原宿 (竹下通/原宿通, 表參道, 明治神宮) 2014年2月更新

早前有篇報導, 選出外國遊客眼中日本必到既景點. 意外地, 排首位既竟然係原宿!! 當然, 筆者並不反對原宿是一個出名的旅遊點. 可是, 去過既朋友都應該會覺得, 原宿其實即係一個旺角, 一條女人街, 好多平價衣服賣, 亦都係年青人既潮流點. 但係如果講FASHION, 涉谷先至係潮既指標! 原宿一味夠MK. 點都好啦, 原宿呢一站遲早都要講架喇, 就襯住依傢咁出名就寫左呢篇先啦.

一般黎講, 介紹得原宿就會講埋表參道同澀谷. 原因大家從上面個地圖可以睇到, 其實呢三個地方好近, 真係行都行到的. 另外就係, 呢三個地方好多人都會同一日去埋, 一黎近, 二黎作用都係血併買衫! (我老婆豬都係 =.=" )

先講原宿, 去原宿好簡單, 搭JR既話, 正正就有原宿站(距離新宿兩個車站而已), 而搭METRO既朋友, METRO係無 "原宿" 站的. 因為個站名叫 "明治神宮前". 如果你從JR原宿站落車, 呢個站得兩個出口咁大把, 一個叫表參道口(即係近神宮橋), 另一個就叫竹下口(對正住竹下通入口的). 所以一D都唔難搵.

( 上圖係表參道口既相)

見到上面呢個咁有標誌性既竹下通門牌, 一行入去就係竹下通了. 呢度有數十間賣潮流服既店鋪, 亦有少量吉野家同麥當勞既食肆. 一路行到尾就可以, 話長唔長話短唔短, 有人可以行兩三個鐘架! 睇下你有幾鍾意行街買衫了, 睇相!

呢幅係地圖, 右手邊就係JR原宿, 大家可以見到竹下通係一條長街, 所以一直行就可以, 中途有幾個分叉路既橫街, 有少量店鋪, 不過入左去都係要出番黎的.

竹下通真係日日都咁多人. 好喇, 當大家行到見到上文最後一幅相呢個圓柱形建築物既時候, 表示你已經行完整條竹下通了. 之後你可以向右手邊行去表參道. 表參道係一個好有文化氣息既地方, 有好多品味既賣亦有好多HIGH TEA既地方, 不過筆者唔係一個文人, 所以無去到. 又或者, 大家可以學我老婆豬咁來回咁行竹下通, 每次集中掃一邊既店鋪咁就唔會行漏. 

(以下內容2014年2月新增)
呢一兩年, 原宿開左好多新鋪頭, 仲開埋個商場, 所以越黎越熱鬧. 

上文講左, 當你去到圓柱形既建築物時, 代表你已經行完竹下通, 不過, 在圓柱形建築物既旁邊就係原宿通既入口......

Fashion既野筆者並唔熟, 不過原宿通感覺上係比較有品味同埋冷門野. 上圖就係原宿通既入口.

交通指南:
咁耐無講又提多次, 想去日本既朋友如果驚唔識搭車既話, 記得去筆者之前寫既東京鐵路介紹篇度下載番JR EAST及METRO既路線圖落黎旁身. 旅遊書果個夾埋晒一齊係睇到你暈的, 分開會易睇好多. 另外, 其實明治神宮前站並唔係好似上面地圖睇咁遠. 在JR原宿既表參道口出口旁邊, 已經有一個METRO明治神宮前站既隧道口, 可以行過去明治神宮前站的.

(本文部份相片轉載自谷歌地圖)