夢京都 - 租和服店
門口並唔係十分顯眼, 因為間鋪位於2樓. 不過由於左鄰右里都唔多鋪, 所以唔會難搵. 講番預約個程序, 大家去到夢京都個網會見到係中文的, 店員唔識中文不過識英文, 溝通無問題的. 你只要預早兩日去佢個網預約, 揀好日期, 時間同埋你想租幾多套就可以. 其他配飾可以去到先加錢租都未遲, 不過如果你想佢SET埋頭就最好預約時TICK定, 方便佢預人手同時間. 每套和服日租¥5250, 包你玩一日(雖然店收晚6, 不過佢會叫你5點要返黎換衫), 佢會幫你著好晒, 再比對木屐你著的. 就好似下面我老婆豬咁.
講完夢京都, 要入番今日正題, 講清水寺. 每次入正題第一步做既招牌動作, 就係睇地圖, 今次由於地方太大, 所以有兩幅地圖添. (按圖可以放大)
清水寺
從第一幅地圖可以見到, 夢京都距離清水寺都幾遠, 位於二寧板既附近, 不過二寧板本身已經係一條購物街, 所以你點都會去的. 不過最差既係, 停車場距離清水寺已經夠遠, 由停車場去二寧板步行既話要15-20分鐘. 無法啦, 鬼叫日本人唔會隨街泊車咩. 我地睇下二寧板既相先.
尾二張相大家會見到最後面有條樓梯, 好多人起呢度影相的. 之後大家沿住地圖, 經過三年板(同樣有一條長樓梯比人影相), 再經過松原通, 就會到達清水寺既正門.
入去喇. 入場費¥300. 唔駛咁心急比錢住, 行到入面好入先見到購票處的.
女孩子最喜愛黎清水寺呢個戀愛占卜神社架喇. 上圖塊石頭大家有睇過日劇既都會知道, 又係例牌蒙住眼行唔知幾遠, 如果撞到塊石頭既話, 表示恩緣到.
之後再行經過一個靈泉, 叫做音羽之滝.
靈泉有三條水柱, 分別代表左學問, 中戀愛, 右長壽. 旅遊書話, 每人只可以揀一個泉水黎飲, 貪心飲埋旁邊既就會唔靈, 再貪心者反而有惡運. 泉既旁邊有部紫外光燈消毒機, 入面放好晒飲泉水用既長杓, 大家飲完放番入去消毒, 下一位就已經可以即刻拎黎用. 不過我眼見多數人都係裝水入樽就算, 唔會直接拎支杓黎飲. 但係最令人討厭既就係相入面呢班強國遊客, 排隊果陣得幾個人, 排到之後就變左十幾人湧出黎斟水! 仲要每人每一個泉水都斟到滿一滿先肯走! 如果貪心真係有惡運既話, 呢班人我祝佢地.......(算!)
回程......
當然會經過松原通, 呢個時候先買野同飲野就岩晒喇.
跟住又去番三年板.
再去到二寧板.
還衫, 跟住行番去攞車, 踩番去JR京都. 京都篇暫告一段落. 要到2015年2月後, 等筆者從沖繩返黎之後先會有新既沖繩篇更新. 多謝支持本Travel Blog. 祝各位聖誕快樂, 新年進步. 2015年再見.
(本文地圖取材自谷歌地圖)
沒有留言:
張貼留言