沖繩文化王國 (玉泉洞)

其實我一直都好想去日本睇下鍾乳洞. 不過好多鍾乳洞都山卡啦咁遠, 專登渣車去又好無謂. 點知原來沖繩都有鍾乳洞, 仲要係位於一個主題公園 - 沖繩文化王國入面, 咁就岩晒喇. 一齊黎睇下啦.

話明主題公園就梗係要比入場費啦. 如果你想入場兼睇埋玉泉洞(鍾乳洞)既話就揀Plan B (即係￥1,240). 沖繩文化王國位於南城市, 如果你由那霸市渣車過黎既話車程約一小時 (GPS等等最尾先講, 因為有好重要既注意事項). 另外, 雖然我為大家影左巴士班次既相. 但係由於你要喺系滿轉巴士先可以過到黎. 所以都係自駕算喇. 好喇, 無問題就入場喇!!

第一件事, 行下玉泉洞先. 上面個地圖清楚比大家睇到, 由入口開始單程行到出口就可以. 不過路程好似有成2公里, 要行20分鐘, 要留心體力! 好彩樓梯唔算多, 出口仲有扶手電梯添. 另外, 洞入面比較涼, 夏天去記得著多件褸.

行完玉泉洞, 繼續沖繩文化王國既行程. 其實呢個主題公園係一個琉球體驗館黎, 呢度主要係比你感受下做琉球人既感覺, 包括玩三味線(沖繩傳統樂器), 燒玻璃, 著下琉球服裝等等. 可惜既係, 全部都要另外收費.

有SEGWAY租, 不過價錢偏貴. 加上園內可以比你用SEGWAY遊覽既地方唔多. 所以得物無所用.

如果大家有追開我Blog既朋友都記得, 沖繩賣既玻璃不一定係沖繩做的, 唔想買錯的話, 請睇番《森之玻璃館》篇.

公園既最後一個景點, 當然手信鋪吧! 呢度啲野又唔貴喎. 買件日系T-Shirt不知幾型!

交通指南:

自駕遊既朋友, 請喺GPS輸入電話號碼: 0989497100. 要留意既係, GPS地圖既目的地係喺個公園入面的. 所以其實係未到終點就已經到目的地. 大約係終點前一公里左右就到, 所以大家差唔多到既時候要留心望下周圍既景物, 當你由荒山野嶺, 變成好似去左鄉村俱樂部咁有停車場, 有旅遊巴既話, 就表示你其實已經到達.


沖繩世界文化王國
http://www.gyokusendo.co.jp/okinawaworld/tc/