川越係一個充滿江戶時代感覺既地方, 筆者都係因為上面既相片, 所以吸引左我去一睹川越既風采. 川越最出名既係 "一番街 ", 基本上去得川越都係為左去一番街. 依傢睇下地圖先.
川越有三個地鐵站, 但係你只要識 "本川越" 同埋 "川越" 兩個站就夠. 而一番街就位於地圖既正上方. 由地圖中大家可以睇到 本川越 同 川越 站係兩條獨立既路線, 所以不能互通. 不過無論你 本川越 定 川越 站出發去一番街, 都係搭同一部巴士就可以去到, 所以唔駛擔心.
旅遊書會教大家由西武新宿搭西武新宿線直達本川越. (不過當然又係中伏既方法) 不過點都介紹下啦. 首先提醒下大家, 西武新宿站並唔近JR新宿站, 兩者雙差10分鐘步程, 如果你唔想行既話, 可以好似我咁, 搭JR山手線去高田馬場轉西武新宿線.
由高田馬場(與西武新宿只係相差一個站, 車程不足兩分鐘)出發去本川越站車程約50分鐘, 車費係¥480, 如果你想快少少又保證有位坐既話, 可以好似我咁, 搭特急車, 車程43分鐘, 不過要比多¥410.
去到本川越站, 呢度其實係一個商場, 商場既正門就係巴士站.
商場既地面層有個旅遊服務中心, 職員識英文同普通話, 可以拎少少小册子, 不過睇完我呢個BLOG, 你攞唔攞都無所謂架喇. 最重要既野小册子都無寫. 而上圖就係巴士站, 不需要過馬路, 面前呢個方向岩架喇, 搭 "越01" 線巴士, 5分鐘左右就到一番街, 班次好密的, 約5-10分鐘就會有車. 日本既巴士係設有找續的, 上限1000YEN紙幣, 呢程巴士車費係¥190.
落車既站就係 "一番街", 巴士上面有電子牌提示落車的, 不過你望住周圍既街景, 都會知道自己入左一番街架喇, 以下係一番街既相, 相片眾多, 睇晒先講吧.
筷子台黎架!! 係咪好靚呢? 不過好貴=.="
大雪到不得了, 個個都努力鏟雪.
呢兩粒野係川越既出名食品, 兩粒好似湯丸咁甜甜的, 而外面就好似冰糖葫蘆都係甜既醬, 好平又好好食.
睇到呢度先, 筆者要介紹以下兩個地方, 其中一個係 "時之鐘" , 時之鐘位於一番街正中間既一條橫街度, 你會見到下面呢個交通燈就識去, 一入左橫街行兩步就到.
大雪到中文解說既地方遮住左, 大家想知個鐘既由來就要睇日本或者英文了. 跟住筆者會帶大家去一番街博物館, 入場費只係¥100, 不過唔係好大架咋, 同埋入屋要除鞋.
呢度介紹左江戶時代既川越係點既, 好似係一個將軍住既地方, 而周圍既房屋就係咩咩左衛門, 右衛門住既, 之後仲有咩咩論資排輩咁分落去, 形成一條街咁既墟. 大家自己去睇下啦.
跟住回程又係好簡單, 去番你落巴士既對面就會有個巴士站, 有兩部巴士比你揀, 一部去川越站(經本川越), 一部去本川越. 而筆者就揀左去川越站.
巴士總站位於川越站既東口, 所以如果大家係由市區黎到川越站的話, 記住東口出轉巴士去一番街了. 呢度除左有JR線之外, 仲有東武東上線搭.
大家睇到啦, 搭東武東上線 急行既話, 30分鐘就去到池袋, 所以大家可以預半朝黎川越玩, 下半日去池袋. 唔單止咁, 東武東上線部份既班次係同副都心線直通運轉的, 簡單講, 即是話呢度有車直達副都心線既東新宿及新宿三丁目站, 仲可以遠達原宿同澀谷, 甚至去橫濱都無問題. 所以成日都話旅遊書教人搭車既方法都唔一定係最好的. 而筆者今次揀左去池袋食晚飯.
周圍都係雪! 再見川越, 有排都唔會再黎了.
(本文地圖取材自谷歌地圖)
沒有留言:
張貼留言