田尾公路花園

今集帶大家黎到台中既彰化縣, 去一個好特別而又好少香港人去既地方 - 田尾公路花園.

田尾公路花園係彰化縣著名既花卉養殖中心, 呢度有好多間以景觀造型花園式既餐廳, 等你可以沿路踩住單車, 影下相, 又食下野. 先比幾張相引誘下你地先.

田尾係台灣人逢假日必到既單車熱點, 就好似香港既大埔咁. 不過呢度既玩法有少少唔同. 你見到上面既相啦, 話明係花園. 呢度有好多間獨立既咖啡店, 而每一間都有佢自己特式既花園, 水池, 假山等等既裝飾. 你需要做既, 就係一去到田尾, 就去歐風租車度租番部單車, 然後老闆娘會介紹幾間特式餐廳比你, 咁你就踩住部單車喺呢個花海度周圍去. 搵岩你心水既餐廳, 放低入場費, 就可以入去盡情影相. (部份餐廳係免入場費的, 但係要收入場費的餐廳, 該NT$100入場費係可以用黎扣食物錢的, 你當飲個HIGH TEA就可以). 筆者就去左以下兩間.

除左食TEA同影相之外, 呢度仲有一條街係賣花的, 由於呢度係首屈一指既花卉養殖場, 所以你講得出既品種都可以搵到. 不過問題係, 你點搬番香港呢??

交通指南:

去田尾, 其中一個方法係喺員林乘搭公車, 到田尾國小站落車, 行五分鐘左右就到.

當你離開員林火車站之後, 向上圖國光客運站既方向行, 之後轉右, 員林客運站就喺你既右手邊 (唔起眼的, 望住右手邊行, 見到個停車場咁既東西, 就係公車總站了).

你可以同職員講, 你想去田尾, 佢就會話你知搭邊部公車, 車程約半小時, 車資為NT$31. 班次唔算太疏, 約30分鐘一班車 (頭班車06:05, 尾班車22:40)

喺田尾國小站落左車之後, 向後行, 沿民族路一段行, 就會見到歐風租車.

由台北/高雄出發的話, 可以乘搭高鐵到台中站, 或者搭臺鐵去臺中火車站之後, 步行幾分鐘到干城客運站, 搭6937號公車, 就可以直達田尾花園入面添.

達思怪獅背秀 (ThatsWhy Special)

想租單車的話, 當然要搵我朋友啦. 上圖中, A或B都係歐風租車, 老闆娘Agnes係香港人黎架, 講廣東話當然無問題. 呢度車款齊全, 雙人既, 四人既, 甚至前後座既情侶單車都有. 下面就送幾張我喺田尾公路花園入面沿途影既相比大家啦.

(本文地圖取材自谷歌地圖)