箱根篇之 大涌谷(火山)

由強羅出發要上大涌谷. 先要搭箱根登山纜車去到早雲山, 再轉箱根吊車上大涌谷. 纜車車程約10分鐘. 吊車就10分鐘左右.

同香港既纜車一樣, 兩卡車, 斜住坐咁上山的. 上圖係幾個中途站, 其實每個站都好近.

到早雲山, 超多人. 跟住人行你又行, 就會去到吊車站.

箱根篇之 強羅

上回講到, 當你離開箱根湯本之後, 如果你係繼續上山的話, 咁就要搭箱根登山鐵路. 呢條鐵路好特別, 其實應該話佢同阿里山鐵路係一樣, 採用來來回回爬山既方式上山的. 所以部車係一時向前行, 一時向後行. 來來回回約40分鐘就會去到強羅. 而中途既站, 除非你要去酒店或者特別既景點. 否則係無需落車的.

如果你唔可以坐 "倒頭車" 的話, 咁就最好去車頭或車尾坐打側坐既位了. 另外上圖寫住, 冬天係會開暖氣的, 發熱線喺你既座椅下面, 所以小心唔好燙傷. 不過冬天個個都應該著長褲架啦??

箱根篇之 桃源台 (海賊船)

整個箱根大涌谷遊, 我地搭過火車, 纜車, 吊車. 除左吊車之外, 另一個最令大家期待既係呢一站, 桃源台搭海賊船了.

去桃源台好簡單, 由大涌谷搭落山既吊車就可以. 車程約20分鐘. 桃源台好方便, 樓上係吊車總站, 樓下就係碼頭. 唔駛驚唔識路. 呢座大樓有一間便利店, 亦有一間餐廳. 基本上呢度無必要停留. 直接搭下班船就可以. 唯一要小心既係尾班船既時間. 呢點要視乎你既行程. 印象中下午五點左右就係往元箱根港同箱根町港既尾班船.

箱根篇之 箱根湯本

上文講到, 箱根湯本係箱根(大涌谷)之旅既起點, 亦可以話係終點. 講多一次. 搭小田急Romance Car既乘客係可以直接喺 "箱根湯本" 站落車. 而搭JR及小田急普通列車的乘客就要喺 "小田原" 落車再轉小田急線火車入黎.

如果你係即日來回既話, 咁就唔好浪費時間, 一落車過直接行過對面月台, 搭箱根登山鐵路上強羅. 黃昏回程既時候先好行箱根湯本. 如果你會留幾日的話, 咁你就反而先要喺箱根湯本呢度買D小食, 食飽野先再上路. 簡單D咁講, 上左山之後就無啖好食的. 又先睇下地圖.

箱根總覽（箱根湯本，大涌谷）

箱根係一個泡溫泉既好地方，跟據小田急既介紹，淨係箱根內既著名溫泉旅館已經有17間。仲未計遠少少既仙石原同御殿場既溫泉。另外，去箱根既另一個目的，就係上火山（大涌谷）了，大涌谷最出名既就係黑色雞蛋（黑玉子蛋）了。最後當然唔少得坐海盜船遊覽蘆之湖啦，聞說蘆之湖既湖水係暖架喎@@"　好喇，喺介紹之前，再長氣Ｄ講多一次。地方太大既景點我會分幾篇黎寫，而呢一篇（即係本文）就會係總覽，先簡介每個景點有咩好玩好食好睇。等大家方便Ｄ去PLAN行程，之後會有獨立既篇章去介紹唔同既景點。

開始之前，有一個問題係我當時出發前搵極都無答案既。就係一日來回箱根連大涌谷可唔可行既呢？答案原來係：可以既！筆者就係朝早十一點左右由新宿出發，夜晚八點左右由箱根湯本走。中途仲可以去埋強羅，再搭吊車上大涌谷，再坐埋海盜船去元箱根港，兜一個轉再番翻去箱根湯本走，玩齊咁多種交通工具添。唔明我講緊乜？咁睇地圖先啦。