海女篇 - 久慈交通指南

今集係海女篇既最後一集，亦係交通指南。久慈話晒都係北三陸地區，由東京出發計當然要搭新幹線，而搭得新幹線就一定要買PASS，所以今集既內容主要介紹兩種不同既JR PASS，不同既PASS係有指定可以乘搭既車，所以大家要留心自己買既係邊種PASS黎去決定以下邊一種交通方法。首先又睇下地圖先。

從上圖可以睇到，久慈位於日本島既最右上角咁滯，由東京出發，要搭東北新幹線去二戶或者八戶轉車。詳請如下：

JR東日本鐵路周遊券（東北地區）

提提大家，2016年4月1日前以上呢種周遊券叫做“JR東日本通票”。用法大致一樣，都係可以由售票日起計，14天內任揀5日使用，任搭JR東日本旗下既任何火車線（包括埋機場既N’EX線同新幹線架！），呢5日不需要係連續用，即係你打散隔幾日用都得。唯一既分別就係加左價，仲要可以去既地方少左。不過呢篇文章出街既時候已經無左JR東日本通票所以唔再講喇。

講番JR東日本鐵路周遊券（東北地區）呢張，大家可以用佢黎搭東北新幹線，去八戶站，車程約2小時54分。然後再從八戶站搭JR八戶線直達久慈，車程約1小時43分。

大家早前有留意新聞都知，依傢東北新幹線可以直達北海道了。

到達八戶，搵八戶線月台。不過搭鐵路咁普通點對得住讀者？今次我揀左全日得一班車的觀光列車Resort Umineko班次既車坐，有咩咁特別？睇相啦。

呢部車既第一卡車箱（即係上圖）係指定席來的，不過唔駛加錢，只要你預早預約就可以（好似搭新幹線咁去JR服務中心就可以）。特別之處就係單排既坐椅可以擰黎擰去，方便大家望海！好正架！一齊睇下相啦。

JR日本鐵路通票

第二個前往久慈既方法就係使用JR日本鐵路通票。呢張通票同東日本嗰張最大既分別，就係呢張PASS可以通行全個日本，如下圖：

大家成日都好想問點樣來回大阪／名古屋同東京，都係靠呢張PASS。去得全日本當然唔會平，7天連續任搭的話成人收費係￥29,110。記住，係連續7日，中間唔可以斷，唔搭就你自己蝕底。不過咁，呢張PASS除左可以搭JR火車之外，仲可以搭JR巴士，所以就有以下前往久慈既方法，就係由東京出發，搭東北新幹線到二戶，車程約2小時42分，轉JR巴士直達久慈，車程約一小時。

二戶站到著！

記住係東口出，西口個巴士站係地區線來的，東口呢個先係去久慈既長途巴士站。順帶一提，上圖已經貼左巴士既時間表比大家睇，不過你唔駛睇都得，因為巴士開出時間係夾正東北新幹線到站時間的，你落左車之後大約有10分鐘時間轉巴士，反而亦然，巴士到達二戶站既時間，亦係大約有10分鐘時間比你轉東北新幹線出東京。呢個當地人出入市區既方法黎架！

巴士到，寫到明係前往久慈駅的。上車訓一覺啦。

到站，無PASS的話，單程車費係￥1,540。所以如果想慳錢既話，就買東日本鐵路周遊券（東北地區）喇。另外，如果有人／網頁教你搭去盛岡轉巴士去久慈的話，呢個係搜尋引擎得出黎既結果，你叫佢自己試一次先講啦。


最後，我想借呢個機會多謝久慈觀光公社既Yuko小姐。今次既旅程可以咁順利全靠佢提供既資訊。大家都明白久慈呢啲無乜香港人去既地方，莫講話旅遊書，甚至連一個中文網站都無。於是我就電郵過去觀光公社希望了解下交通同酒店。結果佢空郵左一大份當地既旅遊資料過黎比我，仲送埋海女劇集既明信片添。淨係空郵都要成百蚊港紙，都仲未計佢心意，佢仲驚我睇唔明日文，搵張紙仔用英文解釋番比我聽。講明先，我無同佢講話我係寫旅遊BLOG架，完全係用一個遊客既身分去問。所以我非常感謝Yuko小姐。亦希望大家多多支持久慈市。 

下一集我會介紹另一個新興既日本旅遊點，就係三島吊橋Skywalk帶大家睇富士山。下集見。


JR東日本鐵路周遊券（東北地區）
http://www.jreast.co.jp/tc/eastpass_t/index.html

JR日本鐵路通票
http://www.japanrailpass.net/zh/index.html


(本文JR地圖取材自東日本旅客鐵路網頁及JR日本鐵路通票網頁)