2019年1月15日 星期二

曼谷親子篇 - Central Festival Eastville


上集介紹左一個近市區既親子商場比大家, The Mall Bangkapi. 今集再黎另一個親子商場, 呢個商場除左親子之外, 仲集合文青, 運動同環保於一身, 適合唔同主題唔同人士過黎打咭呃Like, 呢度就係Central Festival Eastville.









呢個係Central旗下既一個主題商場, 所以裝修一定有番咁上下. 一入到商場, 先感受到佢環保既概念, 周圍好多綠化, 仲有天然光同大風扇做通風. 不過當然, 你怕熱既, 可以入番去冷氣商場既範圍.
















呢度樓高三層, 空間感十足. 你睇下當日地下有車展都仲可以咁鬆動就知呢度有幾大. 當中幾家大型既店鋪我上面影晒相比大家睇我唔花口水介紹, 相中你仲會見到呢個商場有親子廁所添. 而講得親子, 當然唔只廁所咁少啦.


親子篇


首先, 呢度有福士/ Mini Cooper BB車借用服務. 真係睇到都想坐.







呢度仲有開心小火車玩, 只要喺呢個商場任何消費滿500泰銖, 就可以免費玩一次, 每次上限4個人 (以你坐得落一卡車為準), 我呢個大細路當然玩過, 超好玩, 佢真係兜足一個商場, 車程都有15分鐘咁滯.


淨係玩火車邊夠小朋友放電? 呢度頂樓仲有呢間比小朋友放電既遊樂場, 入面有兩層樓高既滑梯, 仲有波波池, 繩網等等, 收費都係幾十蚊港幣. 如果你想連幾十蚊都慳既話, 無問題. 去室外....

室外範圍既地下有個大沙池, 一樣夠比你小朋友放電, 放到佢無電都仲得呀!


運動篇


呢期興運動女神, 當然要搵個地方呃下Like啦, 呢度有條跑道比你去跑, 緩跑, 甚至係行都得. 全長大約係400米左右, 我 "行" 過一圈影左呢張相比大家就已經心滿意足喇, 我又唔係女神, 無人想睇我扮流汗既相架?


文青篇







平時你上網睇相, 可能會見到間泰國版誠品但係又唔知喺邊, 答案就係喺呢個商場度喇!! 

呢間書店叫B2S Think Space, 就好似誠品咁, 除左書同文具之外, 少量旅行用品, 衣服, Board Game, 連廚房教煮餸都有. 呢度仲有大量既座椅比你安心坐低睇書, 真係文青流連既好地方.

不過呢間書店比較隱閉, 位於室外範圍既地下, 沙池旁邊既超市裏面.
當你去到上圖呢個位置, 一路行到尾, 左手邊就係.

其實, 呢個商場除左之上所講咁多種功能之外, 仲有比寵物人士活動既狗場, 不過對於香港旅客黎講就未必用得著.


交通指南:


Central Festival Eastville遠離曼谷市區 (其實又唔係遠, 點講都係地鐵範圍內), 所以最快速方便就係搭地下鐵再轉的士. (係地下鐵MRT, 唔係BTS)


大家搭地下鐵去到Lat Phrao站, 4號出口, 眼前就有一個巴士站. 你企喺呢度用Grab叫的士, 15分鐘左右就可以去到Central Festival Eastville, 車費大約30-40蚊港幣. 我畫埋條紫色路線圖你睇, 一上車直行到尾左轉就係, 唔怕比司機兜路.

沒有留言:

張貼留言