名古屋篇 - 永旺夢樂城常滑 (Aeon常滑)

上一集, 帶大家行咗招財貓散步道, 尋找招財貓的故事, 仲講左啲招財貓既冷知識比大家聽, 未睇過既可以去呢度>>名古屋篇 - 常滑 (招財貓的故鄉)重溫番.  一場黎到常滑市點會咁快就走? 梗係黎Aeon行陣街先啦! (乜話? Aeon都攞黎介紹??) 如果我話你知, 呢間Aeon有日本正式既Kart小型賽車場, 有歷奇繩網玩, 仲有全球最大隻陶瓷招財貓, 咁值得介紹喇掛? 一齊黎睇下啦.

永旺夢樂城常滑 (Aeon常滑)

永旺夢樂城常滑 (Aeon常滑) 雖然喺常滑市入面, 不過距離佢最近既鐵路站係りんくう常滑駅 (臨空常滑站), 佢正正就係喺中部國際機場同常滑站既中間, 簡單講, 由機場過黎搭一個站就係喇!

由上面既相片可以睇到, 呢間Aeon係有幾咁巨大. 由一端行到去另一端要成10分鐘架!!! 真係行都行到腳軟. 大家睇住下面啲相先.

從上面啲相可以睇到, 呢度樓高兩層, 空間感十足, 有好多地方比你坐, 有寵物野賣又有小朋友既衫. 仲有比小朋友放電既彈床玩.  當中介紹下間Amuse Factory, 除左有得比你夾公仔同打機之外, 佢仲有模擬飛行(揸飛機)比你玩, 仲要係好平. 不過我無玩過, 我留番時間玩之後介紹既刺激野.

講到食肆方面, 呢度有兩個食野既地方, 首先介紹個Food Forest先.

Food Forest 喺2/F (即係上一層) 既最遠處, 呢度仲有個Kids Space比小朋友玩, 夠晒細心. 由於係Food Court形式, 當然平食為主啦.

而另一個食野既地方就靚好多, 位於1/F (即係地下) 近停車場既位置, 我地由室外停車場開始行入去.

一行入去最搶眼既當然係呢隻叫 "多福" 既招財貓啦, 佢係全球最大既常滑製招財貓, 勁喇掛.  有冇留意上圖呢隻招財貓同本文一開始嗰張相有少少唔同?  因為第一張相係2月14日影既, 當日有一日限定既朱古力版招財貓!! 你估寫Blog真係求其影幾張相就得咩? 我去左幾日, 由朝影到黑架!!

講番正題, 呢個食肆既範圍叫 "常滑のれん街", 呢度既餐廳就比較中價啲. 唯一要留意既係, 雖然佢寫住收22:00, 但係呢個時間係落閘時間, 你21:00 黎已經無得入架喇, 記住早啲黎!!

最後要介紹既就係呢個戶外公園 "ワンダーフォレストきゅりお", 從上圖可以睇到呢度有得浸溫泉, 有賽車場, 有溜冰場, BBQ燒烤同埋繩網陣!!

繩網陣分三種難度, 價錢由¥500至¥2200一位不等, 由於收18:00關係, 我去兩日都趕唔切, 唯有去常滑市觀光協會偷啲相黎比大家睇啦.

呢個Kart場叫Sea Side Circuit, 係一個好正統既Kart場, 不過你無車牌都可以玩, 一般黎都唔駛預約架喇. 等一兩round就可以上車. 價錢如上圖, 男性單人車¥2200, 女性單人就¥1600, 點解咁唔公平既呢?? 如果你女友唔敢自己揸既話, 可以揀2人車¥2900. 第一次玩既朋友要另加¥300開張會員咭.

有咗呢張咭, 你就可以喺日本三大Kart場度玩同埋紀錄你既速度資料架喇. 好喇, 出發!!

等既時候, 可以睇到現在玩緊既人既時間, 好緊張. 話晒代表香港出場, 唔輸得架嘛!!

玩完之後, 佢會Print番你既成績比你睇. 大家睇下, 我第一次去玩, 都入到當日既前四!! 死未. 第一位無得講, 本月既第一名都係佢, 似乎佢日日黎玩.

 如果帶小朋友黎既話, 可以比佢玩上圖呢隻小型車, ¥500一次, 好抵玩, 又安全.

交通指南:

一開頭已經講左, 呢度最近既站既臨空常滑站, 由臨空常滑站行過黎Aeon只需兩分鐘.  不過, 由於臨空常滑站係細站, 閒日大部分時間一個鐘得兩班車停呢個站架咋!! 所以如果由名古屋黎既朋友, 我建議你搭 特急/急行 既班次去常滑站, 再轉搭各停搭一個站過黎; 機場過黎就簡單啲, 上車前睇定該班次停唔停臨空常滑站就可以, 車程3分鐘.

除此之外, Aeon常滑仲有免費穿梭巴士來回機場, 車程約15分鐘, 閒日一個鐘有一至兩班車, 星期六日密好多, 詳情請去官網睇>> Aeon交通指南

自駕遊既朋友, 可以喺GPS機輸入電話號碼: 0569357500, 呢度有超大個停車場任你泊, 仲有6小時免費泊車, 真係乜都夠晒. 由名古屋揸車過黎約1小時, 如果你行收費高速既就40分鐘左右.


實用網址:
永旺夢樂城常滑 > https://tw.aeonmall.global/mall/tokoname-aeonmall/
Sea Side Circuit > http://www.seaside-circuit.com/
常滑市觀光協會 > http://www.tokoname-kankou.net/

其他名古屋旅遊介紹, 請瀏覽名古屋篇:
http://thatswhystravel.blogspot.com/search/label/%E5%90%8D%E5%8F%A4%E5%B1%8B


(註: 本文地圖取材自谷歌地圖; 本文部份相片取自常滑市觀光協會)