2018年5月24日 星期四

福岡篇 - 博多ふ頭 (博多埠頭 / Hakata Port)


東京就有築地市場, 去大阪就有黑門市場, 連沖繩都有牧志公設市場. 咁博多無理由無個食魚生既市場掛? 除左食魚之外, 仲有個免費既塔比你上去睇下. 想唔想知呢度係邊度? 

其實一睇標題就已經知啦, 呢度叫博多ふ頭 (博多埠頭). 由博多搭巴士過黎只需20分鐘咋. 我地由落車點開始睇.


上圖就係巴士總站, 無論你落車定上車都係呢度.  而巴士後面紅色鐵架嗰個就係其中一個景點, 博多塔喇!


博多塔







博多塔唔係話好高, 得103米, 但係唔好因為咁就睇小佢. 因為佢係東京鐵塔既兄弟黎架, 仲要係最細個細佬添, 因為東京鐵塔博多塔都係出自同一個設計師之手!! 而且, 博多塔仲要係免費上塔既添, 所以好值得大家去.


Bayside Place HAKATA





上完博多塔, 過番黎商場呢邊. 從上圖可以見到, 呢個商場由三座大廈組成, 當中 C 館 就有呢個兩層樓高既水槽. 不過除此之外, 無乜特別店鋪, 可以直接行過去 B 館.







B館 就係今集既主角, 灣岸市場喇. 市場入面好似街市咁, 乜都有得賣, 但係重點梗係魚生啦.




灣岸市場入面, 有呢間博多豐一既食肆. 大家從上面張相就睇到, 一個雜錦海鮮丼都只係¥1280. 咁就夠? 未夠!!






除左成碗丼咁叫之外, 呢度仲有一個壽司吧, 當中最吸引既就係件件¥97. 你無睇錯, 真係件件¥97, 即係7蚊港幣左右咋!! 當中就連海膽, 金槍魚 (まぐろ), 甚至係拖羅 (とろ) 都一樣價錢. 大家從上面相片睇到, 淨係拖羅都有三四種, 我叫左兩盤返黎, 都係百拎蚊港紙, 再叫杯野飲就可以坐喺度望住個海景慢慢嘆. 爽呢🤣🤣



當然啦, 你想叫小食既話係無任歡迎既. 上圖啲蟹仲識郁架!! 有冇人想食炸蟹?



交通指南:



從地圖可以睇到, 其實博多ふ頭距離天神博多都唔係好遠, 由博多出發, 車程約20分鐘; 天神出發就15分鐘. 我地先睇下博多出發點搭車先.

博多出發

要搭巴士, 就先要搵博多西口F月台. 位置係之前介紹過既0101商場對面. 亦即是西日本銀行門口.
拿, 永遠都係呢張相, 橙紅色嗰座就係西日本銀行, 自遊行既朋友去邊都要認住佢. 今次就係去呢度搭巴士.



F月台呢度有兩條巴士線可以去到博多ふ頭, 就係46同99. 大家睇到99號班次都幾密, 一小時有四班車. 46號要小心, 部份班次佢會以天神做總站, 即係不經博多ふ頭, 所以最好搭99, 如果咁岩有46埋站就睇清楚佢車頭去天神定係去博多ふ頭.
未搭過日本巴士既朋友提提你, 日本巴士係車尾上車, 車頭落車兼落車時比錢的. 如果你打算比現金的話, 上車時記得一人拎一張整理券, 因為日本巴士係逐個站計錢的. 如果你用IC咭(八達通, 例如Suica) 的話, 上車拍卡, 落車時再喺前門再拍一次就可以.


車箱有落車提示的. 不過唔駛擔心, 呢個站係總站, 你一定要落車.


回程去天神
回程的話, 呢度有兩個巴士站, 一個寫明去天神方面 (上圖), 另一個寫明去博多方面. 其實兩個站只係一前一後行兩步就係. 本人比較推薦大家回程直接去天神, 一黎車程短二黎天神有得行街.
識唔識睇日本巴士路線圖? 由右至左, 上至下睇. 46, 46-1, 161同63號巴士線都可以去到天神, 車程14分鐘. 天神大丸前或者天神コア前落就岩架喇. 所以相對黎講, 如果你再由天神出發去博多ふ頭的話, 行過對面搭番同樣編號既巴士就可以.


後記: 今日我介紹既係博多ふ頭, 唔好睇錯去錯中央ふ頭呀!! 好衰唔衰, 中央ふ頭又係有座塔, 仲要再出名啲, 叫福岡塔. 福岡塔高好多, 不過要比錢上塔的. 唔好搞錯呀!! 博多塔先係免費架!



福岡篇相關文章:
天神
註: 本文地圖取材自谷歌地圖

沒有留言:

張貼留言