高雄 - 旅遊概覽

離開左阿里山, 再向南進發, 終於黎到高雄! 除左台北之外, 另一個香港人常去既地方就係高雄, 當然啦, 高雄有義大世界, 又可以再南下去墾丁玩水. 但係你又知唔知高雄究竟有咩好玩好食好行呢? 今集就等我將高雄市好玩既地方作一個簡單既概覽話過你知. 之後我就會逐個景點分集咁詳細介紹. 而完成埋高雄之後就會介紹大家等左好耐既墾丁. 再之後又會重返台北.

好喇, 講番高雄, 其實高雄地方唔算好大, 至少細過香港, 所以好多景點都可以搭公車或捷運就可以去到. 高雄比台北熱好多, 不過人同車都少好多. 另外就係, 高雄既物價係比台北平的, 所以你會發覺呢度買野平過台北好多. 但當然, 名牌就另計啦, 公價架嘛. 講到捷運, 高雄捷運得紅同橙兩條線咋, 我地先睇下個路線圖先啦.

大部份旅遊點, 都係紅線的, 包括高雄國際機場在內. 而橙線我諗大家只會去西子灣了.

我地由上至下咁睇啦:

R16左營 - 可接駁高鐵. 另外亦可轉乘公車到義大世界, 義大世界係一個好似香港迪士尼咁上下既主題公園, 入面有酒店, 有個大商場, 當然唔少得一個機動遊樂場啦. 呢度有比香港更刺激既機動遊戲, 下次詳細介紹時再話你知啦. 另外, 呢度每年都會搞一次大型既音樂會, 詳情就自己留意各FANS網站了.

R14巨蛋 -  呢度有漢神巨蛋商場, 商場內有著名既商店, 包括TAILUNG HANDS!! 另外夜晚仲可以去高雄必到既瑞豐夜市.

R11高雄 - 可接駁台鐵, 另外亦可步行前往長明街商圈.

R10 / O5美麗島 - 呢度係全球十大最美既地鐵站之一, 去呢度唯一想做既就係影個彩色玻璃做既天幕, 好多新人都喺呢度影相架. 另外, 夜晚仲可以去高雄另一個必到既夜市 - 六合夜市.

R9中央公園 - 呢度除左有夜晚好多人黎既城市光廊, 仲有女士們最愛去既新堀江商圈, 新堀江商圈有高雄女人街之稱, 喺呢度女士們可以大買特買!!

R8三多商圈 - 其實呢度唔係商圈, 應該叫商場先岩, 呢度有全高雄最高既建築物 - 85大廈, 有SOGO, 仲有大遠百購物中心!! 而全高雄最大間既誠品書店就係喺大遠百購物中心既17樓. 另外, 呢度仲有IMAX戲院添.

R6凱旋 - 呢度有免費穿梭巴士載你去全高雄最大既購物商場 - 統一夢時代購物中心!! 呢度除左有誠品, DAISO之外, 夢時代頂樓仲有個南台灣第一座摩天輪, 地下又有水陸兩用車坐. 真係想幾好玩有幾好玩.

由左至右講喇:

O1西子灣 - 呢度可以步行去中山大學, 十八王公廟同打狗英國領事館呢D景點之外, 仲可以步行去鼓山渡輪站, 搭船去旗津玩!! 旗津有咩玩? 有博物館, 又有著名既斗六冰室, 同埋海味市場. 等我下下下下集既介紹啦!

達思怪獅背秀 (ThatsWhy Special)

喺高雄你經常會見到 "打狗" 呢兩隻字, 又或者你搭捷運時又會見過 "哈瑪星" 喎, 究竟打狗同哈瑪星點解呢?

打狗 - 其實即係高雄既前名. 當年日本人佔領台灣時, 問台灣人高雄叫咩名, 台灣人就答日本仔 "TAKAO", 點知原來日本扶桑町的確有一個地方叫TAKAO, 而TAKAO既中文寫法就係高雄. 咁所以打狗, 就變成今時今日既高雄了.

哈瑪星 - 原理同打狗嗰個差唔多. 又係日本人改既. 哈瑪星, 即係西子灣呢個地方以前係鐵路既總站, 而由於呢度係近海既關係, 所以日本人就叫呢度做臨海線 "Harbour Sen", 所以叫下叫下, 台灣人就以為日本人叫呢度做哈瑪星了.