2018年5月1日 星期二

福岡篇 - 福岡空港 (福岡機場)


今日起, 達思怪遊世界會帶大家遊九州. 出發之前以為九州無野好玩, 無野好買, 點知旅程既第二日就已經要碌卡喇!! 想知九州有咩好玩好買, 跟住達思怪去遊日本一定無錯. (達思怪係ThatsWhy既中文😄😄)



機場往博多市區




前往市區最快捷既方法就梗係搭地鐵啦. 不過一如其他既日本機場, 地鐵站永遠都係位於內陸航廈, 所以要搭地鐵, 先要搭免費接駁巴士. 依照上圖既指示, 出門口轉左就係.





行去 1 號月台等巴士就係免費接駁巴士喇, 一出門口行幾步就到. 班次約5分鐘一班, 車程15分鐘.


搭兩個站就到, 車箱入面有落車提示的.




落左車之後, 向前行幾步就見到地鐵站入口.


福岡空港係呢條地鐵線既總站, 所以唔怕上錯車, 兩個月台都上得. 如上圖所示, 呢條線係可以直達博多 (車程5分鐘), 天神 (車程11分鐘). 所以搭地鐵係非常方便的.



機場巴士

不過, 正如上面所講, 要出入市區先要搭接駁巴士後搭地鐵, 一上一落都係時間, 仲要拎住行李添. 所以回程返機場的話, 我就會搭巴士喇.

博多站西口既左手邊, 就會見到上圖呢座博多バスターミナル (博多巴士總站). 而機場巴士站就係喺呢座大廈入面1/F (即係地下啦) 既11號月台. 車費係¥260.


上圖就係巴士時間表喇, 分別有直行, 快速各停 (最右手邊反光嗰行) 三種行車模式. 直行係指不停站直達機場, 所以車程最短, 約15分鐘就到; 快速就停兩三個站, 車程約18分鐘; 各停就即係站站停啦, 車程約25分鐘.

我就試過搭快速既班次, 當然做唔到官方講既18分鐘車程啦, 當日我搭左接近半個鐘.  另外, 話就話機場巴士, 但係佢只係用普通市區巴士既車種, 無行李架, 座位又少, 所以大部份人都係要企. 但係我都好推薦大家搭巴士, 因為巴士可以直達國際線航廈既三樓離境層, 一落車就可以check in, 唔駛拎住行李上上落落.

最後提提大家, 雖然有啲人會知道博多站東口都有個前往機場既巴士分站, 但係呢個站永遠上唔到車的. 乖乖地去巴士總站入面等車啦.


達思怪獅背秀 (ThatsWhy Special)

如果咁就出一篇文章, 仲唔比人笑死咩? 其實除左地鐵同巴士之外, 仲有王室巴士呢樣野的!!

大家都知, 博多Canal City Hakata運河城位於博多站天神站既中間, 但係好幾間酒店都係喺呢度附近. 由博多站行過去要成15分鐘架! 所以我介紹大家搭王室巴士, 雖然佢係以上咁多種交通工具之中最貴既, 車費¥500, 但係就可以直達運河城, 車程約20分鐘. 班次如下:

王室巴士既方法好簡單, 同搭接駁巴士既方式一樣, 唔同既就係搭王室巴士要去 4 號月台, 而接駁巴士係 1 號月台.





福岡篇相關文章:

沒有留言:

張貼留言