2018年12月11日 星期二

曼谷親子篇 - The Mall Bangkapi


第一次寫泰國, 肴望大家鍾意.  今日我地唔去日本, 唔去台灣, 去泰國黎個親子遊. 不過, 唔係搭車亦唔係搭BTS, 係搭船.  咁先夠特別丫嘛. 介紹下今集既目的地先, 最後先教你搭船.


The Mall Bangkapi




泰國既商場就出名大, 人地地方大好過香港, 連裝修都有心思過人. 呢個The Mall Bangkapi, 入面有真動物, 除左魚之外, 仲有隻鸚鵡, 大象就假既, 不過耐唔耐會發聲叫.

呢度樓高四層, 要行街既, H&M, ZARA等等都一應俱全, 而地下係大型超市同Food Court, 我地由地下開始行.



呢個咩黎?  紫外光消毒機, 你將啲刀刀叉叉放入去就可以消毒. 泰國不知幾衛生.




上到一二樓, 就係商鋪, 有Daiso, 仲有賣電話配件既角落.



上到黎四樓就係今集既重點喇, BNK48 Cafe (即係AKB48既官方泰國姊妹團體. 而旁邊就有親子樂園同戲院.


咁大個波波池正唔正先? 未夠? 仲有...
頂層室外仲有個親子樂園, 入場好似係幾十蚊泰銖. 不過, 講明先, 呢個樂園係玩亞熱帶森林feel既, 所以好似話會濕身. 帶多件衫黎替換就安全喇.

如果你個仔好大個, 唔玩呢個小朋友野咁點呢? 唔怕, 仲有...


呢邊有大型機鋪, 仲有卡拉OK室比你唱K, 好玩喇掛?


交通指南:
泰國好多商場都好隔涉, 呢個都唔例外, 不過要去呢個商場有一樣好特別既交通工具, 有左佢就幾隔涉都無難度, 就係坐艇.


Pratu Nam碼頭出發, 前往The Mall Bangkapi, 船程約30-40分鐘, 船費19泰銖(即係港幣$5唔夠), 抵喇掛.

Pratu Nam即係水門市場附近, 唔識水門市場都識Big C喇掛? 由Chit Lom BTS站落車, 沿天橋行過去Big C, 天橋沿途都有指示牌教你去碼頭.
由於呢度係總站既關係, 所以有兩邊總站, 望住張相既右手邊就係你上船既方向, 呢一邊係近Big C的.

碼頭有大大塊牌寫住 "Bangkapi" 咁就啱方向, 見船就上啦.

呢度啲船同BTS一樣, 每個站都有編號做記認. 總站係"Center", 由於The Mall Bangkapi係向東出發, 所以編號係由第一個站既E01開始去到E21, 而The Mall BangkapiE20, 即係總站前一個站落.





船既班次好密, 幾分鐘就有一班, 上到船搵個位自己坐好, 有個阿嬸會黎賣飛比你, 上面講左, 每位19泰銖.
呢位好似好威, 又戴晒頭盔既就係埋黎向你收錢既阿嬸, 佢真係好利害, 賣票又係佢, 水手又係佢, 控制乘客上落船又係佢. 提提大家, 由於船唔係巴士, 無 "鐘" 制比你按, 所以你想落船就行定出黎佢附近比佢見到你, 咁佢就會叫船長下一站停船, 如果唔係佢係會飛站的. (不過, The Mall Bangkapi係主要既站, 好多人落船, 所以唔駛驚, 而回程時Pratu Nam係總站, 所以又一定會停, 放心啦).



E20到, 落船, 沿碼頭行兩步就係商場喇.

註: 本文地圖取材自谷歌地圖

沒有留言:

張貼留言