海女篇 - 久慈

今天為大家既呢個地方，應該無一本香港旅遊書介紹過。就係日劇《海女》既拍攝場地，久慈。

久慈位於日本東北面既岩手縣，係一個海邊小鎮。人口唔多，平時無乜人會留意到。但係一套日劇既出現，令到呢度變左個旅遊勝地，亦都突出左呢個地方既幾個特式。

北之海女

第一個特式，就係海女。海女其實解作以潛水捕漁方式作業既女子。其實除左久慈之外，韓國既濟洲亦都有海女。不過由於久慈呢度係全球最北方有海女作業既地方，所以呢度既海女又稱為北之海女。佢係仲要係徒手蔽氣咁潛入水入面捉海膽，遊客除左可以現場參觀佢地潛水之外，佢地仲會即場開海膽比你食。日後既文章會有詳細既介紹。

琥珀王國

第二個特式就係琥珀，久慈係其中一個最古老開採琥珀既地方。所以呢度既琥珀非常有名，質量仲好好。呢度有間琥珀博物館，可以比大家參觀同購物之餘，仲可以比大家試下打磨琥珀，同樣地，日後既文章會有詳細既介紹。

三陸鐵路北谷灣線

日本既係一個小村落，都總有一條好有紀念性既鐵路，而久慈呢度就係呢條三陸鐵道北谷灣線喇。大家可以見到，火車上面係無電線的，無錯，佢係柴油車黎架！

久慈觀光篇

久慈係呢個市既中心，所以呢度有街市，有超市，火車同巴士總站都全部喺晒呢度。一如平時既鄉下建設，所有建築物都係圍繞住火車站黎興建的。所以我地由久慈站呢度開始周圍行下。

三陸鐵路久慈站

以上就係久慈站喇，除左可以買車飛之外，大家見到呢度仲有紀念品買，車站亦都貼左劇中飾演兩位車站職員既相片。（杉本哲太同荒川良良大家應該好熟悉啦）

久慈巴士總站及ＪＲ久慈站

呢個巴士總站，有長途巴士直達東京市、盛岡同埋二戶。稍後既文章會詳細教大家點黎久慈呢度，大家可以放心。而ＪＲ久慈站就係JR八戶線既總站，另一邊總站就係ＪＲ八戶站，ＪＲ八戶站係東北新幹線既其中一個分站，所以去到ＪＲ八戶站時可以轉新幹線去北海道或者東京、大阪等地。

まちなか水族館

雖然呢間鋪個名叫水族館，但係入面有一層係放左好多日劇《海女》用過既戲服同埋用具，當中連劇中既火車站場景都搬左入黎呢度。加上呢間水族館係免費入場的，所以呢度係遊覽久慈必去既景點。

《海女》店

呢間鋪一睇就知係專賣日劇《海女》既紀念品架喇。呢度仲展出左好多劇入面用過既道具，包括上面呢個劇中久慈地型模型。見到實物既呢一刻，真係好感動呀！

字數所限，所以下一篇文章再會介紹久慈既飲飲食食。