2017年2月5日 星期日

無添加迴轉壽司 Kura Sushi くら寿司

我發覺原來我搬Blog時搬漏左呢間餐廳. 就等我今日重新介紹多次比大家啦.

大家都知我一向都介紹平靚正既野, 所以食壽司都要搵間平既黎食, 呢度碟碟¥100咋!!! 不過淨係平邊度夠? 呢間壽司鋪最正既係, 有得食又有得玩. 黎啦!








大家可以見到, 呢間鋪係有雙層壽司運輸帶的. 下層係平時慢慢轉既迴轉壽司, 而上層就係高速壽司帶. 大家需要透過座位上方既Ipad, 揀你想食既壽司, 之後店員就會即叫即製, 再直接透過高速壽司帶送到你面前. (即係依傢元氣高速線做緊既野囉)


上圖就係壽司到左既時候既樣子, 佢係停正喺你面前的. 而個MON會提示你攞野, 因為如果你唔攞既話就會阻住其他人用. (提提你, 部份舊式既店鋪仲係用緊舊式高速帶, 你拎完壽司之後, 係要手動禁個MON旁邊個綠色制等佢知你攞左的. 新店就係自動感應既, 乜都唔駛做.)





入到鋪, 自己禁飛再等人叫號碼就可以. 其實全部都係迴轉枱, 不過如果你想坐卡位的話, 記得禁BOX席(左手邊個制), 兩個人都可以坐BOX席架!! 跟住我影左個餐牌比大家, 真係全部都係¥100, 不過唔一定日日有齊咁多款比你揀. 識食既朋友, 梗係揀拖羅又或者係炙燒芝士類既野啦, 平時燒物貴啲架嘛. 好喇, 講完好食, 要講好玩喇.


大家睇到, 你張枱既旁邊, 有個返却口, 等你唔駛放到成枱都係碟. 同埋, 每當你退夠5隻碟既時候, 都會即場抽獎一次, 個MON會話你知中定唔中架喇, 如果抽中既話, 頭頂個扭蛋機就會跌隻蛋出黎. 大家睇下上面啲相, 就知我喺唔同既鋪都中過. 上年佢地仲同妖怪手錶玩Cross Over, 所以扭蛋係妖怪人物黎. 如果你真係黑仔到玩左廿幾三十碟都唔中既話, 門口有扭蛋機比你課金 (比錢) 的.

講左咁耐, 都未講呢間鋪叫咩名添. 其實佢叫くら寿司, 台灣Blog譯做無添加迴轉壽司. 我既文章平時叫佢做Kura Sushi, 因為佢自己個官網都係用kura而唔會提無添加呢三隻字. 其實くら (Kura) 即係迴轉咁解, 所以佢間鋪直情就係叫迴轉壽司. 又由於佢賣到咁平既關係. 佢啲鋪大部份都係山卡啦咁遠, 你見啦, 我試過落住雪渣車去食架. 不過我都係嚇下你啫, 如果東京都計, 都有幾間係喺JR站附近的. (咁當然唔係新宿東京呢啲地方啦. 池袋有一間, 不過勁多人唔推薦. 品川都有一間, 我最常去呢間. 其餘京都, 大阪, 沖繩都有分店.). 想去試下既朋友, 去下面官網搵地址啦.

くら寿司

沒有留言:

張貼留言