九份

香港有悲情城市天水圍, 台灣也有它的悲情城市九份. 不過, 九份既悲情係因為一套陳年電影吧了.

上集介紹過十分, 菁桐之後, 我地再次由瑞芳出發, 到九份喇. 提多一次, 如果想由瑞芳去九份的話, 搭公車就可以, 所有去金瓜石的公車都會經九份的 (其實車頭會貼上經九份字樣的). 班次非常頻密, 約十分鐘左右就會有一班車.

認住瑞芳車站對面既呢間頂好超市, 超市門口就係往九份既公車站. (車程約20分鐘, 車費為NT$15)

記住喺九份老街站落, 一般遊客都會上車時同司機講定, 司機會大叫 "九份到了" 提你落車的. 落左車之後會見到個涼亭, 轉埋彎會見到間7-11, 咁你就知道無落錯車了.

7-11 旁邊既小路, 就係九份老街了, 入面有好多手信買, 又有時裝, 仲有好出名既是誠陶笛,當然唔少得食九份特產芋圓.

呢碗就係招牌芋圓!!

是誠陶笛, 老闆好好人, 仲識講幾句廣東話同日文. 佢會教你吹陶笛教到你識為此. 佢話你唔買佢都會教喎. 筆者自小吹開......笛, 所以好快上手, 即刻就同老闆JAM左首so so fa me re.

呢條叫豎崎路, 由石級所組成. 有人話無黎過呢度就等於無黎過九份咁話喎. 不過咁, 呢個景影相都真係幾靚. 另外最底嗰幅我相信依傢已經拆左了, 呢度就係當年既昇平戲院. 要知道, 悲情城市呢套戲就係喺呢度取景架喇!!

臨走前, 嘆番杯果汁, 玩下戰利品, 不亦樂乎. 最後提提大家, 九份食肆眾多, 唔駛怕肚餓.

交通指南:

由台北到九份, 必須先搭台鐵到瑞芳, 再轉搭上文介紹的公車. 台北到瑞芳的資料請參閱另文《瑞芳》吧.

另外, 由瑞芳搭的士到九份約NT$180.

達思怪獅背秀 (ThatsWhy Special)

以下呢個離開九份既方法, 我相信無人敢教你, 不過我呢個博客就是要教你旅遊書唔會講既野. 就係搭公車直接去台北了!!

在九份, 你可以搭公車1062直達台北既捷運忠考復興站, 車程約一小時三十分, 車費為NT$106. 你唔好以為我傻先咁樣教你! 其實你扣番由九份落去瑞芳既時間, 扣下等台鐵既時間, 我又當你搭莒光號返台北要50分鐘. 咁扣扣埋埋, 搭公車最多用多你15分鐘左右時間. 上車有位坐, 一覺訓醒坐到尾又得, 沿途會經過暖暖等地方, 影下相, 欣賞下地道景色唔好嗎? 另外, 其實呢程公車最大既賣點, 就係可以經過饒河街夜市. 饒河街夜市位於松山火車站旁, 距離台北市有一段路程. 所以如果你喺九份行到傍晚五六點, 搭一個多小時公車到饒河街遊玩, 未嘗不可. (由九份搭往台北既公車1062, 如果你喺松山火車站落車, 車程約一個多小時, 車費為NT$90)

相關文章

瑞芳
菁桐