大阪篇 - 惠美須町 / 難波 / AKB48 Cafe & Shop (Namba)

去得大阪, 基本上心齋橋, 道頓堀同難波一定係黐住行咁滯, 就好似香港既太子旺角油麻地咁. 不過大阪慘D, 想搭車都無, 焗你一定要行咁滯. 今篇文章我調番轉, 介紹大家由惠美須町開始行. 其實惠美須町位於難波既附近, 由惠美須町行過去難波只須10分鐘左右. 加上難波既大型商場好似高島屋咁大家都識行講黎都無謂. 所以今日大家就由惠美須町站落車, 沿出口1a或1b一齊陪我行啦.

一出地鐵站, 你就會見到上圖呢條日本橋筋商店街. 其實惠美須町呢度被人形容為大阪秋葉原! 同樣有女僕Cafe, 二手電腦電話店鋪, 同埋賣大量動漫玩具既商店.

其實途中有幾間大型模型店唔比人影相. 我用文字描述下啦, 入面有4層樓高, 分層咁賣唔同既模型, 包括手槍, 飛機, 四驅車, 搖控車等. 而筆者就買左部1:32既大阪巴士模型返黎, Y$5000, 好鬼抵. 當日仲見到唔少香港人排隊買野添.

跟住落黎, 我地要行過去難波了.....首先介紹既係NMB48 Shop.

NMB48 Shop入面唔比影相, 不過唔係好大間, 主要係售票同埋賣FANS野, 例如POSTER, CD同圍巾等. 想睇精品既野, 就要行多兩步去旁邊果間AKB48 Shop & Cafe喇.

AKB48 Shop & Cafe

之後筆者再入埋AKB48 Cafe食野, 味道唔錯的. 仲唔係好貴.

叫得AKB48 Cafe, 當然有AKB專有既野, 例如有D食品有杯墊送, 某D套餐有得同店員玩包剪鎚. 

AKB48 Shop最後一樣介紹既野, 係一部遊戲機. 部份大阪既大型機鋪都會有, 就係以AKB48為主題既喪屍GAME. 內容係....一個風和日麗的晚上， 一種不明病毒入侵日本， 令到AKB48各成員變成了喪屍。而你“大島優子” 任務就係拯救你既隊員......

離開左AKB48 Shop & Cafe, 就繼續去附近既鋪頭行下.

上圖NMB48 Theater右手邊有個商場通道, 就係通往難波站架喇.