2018年7月17日 星期二

熊本篇(上) - 熊本市電及櫻之馬場 城彩苑

離開左博多, 我地黎到熊本. 雖然香港有直航機直達熊本, 但係我諗多數人都係由博多過去, 所以今集由博多開始教大家搭新幹線, 然後會教大家買熊本市電既一天任搭PASS再去埋櫻之馬場 城彩苑.  而下一集就會帶大家去上下通Shopping. 好喇, 熊本出發!!


九州新幹線


新幹線既入口喺二樓, 近筑紫口(東口)嗰邊, 見到上呢個指示, 向左手邊上扶手梯或者搭lift上一層就見到.



呢度有間新幹線專門店, 仲有博多駅限定既EVA貼紙機!!


上圖呢個就係新幹線入閘口, 係好細的. 用PASS既朋友, 請用右邊個玻璃門進入, 照舊SHOW張PASS比職員睇就可以入閘. 入閘後有多間店鋪, 可以消磨下時間, 或者買早餐食.







熊本市電



最快既新幹線計, 34分鐘車程就黎到熊本, 所以即日來回博多熊本係完全無問題. 到達熊本站之後, 就會見到下面呢隻熊本熊 (Kumamon).

影完相就出閘.
出閘後, 向白川口(東口)行, 就可以搭熊本市電, 不過如果你要買PASS的話, 就要直行, 去下面呢間鋪.


由於熊本駅正值大裝修既關係, 所以要小心有圍板阻擋你視線, 好似下圖咁, 唔行到埋去都睇唔到熊本觀光案內所.
肥後市場入口既最左手邊就係熊本觀光案內所. 而熊本市電一DAY PASS就係呢度買架喇.


每張¥500, 如果逐次比錢的話, 每次劃一收費¥190, 所以搭三次就回本.  簡單講, 你由熊本上下通, 再去櫻城馬場, 再去熊本就已經三程車, 所以買PASS無錯架喇!! 
買完要自己刮番你要用嗰日 (即係當日啦), 記住小心啲刮, 只可以刮一個月份同一個日子咋!!


一行出黎, 就會見到上圖呢個月台, 唔駛過馬路, 呢邊上車就啱架喇.

舊熊本駅

呢度見車就上得, 呢個站得A線行, 要去上下通, 熊本熊辦公室甚至櫻之馬場都係搭A線. 熊本市電班次頻密, 約5-10分鐘就有一班車. 走咗車都唔駛追.


呢個就係熊本市電路線圖 (取材自熊本市交通局). 可以見到遊客黎講, 一條A線就已經可以去晒你需要去既景點, 基本上, 你只需要認識紫色星嗰四個站就夠.  當中上下通就係喺通町筋水道町站既中間.


熊本市電大部份列車都係一卡車, 同香港既電車一樣, 車尾上車, 車頭落車. 落車時比錢或者SHOW PASS比司機睇.


櫻之馬場 城彩苑


由於熊本城因為地震關係要大修到2032年, 所以依傢封閉左無得去, 所以只可以去佢旁邊既櫻之馬場 城彩苑. 要去呢度就係搭A線熊本城 . 市役所前落.




落左車之後, 有指示牌教你行, 其實係沿住條河邊行, 約10分鐘就行到櫻之馬場 城彩苑 (不如我淨係打櫻之馬場)







上圖睇到, 去熊本城既路係完全封晒.













呢度有野食有手信買, 仲有間博物館, 同埋有VR睇.

咁究竟櫻之馬場呢度係乜野黎呢? 我簡單咁講, 佢就係一個扮江戶時代特色既市集. 呢度免費入場, 而入去博物館同睇VR先要比錢.  當地為左推廣當地既飲食文化, 歷史同傳統, 所以就起左呢個櫻之馬場, 等遊客黎熊本城之餘可以過黎感受下.

今集暫時講到呢度先, 下一集會帶大家去上下通同埋熊本熊辦公室.

真係咁快完? 比啲彩蛋大家睇下啦, 特別係電車迷.
上圖咁啱見到左右兩班車都係低床列車低床列車即係香港叫超低地台列車. 低床列車得幾部架咋, 要大約個拎鐘先出現一班. 而我為左寫BLOG就梗係睇住時間表黎等啦. 而幾部低床列車當中, COCORO係最具代表性既一部.



低床列車係以兩卡方式運行, 每卡都有一扇車門, 乘客可以喺任何一卡上落車的. 非常方便.

從上圖可以睇到, 低床列車非常前衛, 有LED路線圖, 仲有卡位坐. 另外, 話明係低床, 所以上車時係完全無樓梯, 亦都因為咁, 所以低床列車係可以上輪椅的.


再見喇COCORO.


相關網頁:
熊本篇(下) - 上下通 及 熊本熊辦公室

沒有留言:

張貼留言