如月鉤，故名日月潭。她的美是由山與水所共同交融、創造出來；748.48公尺的中高度海拔，造就日月潭宛如圖畫山水，氤氳水氣及層 次分明的山景變化，一景一物皆渾然天成，詩畫般的意境，足以讓人流連忘返。(複製自日月潭國家風景區網頁介紹)
當你按圖, 放大左張地圖黎睇之後, 大家可以見到, 所有既景點都係環繞住個潭的. 我地由上至下, 順時針開始講喇:
圖A: 水社遊客中心. 即係當你去到日月潭時落車既地方. 無論你黎定走都係由A呢度做出發點. 所以呢個位置好重要.
圖G: 文武廟. 一間香火鼎盛的廟宇.
圖B: 日月潭纜車及青年活動中心. 乘搭纜車除左可以從高咁一望全個日月潭既景色之外, 仲可以去到山既另一邊, 九族文化村. 九族文化村係一個九族人既村落, 不過又有跳樓機呢D咁刺激既遊戲玩喎, 究竟咩葫蘆賣咩藥, 請參閱快將推出既文章吧.
圖C: 伊達邵. 原本係邵族人既聚居地, 依傢變成遊客區, 有民宿, 又有老街, 係食野買野既好地方, 詳情又係等另文介紹.
圖E: 玄奘寺.
圖D:
向山行政暨遊客中心.
圖F1: 水社碼頭, 可乘搭渡輪前往圖F2.
圖F2: 伊達邵碼頭, 可乘搭渡輪前往圖F1 水社碼頭.
講到呢度, 我想問大家一個問題, 近日大家都會喺電視度睇到一個由楊丞琳主演既全新相機廣告, 而廣告既內容就係喺日月潭入面拍架喇, 咁究竟係喺上面圖A至G, 邊個景點拍既呢? 講到既時候開估.
乘車指南:
日月潭內各景區
1) 環湖公車 - 來回水社遊客中心(圖A) 至 玄奘寺(圖E), 經文武廟(圖G), 日月潭纜車(圖B)及伊達邵(圖C)
一日無限次乘搭NT$80, 星期一至五每30分鐘一班車, 星期六日及公眾假期每15分鐘一班車. 乘客可以攜帶單車上車, 所以租單車都唔怕腳軟.
2) 遊艇 - 來回水社碼頭(圖F1), 伊達邵碼頭(圖F2) 以及玄光碼頭(近圖E). 由於遊艇由幾間不同獨立公司經營, 所以不可以互換轉乘. 單程NT$100, 全程NT$300. 同樣可以帶單車上船.
3) 單車 - 喺台灣, 基本上所有旅遊點都有租單車既服務, 但係日月潭我要提醒大家, 由水社遊客中心(圖A)至日月潭吊車(圖B), 即地圖右半邊既地區, 高低落差較大, 加上行車路較窄. 故筆者並不推介大家踩單車.
不過由水社遊客中心(圖A)至向山行政暨遊客中心(圖D)之間既路段就唔同, 一來無公車, 二來路途非常平坦又夠寬闊, 加上沿途靠近日月潭, 一路踩單車一路影相係上佳既選擇. 除此之外, 其實圍住日月潭有多達4段自行車道, 集中喺地圖既左下方. 下面呢張相就係筆者岩岩介紹完前往向山既一段向山自行車步道.
4) 電動車 - 除左單車之外, 台灣仲有一樣野叫電動車, 即係電動單車咁解. 不過由於電動車不段發展既關係, 依傢既電動車同真既電單車一樣樣咁滯. 不過呢, 唔需要車牌都可以駕駛, 極速為30公里/小時. 如果你懂得踩單車就應該無問題. 不過記得要依足交通規則右上左落行車. (下圖係筆者既電動車, 你可以見到車頭燈, 指揮燈齊備. 唔想踩到腳軟? 咁就試下啦, 好好玩架! NT$150一小時, 全日NT$500)
由台中前往日月潭:
台中有兩個地方可以乘搭公車到日月潭, 一係台中干城站, 另外就係台中高鐵站. 以台中高鐵站為例, 車站入面有指示牌寫住 "往日月潭公車", 當你去到公車候車室時, 會有的士司機兜售佢自己既包車優惠, 不過你當然可以唔理佢, 因為公車售票處就在眼前. 車費為NT$229, 車程約1小時40分鐘. 平日每小時兩班車, 以干城總站計逢30分及50分發車, 到達台中高鐵站需時25分鐘.
唯一留意既係回程, 平日回程(即水社遊客中心)開出既尾班車係19:25, 所以如果你諗住玩到夜晚既話, 就一定要過夜了. 當然, 搭的士走都得, 車費約NT$1000-1200(可以上車前講價), 車程約1小時. 謹記!!
南投客運(日月潭線): http://www.ntbus.com.tw/tour-sml.html
相關文章
日月潭 -- 水社遊客中心 (圖A)日月潭 -- 纜車(圖B) / 九族文化村
日月潭 -- 伊達邵 (圖C)
日月潭 -- 向山行政暨遊客中心 (圖D)
沒有留言:
張貼留言