東京兩大機場 - 成田機場 & 羽田機場 (15年2月21日更新)

今日介紹東京既兩大機場 - 成田機場同羽田機場. 如果以航班黎計, 成田機場會比羽田機場多機啲. 但係飛行時間其實係差不多的. 最受香港人歡迎的時間有兩段, 其中一個係香港時間00:50至02:00香港起飛, 05:30至06:30日本落機(日本時間); 另一段係09:00至10:00香港起飛, 14:00至16:00日本落機. 前者零晨機有個好處, 就係你可以星期五晚出發, 星期日晚夜機返香港都趕得切. 呢班機筆者試過一次, 不過依傢老了, 太辛苦頂唔順. 加上咁早JR旅客服務中心未開門. 所以如果你第一次去, 又或者想到埗先買JR PASS的話, 筆者就不會介紹你搭零晨機.

成田機場 及 羽田機場 交通比較

雖然地理位置睇, 羽田機場係近過成田機場多多聲. 但係講交通方便就的確係成田多車揀一點, 不過因為路程較遠所以一定會比較貴. 羽田機場一般黎講都係搭MONORAIL(單軌鐵路)去濱松町站轉JR山手線去沿線目的地. MONORAIL車程約20分鐘, 但係再轉JR山手線去新宿又要多24分鐘. 咁計埋轉埋車都要50分鐘左右了. 而今時今日, 成田機場推出左Skyliner, 由成田機場到日暮里都係37分鐘, 再轉JR去新宿約20分鐘. 所以現今黎講, 時間不會相差太遠. 以下有詳細既介紹.

由於JR官網無好靚仔既地圖, 而筆者又唔想偷人地BLOG既圖, 所以只可以用我有限既小畫家黎畫. 係唔岩比例架喇, 大家認住各地點個位置就可以, 其他野就張就下啦. 

羽田機場 往東京市

上文提到, 羽田機場出市區最好搭MONORAIL (單軌鐵路), 由羽田機場出到濱松町站, 特急班次車程約14分鐘, 一般班次車程約19-24分鐘. 去到濱松町之後, 可以轉JR山手線逆時針方向可以去到新橋(轉百合海鷗號去台場), 東京, 秋葉原, 上野. 順時針方向可以去到澀谷, 原宿, 新宿, 池袋. 由濱松町計, 搭JR山手線去新宿約24分鐘, 涉谷約18分鐘, 東京約5分鐘, 秋葉原約9分鐘. 基本上大部份旅遊點都可以經JR山手線去到晒.

成田機場 往 東京市

成田機場有兩個快速舒服既方法出市區, Skyliner同N'EX. 先講Skyliner. 

Skyliner

它是近年新建成的高速鐵路, 時速達160km/h, 所以最快可以約37分鐘出到日暮里. 之後轉JR山手線往新宿約20分鐘, 池袋約15分鐘, 東京約15分鐘. 單程收費￥2400. 同羽田機場無得比的, 快是要代價.

如果你想平啲, 慢少少都可以的話, 可以搭Skyliner的普通版 - 京城電鐵. 約70分鐘到上野, 比Skyliner平大約￥1000. 路線同Skyliner差不多的, 只係中途要停站, 目的地都係去日暮里或京城上野(上野).

N'EX

係JR公司既成田特快. 雖然叫做特快, 但係事實上唔係好快, 成田去新宿要104分鐘. 去東京要81分鐘. 不過好處係豪華同方便, N'EX有香港機場快線既質素, 加上係唯一直接去到東京同新宿等地區既鐵路, 仲有部份班次係可以直達橫濱咁遠. 所以貴一貴都有咁多遊客搭. N'EX中途站有: 東京, 品川, 澀谷, 新宿, 池袋, 橫濱.

JR 機場PASS優惠

2015年3月14日開始, 只係玩左一年都無既N'EX東京單程直達車票優惠就會取消. 取而代之既係￥4000, 14天內N'EX來回優惠, 今次真係抵到爆炸!!

呢個優惠是咁的, 只要你由成田機場出發, 就可以到東京市任何一個JR車站落車, 去到最遠可以去到大宮, 橫濱同埋大船都得. 不過唔單止咁, 其實你只要唔好出閘, 就可以任你轉JR旗下任何路線於東京市內任何一個站落車. 例如原宿, 秋葉原, 甚至係奧多摩都得. 呢一個安排係方便大家去非N'EX 停站既地方既, 但係一定要記住唔可以出閘, 食左你張票你就要再買票架喇. 跟住, 14天內, 同樣可以由JR旗下任何一個站上車, 唔出閘咁轉N'EX去機場. 來回加埋只需￥4000. 今年呢個優惠抵過去年￥1500單程多多聲, 因為回程正價要幾千YEN架!!

詳細東京市內如下圖(可按圖放大):

購買地點係成田機場二航廈地庫(搭地鐵的樓層), 見到下面呢塊版. (係要寫明Travel Service Centre呢個先係旅客用的)

羽田機場又點算呢? 買關東PASS又好似唔太抵, 始終Monorail又唔係好貴, 不過咁, 原有既Monorail+山手線優惠並無取消到, 仲無加價添 @@"

呢個優惠只適用於逢星期六, 日及公眾假期使用, 使用返法好簡單, 只要你喺羽田機場, 於售票機揀 ￥500山手線優惠 就可以買到, 唔駛去客戶中心買的, 所以好方便. ￥500係包左你由羽田機場單程去山手線任何一個站落車. 比就咁買飛平200-300YEN左右啦, 好過無. 不過當然, 又係果句, 只要你唔出閘既話, 你轉邊條線都得既, 好似筆者就試過由羽田出發, 到達濱松町轉山手線去東京再轉中央線(快速)去新宿. 只要你係山手線沿線落車就可以. (至於點解我咁轉? 因為我覺得咁樣去新宿快D)

(本文部份圖片取材自JR EAST RAILWAY COMPANY及京城電鐵網站)