金澤 (金沢)

今日帶大家去一個近年好多香港人去既地方，就係金沢喇。金沢位於北陸地方，係新瀉之外第二大既城市。不過如果計景點黎講就非常集中，一個圈就行晒。至於金沢有乜咁特別吸引到咁多香港人去呢？呢度有北陸小京都之稱，因為呢度好有藝術氣氛仲有個好出名既21世紀美術館，同埋有一條超過100年歷史既東茶屋街。而食野方面，可以去近江町市場食海鮮。仲有個攝影發燒友好鍾意去既日式花園兼六園。咁你話係咪好好玩呢？

由於金沢位於北陸地方，所以由東京出發一定要搭新幹線，單程車費係￥14120，車程約兩小時三十分鐘。所以當然係買PASS抵啲啦，由2016年4月1日起，JR推出左北陸拱型鐵路周遊券，連續七天任搭只需￥24000（日本國外販售計），呢個價錢已經包埋你坐N'EX來回市區同機場架喇，所以都叫買得過。

由大阪、京都出發，可以坐JR東海道本線既特急班次Thunderbird號直達金沢，車程約兩個半小時，單程車費係￥7130。呢段路亦都可以買上面講過既北陸拱型鐵路周遊券既，不過因為呢程車錢比較平，買唔買PASS就睇你會唔會去埋奈良、神戶同京都喇。

從上面個地圖大家可以睇到，大阪、金沢同東京其實係一個三角形，所以兩邊上去金沢既車程都係差唔多。跟住下面係金沢市內地圖，大家留心睇紅色字就可以。

地圖入面紅色字既景點本文都會有詳細既介紹，來吧，我地由東京出發！

出發時見到對面月台有部雙層新幹線Max Tori，大家想試下坐既話要快手喇，因為佢年事已高，不出一兩年就應該會退役架喇。

到達金沢，月台都新過人。

出左閘之後，搵呢個東口出就岩架喇。一出到去會見到個大巴士總站，不過唔好心急上車住，因為要買一日任搭PASS，出左大門向左手邊行就會見到下面呢個商場，FORUS Kanazawa。

呢度同平時既商場差唔多，大家有時間既可以行下，去下洗手間。而巴士車票就係喺呢座商場旁邊。

黎得金沢，一定要買呢個一日任搭巴士既PASS，因為呢度無地鐵，一定要搭巴士，一日任搭只係￥500，單程收費都要成￥200，所以非常抵買，就算當地人買餸都會買呢張PASS。買完之後，去7號月台等巴士。

呢條金沢周遊巴士線有分LL（左迴）同RL （右迴）兩種方向行駛，簡單講即係順時針同逆時針咁行，大家睇清楚左個地圖，就好容易知道你應該搭邊個方向既車，兩邊班次都係約15-25分鐘一班。好似我第一個去既目的地係近江町市場，咁就當然係搭逆時針（即LL）班次啦。

近江町市場

近江町市場就好似大阪既黑門市場，京都既錦市場一樣，都係食海鮮同買餸既地方，呢度大部份店鋪集中在地面，二樓就係一啲餐廳食肆，好喇，睇相好過講啦。

今次我隆重介紹大家去食呢間餐廳，叫做近江町市場寿し。呢度主要係食魚生飯的，當然你亦都可以食壽司或者刺身，但係食飯會比較平啲。同埋佢有一種雜錦魚生飯係由大廚拍版，用當日最新鮮美味既材料做的。一個魚生飯約千令二千日元左右啦。雖然係少少貴，但係你見佢由朝到黑都要排隊就知道唔會中伏架喇，入去啦。

上面呢個係就係雜錦魚生飯，原來仲有個餐湯送的。兩樣都咁好味。之後我地仲加埋叫多個蟹湯，只係￥400。

大家睇下個蟹湯幾足料，仲有蟹腳比你食。聽講金沢其中一樣出名既係蟹，大家不妨試下。食完飯，繼續行下，食生果。

粒粒橙汁大家就飲得多喇，原個橙汁你又飲過未呢？￥300一個，唔飲都買個黎影相威下。

喺近江町市場既正對面，有呢個黑門小路，都係行街買野既地方。唔行既話，再上巴士去下一個景點，香林坊。

香林坊

香林坊係金沢既澀谷。呢度有幾個大型商場包括Daiwa、 Atrio同埋金沢109！

呢座109真係109黎架，日本無老翻的。不過時間所限，我無入去睇喇，當地人話入面啲衫同澀谷賣既差唔多。唔行街既話，又上巴士去下一個景點，東茶屋街。

東茶屋街

一落車第一樣見到既係呢座金箔工藝館，金沢呢度真係出名金的，不過唔係黃金，係金箔，所以呢座工藝館係等大家了解下金箔既製作過程之餘，仲可以比你親手試下的。好，繼續行。

行到呢度停一停先，因為有雪糕食，仲要係金箔雪糕。好出名的，又唔貴，不過金箔其實就無乜味既，仲要入口即溶，大家貪得意就型下啦。

既然出名金箔，同金箔有關既產品當然唔少得啦，金箔護膚品，金箔擺設一定唔少得，你鍾意既話，買上面呢盒金箔返屋企餸飯又得，夠唔夠土豪？

上面呢幾張相就係東茶屋街喇，其實係一條數百米長既短街，不過唔好睇少呢幾百米，呢度有過百年歷史。相傳當年全個金沢只係呢度容許興建兩層高既建築物，點解？有露台先可以比班大爺高高興興地飲茶睇藝妓嘛。時至今日，呢度已經改建為手信鋪同食肆了。不過，金沢市觀光協會耐不耐會有藝妓的藝觀賞會，睇下你當日好唔好彩見到藝妓喇。

其實遊金沢除左搭巴士之外，呢度都有好似台灣咁既租單車服務，租車／還車點仲包括晒整個金沢既著名景點同車站。不過既然巴士都咁平，租唔租單車就睇你個人喜好喇。我地又上巴士去下一個景點，呢個巴士站仲有個電子屏幕話比你知部車去到邊，下一個景點係金沢21世紀美術館。

金沢21世紀美術館

上面呢個游泳池大家應該從唔同既地方見過架喇，呢個係全球有名既藝術品來的。如果你想去池底影番上黎既話，係要比入場費入去美術館參觀的。講番呢間美術館，佢係一個大圓型既建築物，外圍係一大個公園，但係其實大家睇相都見到，公園度放置左不同既藝術品。

考下大家，大家知唔知上圖呢樣野係乜野黎？睇片開估啦。

其實呢部係透明升降機。由下層開始睇大家當然一早知係乜啦。但係原本我地喺上層既時候，淨係見到塊玻璃門，同埋一個制，都唔知咩黎。我地玩LIFT既時候，當地人見到都覺得好新奇。

回程返金沢站喇，當然又係搭巴士啦，不過原來金沢站好靚架喎。

大家可以見到，玩完一日出返去金沢已經接近六點。唔可以再遲架喇，因為周遊巴士六點幾就無車。所以今次我係去唔到兼六園的。如果大家想盡興既話，一係早啲黎，一係就黎呢度玩兩日一夜。因為金沢既周邊仲有一個好出名既旅遊景點叫白川鄉。由金沢去白川鄉約兩個多小時車程。

最後，補番兼六園既網址比大家自己去睇下啦：http://www.pref.ishikawa.jp/siro-niwa/kenrokuen/t/index.html

北陸拱型鐵路周遊券網址：http://hokuriku-arch-pass.com/tc/


(本文地圖取材自谷歌地圖)