2018年5月31日 星期四

福岡篇 - 天神


除左博多之外, 黎福岡旅行一定要黎天神. 天神真係一個好神既地方, 佢直情係集原宿表參道澀谷銀座於一身. 你想行大商場買名牌咩? 佢有三越大丸; 你想買潮牌或者平價MK衫咩? 佢有天神コア; 你想搵啲隱世精品小店咩? 上幾集介紹左名牌Vintage店 J&MARMIE vintage select 比你.  所以你想黎天神行? 一兩日係唔夠行架!!




為左方便解釋, 我地睇左地圖先.  

1) 天神地下街:  地圖靠左垂直既粉紅色範圍, 大部份係時裝店, 小量食肆及甜品鋪

2) 天神コア (TenjinCore): 天神地下街右手邊的一個商場, 全部係潮流野, 仲有109MENS添.

3) Solaria Stage / Pacro / 三越 / 新天町: 天神地下街左手邊幾個商場




天神地下街


如果你係由博多搭地鐵黎既話, 只要喺中央口出, 就會黎到天神地下街中央廣場.

地鐵站出入口同天神地下街係呈十字型的. 比埋個地圖你睇.
大家可以CLICK張相黎放大睇.  由右至左計係 西一番街(上方) / 東一番街(下方) 一路行到去最左手邊就係 西11番街東11番街.  而天神地鐵站就大約喺 2番街同 3番街之間. 呢個地下街有幾長呢? 大約有600米長, 即係由太子行去旺角咁上下, 你都咪話唔遠.



大家睇相都知我黎到既時候已經乜都收晒喇. 所以要黎天神行要預時間, 我未黎之前都無諗過條地下街咁長. 呢度啲野唔錯架, 一啲都唔OUT. 

另外, 呢條天神地下街另一個好處係四通八達. 好似東5出口可以通去天神コア. 西5同西6出口都可以去Solaria Stage. 而西7, 西9同西12a都可以去天神三越. 最後東9出口可以去大丸.



天神コア (Tenjin Core)


天神コア (Tenjin Core) 係一個潮流商場, 要潮到好似澀谷咁既佢有, 你想年青平民款原宿風既佢又有. 潮流既野我真係識條鐵, 不如睇相吧啦.
天台係一間餐廳黎, 夜晚有得BBQ架!






¥990, 即係$70幾蚊港紙咋, 平唔平先?


呢間賣Accessory既店鋪, 好多學生妹買. 睇下個牌, 最平 ¥60 咋.


呢層係109MENS, 女士去掃貨, 男士去呢層各自買.


潮牌黎講WEGO就唔少得架啦.



嘩! 呢間好PINK呀! PINK到我唔敢正視, 要偷偷地望.

天神駅周邊(三越 / Solaria Stage / Solaria Plaza / Iwataya / 天神屋台)


行完天神コア, 我地過條馬路去另一邊, 即係Solaria Stage / 三越既方向繼續Shopping.


睇過上幾集既朋友, 都會記得喺三越Solaria Stage之間紅色箭咀呢條街行入去, 係有好野既.



穿過去之後, 你就會見到Solaria Plaza, VIOROIwataya (Iwataya旁邊仲有間LV添)






想平民少少既, 有呢條新天町, 入面係好似平似啲乜通物通咁賣平民野, 不過呢啲鋪頭 (例如手提電話鋪) 未必啱遊客. 不過小食鋪可以一試.

繼續直去, 向一蘭拉麵方向進發, 後面係好似表參道咁既隱世小店.  我隨手影左少少相比大家參考下, 有興趣既, 自己搵啲小路行入去逛下, 可能有唔錯既收獲.







正所謂白天一個世界, 夜晚又一個世界. 夜晚既天神最出名係乜? 當然係屋台啦. 不過最好view既屋台, 梗係我上次介紹比大家既中洲屋台啦.




天神地下街 (既地面) 馬路既兩邊都有幾檔屋台, 呢幾檔都幾多人幫襯, 不過上回講過, 個個黎到都話屋台太貴又唔好食. 加上呢度坐街邊, 連View都無.  想試既朋友都係去中洲屋台啦.


交通指南
點樣黎天神就係人都識架喇, 由博多搭地鐵黎都唔駛10分鐘. 搭¥100巴士黎又得. 
離開天神的話, 去博多既地鐵尾班車係00:14. 所以大家可以放心行街.


福岡篇相關文章:

註: 本文地圖取材自谷歌地圖

沒有留言:

張貼留言