沖繩單軌火車 Yui-Rail 及那霸景點簡介

無論係第一次睇小弟既文筆既, 或者係已經一直追開ThatsWhy’s Travel既朋友, 我都歡迎大家黎到呢個新居, 以後所有新文章都會喺呢度首發左先. 大家覺得有用既隨便SHARE比你既朋友, 再比個LIKE小弟啦. 新地方當然有新主題啦, 而新主題就係近期越黎越多香港人去既沖繩喇, 未來既呢幾個月, 我都會好集中咁介紹沖繩好食好玩好睇既地方比大家. 如果大家睇到悶, 又或者有啲地方你將會去想我寫左先既話, 無問題的. 請大家互動一下就可以. 講完廢話要入正題了:

沖繩既市區, 即係那霸, 只有一條鐵路, 就係Yui-Rail單軌火車. 呢條鐵路連接住那霸市市區同那霸機場的, 所以自遊行既人士一定要識搭單軌.

從那霸機場既國內線航廈, 沿住天橋同指示行出去, 就會去到單軌火車既總站 - 那霸空港站.

而那霸空港站就係全日本最西面既站, 所以總站度有塊咁既石做紀念.

總站入面既呢幅地圖, 可以睇到那霸市全貌之外, 仲有Yui-Rail全線既路線圖同埋各站之間所需既時間, 例如由那霸空港去國際通(即係 "県庁前駅")既話, 就要13分鐘.

一般黎講, 搭一兩個站既收費約二百幾YEN, 其實貴過東京既JR. 不過咁, Yui-Rail有一天任搭既PASS, 收費係￥700, 兩天任搭仲平, 只需￥1200. 咁計落只要你來回三次既話已經回番本, 所以如果你係打算那霸市自遊行既話, 來回酒店同國際通已經搭左兩次, 再搭多一個站就已經抵晒了. 

上圖就係一日乘車券, 睇唔睇到我係2月6日下午12:22分買呢張飛的(左下方個日期), 但係張飛既有效期係2月7日既12:22? 無錯喇, 呢個就係我要醒大家既野喇. 沖繩單軌既一日券係用24小時計算的, 非常均真!! 所以每一位去沖繩自由行既朋友都唔好諗喇, 每人買一張兩日PASS就岩架喇, 兩日後再買既時候, 夜少少回程返酒店前先好買, 咁樣分分鐘可以慳埋最後一日去機場嗰程車錢. 記住喇! 

Yui-Rail一共有15個車站, 全長12.8公里, 唔係好長. 當中有幾個車站你一定要識既, 因為係旅遊點或者轉車站, 以下既車站我都會在日後另外開文分別介紹, 唔好錯過呀:

那霸空港駅 - 除左可以上機之外. 仲係好幾條巴士線既總站(例如美ら島水族館), 另外, 每個鐘頭有一班95號巴士去ASHIBINAA OUTLET, 臨上機前去掃貨就岩晒喇. 

赤嶺駅 - 赤嶺站係最日本最南端既車站. 亦都可以轉巴士去ASHIBINAA OUTLET. 又或者行去 "古著倉庫".

小祿駅 - 呢個站最重要既係旁邊既一間大AEON, 入面有兩層係商場, 連UNIQLO都有. 最正係每晚九點後有特價魚生賣, 每晚返酒店前我都會去買番夠本返酒店食. 

壼川駅 - 旁邊有間唔錯既沖繩美居酒店Mercure Hotel. 呢間酒店最方便既係, 佢地下大堂有個租車Counter, 租完車佢會渣部車出酒店門口比你驗車, 唔駛煩. 酒店旁邊仲有個多層停車場, 過夜泊車只需￥500. 

旭橋駅 - 如果大家需要搭長途巴士去美國村或者沖繩北部(例如名護) 就需要去 "那霸巴士總站 （那霸バスターミナル）" 度搭長途巴士, 而那霸長途巴士總站, 就係旭橋站旁邊. 另外, 我仲會介紹一間當地好出名既任食串燒比大家, 鋪名叫 "串角".

県庁前駅 - 那霸市內無乜特別景點, 最出名既係 "國際通" 步行街, 而國際通既入口就係県庁前站喇.

牧志駅 - 國際通既另一邊入口, 呢度仲有個好出名食堂叫 "牧志公設市場". 

おもろまち駅 - 中文名應該譯做歌町站(維基百科話). 呢個站旁邊就係沖繩既Duty Free喇! 
Duty Free旁邊仲有個大商場叫Naha Main Place, 呢度買野超級平. 再旁邊有間蘋果超市同玩具反斗城, 再行過少少仲有RAKUICHI 樂市. 

首里駅 - 最多人去既當然係首里城啦, 不過我無去過亦唔會介紹, 大家想去就自己去啦, 交通方法遲下會教大家, 哈. 不過我會介紹大家去一間 "知念菓子店" 度食糖果.

最後, 補番Yui-Rail既官方網站比大家睇, 入面有不同時候既優惠, 例如14年2月筆者去既時候就會MONORAIL+觀光巴士既PASS了.
http://www.yui-rail.co.jp/index.html