高雄 - 旗津

上文教左大家點去西子灣，今集就帶大家去旗津喇。提多一次，想去旗津就一定要由鼓山渡輪站 (即捷運西子灣站) 搭船去。雖然大家可能會見到有巴士可以去到旗津，但係班次係極疏，仲要搭好耐，當地人話，淨係旗津內都要搭成半個鐘頭。 
好喇，入正題之前我地又睇下地圖先：

大家可以見到，旗津係大到好似半個高雄咁長。所以你入得去既話，至少預兩個鐘頭或以上先可能行得晒。筆者既旅遊BLOG度成日都有讀者問究竟旗津值唔值得去？筆者係鍾意踩單車既。而呢度夠大又有幾個大景點。所以筆者覺得OK。加上我老婆鍾意食斗六冰室，咁就一定要入去啦。依傢我先同大家簡介下旗津有咩景點先：海岸公園、海味市場、貝殼館、風車公園、海洋探索館同馳名雪糕店斗六冰室。
上文講左，由鼓山渡輪站搭船黎到旗津（如下圖）

星期日及公眾假期，仲有船會直達真愛碼頭添，不過就疏D，好似要半個鐘至40分鐘一班。平時來往鼓山既就5-10分鐘已經有。

落左船之後，好多間租單車的。過千其唔好心急租門口果間。個彎入去廟前路仲有幾間單車鋪的，度仲有電動單車租添。想踩到身水身汗既話，租部電動車啦。想載埋一家三口既話，仲可以租三輪電動車添。一般黎講，租單車係以兩小時計的，我諗一般人慢慢行周圍影下相既話，兩個鐘係有D勉強，但係4個鐘又好似太多。 =.="  你地可以去到先再決定既。下圖係廟前路。

地圖A

租左單車之後，（跟紅色箭咀）由廟前路直出海邊，到旗津三路，咁就可以去到海岸公園，貝殼館同海味市場。呢個方法既好處係你唔會迷路，沿海邊行一睇就明。另外就係唔駛行回頭路。

上圖左手邊就係海味市場，右手邊就係旗津海岸公園了。記住，單車唔可以踩入草地的，會爆軚。如果你踩三輪或四輪車既話，好似上面張相咁，泊埋一邊就可以架喇，無人抄牌的。海味市場入面有好多台灣地道精品賣，包括布袋戲既公仔。 我老婆都買左幾隻返香港。至於海味方面，對比香港既西環，筆者感覺上係平好多。不過當然，我唔係師奶，我唔識分靚定唔靚。

再向前行少少，有個路口可以轉右的，一入左去就會下面呢座建築物，呢度就係貝殼館喇。入面唔可以影相所以我無影到。呢度好值得去的，好多貝殼都好靚，另外，呢度有冷氣仲有洗手間。停一停去個洗手間涼下冷氣不知幾好。

之後，就要努力踩.....15分鐘左右啦......風車公園就起你右手邊喇。 (地圖B) 

  

風車公園有個大停車場，仲有支風車，係咁多架喇。去唔去就真係無乜所謂。不過如果你反正都係去影相踩單車就順手去埋啦。之後大家可以沿旗港路（紅色箭咀）前往高雄海洋探索館。

高雄海洋探索館

探索館係要收入場費的，不過當時租單車果間鋪有COUPON派，所以我免費入去的。入面唔大架，又無乜特別野睇，唔駛錢行個圈就走了。

走既時候，沿藍色箭咀走，即中洲二路向上行，就可以去到（地圖A）既斗六冰室架喇。

自家製雪糕店斗六冰室

上圖呢塊係斗六冰室最有名既雪糕三文治。斗六冰室喺台灣好出名的，全部雪糕都係自家製作。泊部車喺門口就可入去食喇喂。

食完之後，沿中洲三路，去到通山路既時候你就會認到路，識得返去交車架喇。全個旅程我估計約三小時左右。

最後講埋食野既地方先。全個旗津只係得大排檔式既食肆，全部都位於租單車既前後一兩條街，好集中，但係太過正餐，想食小食Tea下都無。

補充埋個燈塔。燈塔位於旗津既最左上角。但係上燈塔條路係封左的，所以我部三輪車入唔到去，所以無上過去。要上既只可以步行。上去燈塔唔係好遠，10分鐘內就行到，另外喺你行上去燈塔之前，會經過一條星空隧道，其實只係一條好短既行人隧道，不過D人話入面好靚架喎，留番比你地去睇下喇。


(本文部份實景地圖及地圖取材自谷歌地圖)