今日帶大家去秩父既一間旅館浸溫泉，原本以為秩父呢個地方無乜人識。點知上網搵料寫呢篇文章既時候發現原來好多香港同台灣既背包客黎尋幽架喎。咁岩喇，即係我寫呢篇文無錯喇。
秩父位於埼玉縣既西邊，除左溫泉出名之外，呢度由於冬夏分明，所以有好多自然景觀同玩意，例如冬天可以睇冰柱，夏天可以玩激流。
講左點樣搭車黎秩父先啦，一般黎講都係由池袋出發，搭西武秩父線特急，由池袋一程車去到西武秩父站。車程約78分鐘，車費係￥1412。所以由東京市過黎，快捷方便。但係如果你好似我咁已經買左JR PASS的話，就可以考慮下由東京出發，搭新幹線去熊谷站，再租車自駕去秩父。由熊谷去秩父車程約1小時45分鐘。我地上車啦！
早幾篇文章為大家介紹過架啦，雙層新幹線就黎要同大家講Bye Bye，所以專登揀佢既班次黎坐。坐上層望出去個景的確係一流，唔會比行車天橋遮擋住。
如果你有租開車既話，都會留意到其實差唔多每一個新幹線既車站旁邊都總有一兩家租車公司的，今次租呢部Mazda 2，唔錯，仲好過我部Smart仔。有少少野提提大家先既，就係由熊谷去秩父途中會經過一段好短既收費隧道，由於我怕麻煩又唔想比錢既關係，大家可以喺部GPS機度，選擇“不使用收費道路”呢個選項，咁個地圖就會另外指第二條路比你，但係其實行唔行隧道都只係相差15分鐘左右，大家可以參考下我呢個做法。
梁山泊
今次筆者揀左間超抵既溫泉旅店玩番個Day Trip。超抵既原因係，二人同行，包三小時房間，期間可以任浸公共風谷，另外包一節私人風谷（45分鐘），再包多你一餐好多好多餸既日式午餐，都只係一萬日元。係兩個人加埋一萬日元！！即係七百蚊港紙都唔駛！！睇埋下面既相你一定會嘩嘩聲！
上面既只係餸，未計正餐，除左上面既餸之外，佢仲有一大盤蕎麥麵，同埋一個差唔多一磅自製既蛋糕，用黎興祝我地夫婦咁喎。係咪抵到爆炸呢？浸完溫泉，眠一眠再食埋呢餐，岩岩好走人。要去下一個景點了。（注：由於梁山泊呢度無公共交通工具黎，所以只好自駕，否則的話，可以考慮下由西武秩父站搭的士過黎，約百幾蚊港幣，可參考以下地圖）
秩父、秩父神社、西武秩父
浸完溫泉之後，近近地黎番西武秩父站呢邊行下先，車站旁邊有個大型停車場可以泊完車過黎慢慢行。
慢慢行，行去邊？當然係沿住番場商店街，行過去秩父站旁邊既秩父神社睇下啦，不過行街既時候同大家介紹下上面呢樣野先。從地圖可以睇到，秩父站既周圍有19個呢啲咁既開運像。每個像當然係一種神獸，而每種神獸都有唔同既“功能”，有啲係健康運既，有啲係戀愛運既，想乜都有既話，沿住地圖搵晒佢地出黎，摸下佢又或者好似當地人咁放個銀仔上去再許個願吧。
雖然話就話係商店街，但係由於呢度唔係遊客區，所以大家可以見到啲商店都係居民用既日用品店同電器鋪為主，行大約20分鐘左右，終於黎到秩父神社。
離開秩父神社既時候，大家會望到馬路有下面呢個大招牌。
雖然唔知佢寫乜，但係大約估到佢係一間手信店之類，既然寫住免費休息，仲要步行一分鐘咁近，即管去下。
開估喇，呢度真係賣手工藝野既，仲有一兩間餐廳。而最好既地方係呢度有洗手間，同好多枱椅，的確係休息停留一刻既好地方。休息完，我地又再上車去玩啲刺激既野！
長瀞激流
要黎長瀞玩激流，當然要渣車上黎長瀞呢個地方啦，睇睇下面個地圖你就會明。
無論你渣車定搭火車都好，認住長瀞站，沿住岩だたみ通り商店街行幾分鐘就到。渣車既話，周圍都係停車場任你泊。
行完成條街，滿心歡喜咁黎到海邊，淨係見到啲船喺度！又話三月至九月都有激流既？無計啦，大家可以睇到，應該係今年冰山遲左溶，所以條河唔算多水，所以真係無得玩。http://www.chichibu-omotenashi.com/tw/nagatoro.html
留番個網址比大家，有興趣既可以上網睇定先，下次黎玩。呢度玩激流好方便，我地依傢身處既地方係中游，大家可以泊車同放行李喺呢度，佢有免費巴士車你去上游度玩激流落返黎呢度。咁你就可以上番車走人。如果你想玩全程激流既話，佢會由上游一直激流到下游，之後再有免費巴士車返你上黎中游呢度攞車走人，非常方便。
其實長瀞呢個地方，除左激流之外，仲可以搭吊車上寶登山賞花的。位置喺長瀞站既西面，即係同長瀞激流一個左一個右。不過寶登山我就無上去喇，留待大家發掘。
(本文地圖取材自谷歌地圖)
沒有留言:
張貼留言