箱根篇之 大涌谷(火山)

由強羅出發要上大涌谷. 先要搭箱根登山纜車去到早雲山, 再轉箱根吊車上大涌谷. 纜車車程約10分鐘. 吊車就10分鐘左右.

同香港既纜車一樣, 兩卡車, 斜住坐咁上山的. 上圖係幾個中途站, 其實每個站都好近.

到早雲山, 超多人. 跟住人行你又行, 就會去到吊車站.

有銀仔買. (即係好似迪士尼果種)

呢款吊車同香港既有好大分別. 一黎佢係用左右雙纜的(唔明就算吧). 二黎佢一部車可以坐同企接近20人. 上吊車喇!!

大涌谷係全程吊車既一個中途站來的, 所以記得落車. 不過一般情況下, 個個都係去大涌谷架啦, 所以多數情況都係落晒車架喇. 出左吊車站, 呢度比山下面低5度. 筆者當日去應該得一至兩度. 凍唔係一個問題, 大風係一個大問題, 由於喺山上面, 無大廈, 風大得好緊要. 另外就係, 原來相機喺咁凍既情況下係唔WORK的. 大家記住要搓暖相機舊電, 先可以開到機影幾張相, 之後又HANG過.

沿住大涌谷噴池個牌行過去就可以去到黑玉子蛋既鋪頭, 記住, 係行到上頂嗰間先係正宗呀. 呢段路行10分鐘左右啦, 唔算太難行, 但係小心結左冰既路會比較滑.

從呢個角度望番落去大涌谷吊車站, 附近既係手信鋪同一間茶居(餐廳)咁大把, 間茶居好多人架, 因為無得揀. 所以我叫大家喺強羅食飽先好上黎. 

黎到, 買蛋喇喂!

一包好似有4隻, 仲有一包鹽. 唔落鹽其實係無味咁滯. 呢度有幾張長枱, 個個都起度打蛋食架喇. 唔好等喇, 呢度咁鬼死凍, 食蛋啦.

旅遊書唔知點解話呢度D蛋無散買, 這是錯的!! 無得一隻隻買就真, 所以旅遊書的確係唔可以盡信.

旁邊既池就係煮蛋既溫泉.

好喇, 上圖中間靠左既就係正話間黑玉子茶居. 而筆者身處既位置已經係最高點. 大家喺呢度影張相就要落番去大涌谷吊車站附近了.

有張相搵唔番, 呢度除左食蛋之外, 仲有黑色既火山雪糕, 都係好出名的. 雪糕好好食, 可以一試. 之後, 大家可以上番吊車, 去桃源台轉海賊船. 車程約20分鐘. 而以下呢個景點, 筆者唔推介大家去喇.

由大涌谷去桃源台之間, 有一個叫 "姥子" 既站, 除左要去某間酒店之外, 大家唔需要浪費時間落車, 因為呢度就係得上圖呢兩部舊吊車比你影相咁大吧. 加上你落左車之後, 要再上番車係好難, 因為大涌谷站多數都上滿人落山, 我等吊車都等左接近十部先有位上. 好彩有人落車咋!

下文再講桃源台同海賊船.


相關文章
箱根總覽（箱根湯本，大涌谷）
箱根篇之 箱根湯本
箱根篇之 強羅
箱根篇之 桃源台 (海賊船)