達思怪遊世界 ThatsWhy's Travel: 沖繩篇

2016年6月5日星期日

沖繩篇 - 牧志公設市場

每一位去日本既遊客，都一定會試下當地既魚市場，就好似東京既築地、大阪既黑門市場等等，而沖繩既魚市場就係牧志公設市場喇。不過如果你真係跟住旅遊書咁去揀海鮮既話，比人劏都似。唔想比人呃就要留意本篇內容。

想去牧志公設市場，就要搭單軌火車，牧志站出就係，一出閘就有中文指示牌。

沿住國際通大街行５分鐘就到，行到見到激安之殿堂，之前一個入口，即係市場本通リ就岩架喇。

一路行入去，就會見到下面個大招牌。

再望下右手邊，就會見到下面個入口指示。

牧志公設市場有地下同二樓兩層，同香港既街市一樣，地下係街市，有乾貨亦有濕貨（即係海鮮啦）；而二樓就係熟食中心。根據旅遊書介紹或者一般日本魚市場既習慣，食家係先喺地下揀海鮮，揀好晒之後就拎上二樓搵間大排檔加工。不過我話比大家知，喺沖繩呢度唔係咁做的！唔好心急，睇晒相先，留番最後先講。

牧志公設市場呢度有兩樣必食既野，上圖有齊晒架喇，先有龍蝦刺身，非常鮮味，價錢約６００－１０００港幣視乎龍蝦大小，都幾貴架，人多些牙就無乜所謂。跟住落黎就係右手邊既夜光貝，沖繩特產，一般既食法係一半做刺身，一半拎上二樓比大排檔做鹽燒，而最細隻既都要１５０港幣左右。

買完之後，店員會好似好關心你，驚你唔識路咁帶埋你上二樓坐低的。（好明顯有利益輸送啦），根住你望住個餐牌，又唔可以淨係叫個白飯黎餸魚生當丼咁食，但係你明明唔係想黎食小炒。所以最低消費地叫左兩杯野飲。呢個時候你既感覺就會好似人在異地，比人禁住黎劏咁，仲要樓下劏完樓上再劏一次。今日等我教大家當地人既食法啦！

原來當地人係同旅遊書所講既調番轉，先上二樓，搵左你岩食既大排檔先。根住佢會介紹你落去指定既海鮮鋪買料（都係利益輸送架喇）。由於樓下既魚生大部份都係明碼實價，隨左龍蝦同夜光貝要磅之外，所以都唔會比人呃得去邊。比多個貼士大家，當地人話，一上扶手梯轉左，最尾嗰間係最好食的，不過筆者去當日見到懷疑係當地人話好食既大排檔超多人，所以只係去左樓下指定既一間食。大家下次去既時候，記住留意下睇下係咪真係咁好食。